ឆ្មបឈ្មោះម៉ៅ ធា ជាមន្ត្រីសុខាភិបាលមន្ទីរពេទ្យបង្អែកប៉ោយប៉ែត២ សម្រាលកូនឲ្យស្ត្រីម្នាក់ បានតែ១ម៉ោងស្លាប់ចោលកូន យ៉ាងកំសត់ បន្សល់កូន៨នាក់កំព្រា
ខេត្តបន្ទាយមានជ័យ៖ អ្នកគ្រូពេទ្យឆ្មបឯកជន និងជាមន្ត្រីសុខាភិបាលនៅមន្ទីរពេទ្យបង្អែកប៉ោយប៉ែត២ ម្នាក់ឈ្មោះម៉ៅ ធា បានទៅសម្រាលកូនឲ្យស្ត្រីម្នាក់បានស្លាប់ម្តាយ បង្កភាពសោកសៅបន្សល់ប្តីកម្សត់ និងកូនប្រុស្រីកំព្រាទាំង៨នាក់រងទុកវេទនា ។ តាមការបំភ្លឺពីប្តីស្ត្រីរងគ្រោះឈ្មោះ វ៉ាន់ នី អាយុ៤២ឆ្នាំ មុខរបរជាកម្មករលីសែង រស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ប្រាប់ឲ្យដឹងថា ប្រពន្ធរបស់គាត់ដែលស្លាប់នោះមាន ឈ្មោះ ខន សុភាព អាយុ៤២ឆ្នាំ មានកូនទាំងអស់ចំនួន៨នាក់ ស្រី៦នាក់ មានប្រុស២នាក់ រួមទាំងកូនដែលទើបនឹងកើត ។
វ៉ាន់ នី ប្តីស្ត្រីរងគ្រោះបានបន្តថា ប្រពន្ធរបស់គាត់មុនពេល ឈឺពោះឆ្លងទន្លេកាលពីល្ងាចថ្ងៃទី៧ ខែឧសភា ឆ្នាំ២០១៥កន្លង មកនេះ ពេលនោះប្រពន្ធគាត់បានទូរស័ព្ទហៅស្ត្រីជា គ្រូពេទ្យឆ្មបម្នាក់ឲ្យមក ជួយបង្កើតកូនឲ្យលុះពេលទៅដល់ស្ត្រីជាគ្រូពេទ្យឆ្មប រូបនោះបាននាំប្តីរបស់ខ្លួនទៅជាមួយ ។ គាត់បន្តថា សម្រាលកូនឲ្យប្រពន្ធរបស់គាត់នៅវេលាប្រហែលម៉ោងជិត៧យប់ថ្ងៃខែដដែរ។ គ្រូពេទ្យឆ្មបនោះបានជួយសម្រាលកូនឲ្យប្រពន្ធរបស់គាត់បាន កូន ប្រុសម្នាក់ អស់រយៈពេលប្រហែលជាង១ម៉ោងប៉ុណ្ណោះ ស្រាប់តែប្រពន្ធរបស់គាត់មានអាការៈឈឺចុកចាប់នៅក្នុងពោះខ្លាំង បន្ទាប់មកស្ត្រីជាគ្រូពេទ្យឆ្មប រូបនោះ បាននិយាយថា មិនដឹងជាជួយយ៉ាងម៉េចទេ ក៏បាននាំជនរងគ្រោះដឹកតាមម៉ូតូយកមកមន្ទីរពេទ្យបង្អែកប៉ោយប៉ែត២ ដីថ្មី ស្ថិតក្នុងភូមិប្រជាធម្ម សង្កាត់ផ្សារកណ្តាល ជួយមើយបន្តផងដែរ ។ តែជាអកុសលខណៈពេលដែលជនរងគ្រោះមកដល់មន្ទីរពេទ្យ ក្រុមគ្រូពេទ្យដែលជួយសង្គ្រោះបាន ប្រាប់ថាជនរងគ្រោះបានដាច់ខ្យល់តាមផ្លូវស្លាប់បាត់ទៅហើយ ។
បុរសជាប្តីស្ត្រីរងគ្រោះបានបញ្ជាក់ ប្រាប់ឲ្យដឹងទៀតថា ក្រោយពីប្រពន្ធរបស់គាត់បានស្លាប់ទៅរូបគាត់បានទៅប្តឹងមេភូមិគីឡូម៉ែត្រលេខ៤ ឈ្មោះលោកខ្លែង សុឃ្លី ឲ្យជួយអន្តរាគមន៍រកយុត្តិធម៌ ប៉ុន្តែត្រូវស្ត្រីជាគ្រូពេទ្យឆ្មបម្នាក់នោះ ឲ្យលោកមេភូមិ ជួយសម្រួបសម្រួល និងបានបង់ជម្ងឺចិត្តជូនគាត់ចំនួន១៨០០ដុល្លារ ជាសំណង ដោយគាត់មិនយល់ដឹងពីច្បាប់ និងពុំបានប្តឹងបន្តទៅលើទៀត ដូច្នេះហើយគាត់ក៏សម្រេចចិត្តទទួលសំណងនោះតាមការសម្របសម្រួល។
ចំណែកលោក ហ៊ុល សុខផល្លី ប្រធានមន្ទីរពេទ្យបង្អែកប៉ោយប៉ែត២ បានប្រាប់តាមទូរស័ព្ទនេះឲ្យដឹងថា ស្ត្រីរងគ្រោះដែលសម្រាលកូនស្លាប់នោះគឺពិតជាកើតបានពិតមែន ដោយ កាលពីវេលាម៉ោងប្រហែលជាង៧យប់ម្សិលមិញនេះ មានគេដឹកចូលមកក្នុងមន្ទីរពេទ្យបង្អែករបស់លោកពិតមែន តែជនរងគ្រោះនៅពេលដែលមកដល់មន្ទីរពេទ្យនោះ គឺបានដាច់ខ្យល់ស្លាប់តាមផ្លូវបាត់ ទៅហើយ ដូច្នេះមិនមានការពាក់ព័ន្ធនឹងក្រុមគ្រូពេទ្យជំនាញរបស់លោកឡើយនោះឡើយ ។ ស្ត្រីគ្រូពេទ្យឆ្មបដែលសម្រាលកូនគេដល់លំនៅដ្ឋានទាំងប្រថុយប្រថាន ធ្វើឲ្យស្លាប់ម្តាយ រស់ទារកម្នាក់នោះ មានឈ្មោះ ម៉ៅ ធា ជាមន្ត្រីសុខាភិបាលនៅផ្នែកប្រតិបត្តិនៃមន្ទីរពេទ្យ បង្អែកប៉ោយប៉ែត២នេះដែរ ។
ដោយឡែក លោកលៀង ឡេនីន ប្រធានប្រតិបត្តិ នៃមន្ទីរពេទ្យបង្អែកប៉ោយប៉ែត២ បានប្រាប់តាមទូរស័ព្ទថា ករណីនេះលោកមិនទាន់ដឹងច្បាស់នៅឡើយទេ ដោយលោកជាប់រវល់នៅឯ ខេត្តសៀមរាប ចាំពេលលោកទៅដល់នឹងបង្កើតគណៈកម្មការអង្កេតរឿងនេះឡើងវិញ ។ ទោះជាយ៉ាងណាក្តីស្ត្រីជាគ្រូពេទ្យឆ្មបឈ្មោះ ម៉ៅ ធា មិនអាចសុំការបុំភ្លឺបានទេ ដោយទូរស័ព្ទចុចចូលជាច្រើនដងអ្នលទទួលប្រាប់ថា ជាមិត្តភ័ក្ក មិនមែនជាពេទ្យឆ្មបឈ្មោះម៉ៅ ធាទេ ហើយប្រាប់ថាចាំគាត់ ប្រាប់គាត់ទូរស័ព្ទត្រឡប់ទៅវិញ៕ដោយ យីហាំង
http://ift.tt/1PDxew4
