ហ៊ីយ៉ានដាយដឹកដីពន្លះគោយន្តកន្ត្រៃនៅចំណុចផ្លូវបំបែកជា៤លាន់ស្នូរដូចផ្គរលាន់ របួសធ្ងន់ម្នាក់
ខេត្តរតនគិរី៖ រថយន្តធនធ្ងន់ដឹកដី១គ្រឿង បុកទៅលើគោយន្តកន្ត្រៃ យ៉ាងពេញទំហឹង បណ្តាលឲ្យគោយន្តកន្ត្រៃដាច់ម៉ាស៊ីនធ្លាក់លើ ថ្នល់ហូរប្រេងពេញផ្លូវ ចំណែកតៃកុងគោយន្តកន្ត្រៃរងរបួសធ្ងន់ហូរឈាមស្រោចប្រាណ កាលពីវេលាម៉ោង១ និង០០រសៀល ថ្ងៃទី១១ ខែឧសភាឆ្នាំ២០១៥ នៅតាមបណ្តោយផ្លូវជាតិលេខ៧៨ ត្រង់ចំណុចផ្លូវបែកជា៣ ក្បែរមន្ទីរទេសចរណ៍ខេត្ត ស្ថិតក្នុងភូមិអូរកន្សែង សង្កាត់បឹងកន្សែង ក្រុងបានលុង ខេត្តរតនគិរី។
បើតាមប្រភពអ្នកឃើញហេតុការណ៍នៅកន្លែងកើតហេតុបាននិយាយឲ្យដឹងថា កាលពីវេលាម៉ោងខាងលើ ឃើញរថយន្តធុនធ្ងន់ម៉ាកហ៊ីយ៉ាន់ដាយ ជាប្រភេទរថយន្តដឹកដីធ្វើដំណើរក្នុងទិសដៅពីលិចទៅកើតក្នុងល្បឿនលឿនដូចយន្តហោះរៀបហោះឡើង ខណៈមកដល់ចំណុចកើតហេតុ បានបុកគោយន្តកន្ត្រៃចំយ៉ាងពេញទំហឹង ខណៈគោយន្តកន្ត្រៃយ៍កំពុង បម្រុងឆ្លងកាត់ និងបត់ក្បាលទៅខាងលិចក៏ត្រូវរថយន្ត បុកប៉ើង។
ប្រភពបន្តទៀតថា តៃកុងគោយន្តកន្ត្រៃមានឈ្មោះ ទួច ភេទប្រុស អាយុ២៨ឆ្នាំ ជនជាតិគ្រឹង (រងរបួសធ្ងន់) និងអ្នករួមដំណើរមានចំនួន៤នាក់ទៀតមិនស្គាល់អត្តសញ្ញាណ ទាំងប្រាំនាក់មានទីលំនៅភូមិកាំផ្លិញឃុំល្បាំង១ ស្រុកលំផាត់ ខេត្តរតនគិរី។ ចំណែកអ្នកបើកបរ និងរថយន្តបង្កមិនស្គាល់អត្តសញ្ញាណ នោះទេ នៅពេលកើតហេតុភ្លាមតៃកុងជើងល្អនោះបានបន្ថែមល្បឿនរថយន្តបើកគេចបាត់ស្រមោល។
ក្រោយពីកើតហេតុស្ងប់ទៅហើយ ទើបកម្លាំងនគរបាលចរាចរណ៍ជើងគោកចុះមកធ្វើការវាស់វែងនាំយកគោយន្តកន្ត្រៃ ទៅរក្សាទុកនៅស្នងការដ្ឋាននគរបាលខេត្តរងចាំដោះស្រាយជាក្រោយ។ ចំណែកជនរងគ្រោះត្រូវបានសាច់ញាតិក្រុមគ្រួសារដឹកបញ្ជូនទៅព្យាបាលនៅមន្ទីរពេទ្យបង្អែកខេត្តសង្គ្រោះបន្ទាន់អាយុជីវិតដោយរងចាំរថយន្តសាម៉ុយរបស់នគរបាលចរាចរណ៍ជើងគោកយូរពេក ទំនងតៃកុងមិននៅ ឬគ្មានប្រេង…ឬ…៕ ដោយ លី វណ្ណៈ
http://ift.tt/1JDPG6a
