សិប្បកម្មកែច្នៃឈើគ្មានច្បាប់៣០កន្លែង នៅស្រុកពេជ្រាដាកំពុងធ្វើសកម្មភាពយ៉ាងចំហគ្មានអ្នកបង្ក្រាប តែមានអ្នកបង្ហើបថាជាប្រភពចំណូលប្រចាំខែរបស់មន្ត្រីរដ្ឋបាលព្រៃឈើ
ខេត្តមណ្ឌលគិរី៖ ក្នុងចំណោមក្រុងស្រុកទាំង៥ នៅខេត្តមណ្ឌលគិរី សម្រាប់ស្រុកពេជ្រាដាតែមួយប៉ុណ្ណោះ ដែលមានរោងសិប្បកម្មកែច្នៃឈើច្រើនជាងគេ យ៉ាងតិចណាស់ក៏មានសិប្បកម្មកែច្នៃឈើគ្មានច្បាប់ទម្លាប់ ត្រឹមត្រូវរហូតដល់៣០កន្លែង ឯណោះកំពុងតែបើកធ្វើយ៉ាងចំហដោយគ្មានកោតញញើតសមត្ថកិច្ចណា បន្តិចសោះឡើយ។ បញ្ហានេះក៏ដោយសារតែមន្ត្រីរដ្ឋបាលព្រៃឈើប្រចាំខេត្តមណ្ឌលគិរីនេះ បានប្រព្រឹត្តផ្ទុយពីគោលការណ៍ច្បាប់ និងកតព្វកិច្ចរបស់ខ្លួន ដោយបង្គាប់ឲ្យថៅកែសិប្បកម្មឈើទាំងនោះបង់ប្រាក់ដាក់ខែជាប្រចាំ ហើយដើម្បីការពារចំណូលមិនប្រក្រតីប្រចាំខែនោះ មន្ត្រីរដ្ឋបាលព្រៃឈើបានក្លាយជាជើងកាងនៅពីក្រោយការប្រព្រឹត្តល្មើសច្បាប់របស់ក្រុមឈ្មួញទាំងអស់នោះ ដោយគ្មានក្រែងញញើតច្បាប់ទម្លាប់អ្វីបន្តិចឡើយ ជាហេតុធ្វើឲ្យក្រុមឈ្មួញបានចិត្តរឹតតែក្រអឺតក្រទមសម្រុកធ្វើសកម្មភាពយ៉ាង គគ្រឹកគគ្រេង និងអនាធិបតេយ្យបំផុតនៅឃុំចំនួន២ នៅក្នុងស្រុកពេជ្រាដា។
មានការកត់សម្គាល់ឃើញថាក្រុមឈ្មួញ ដែលធ្លាប់ប្រព្រឹត្តបទល្មើសព្រៃឈើនៅខេត្តមណ្ឌលគិរី នាំគ្នាផ្អាកសកម្មភាពដឹកជញ្ជូនបទល្មើសព្រៃឈើ ដោយពួកគេនាំគ្នាបង្កើតសិប្បកម្មកែច្នៃឈើវិញម្តង។ មានការចង្អុលបង្ហាញពីពលរដ្ឋថា ក្រុមឈ្មួញដែលកំពុងពួនជ្រកក្រោមការបើកធ្វើសិប្បកម្មគ្មានច្បាប់នោះ សុទ្ធសឹងតែជាអ្នកប្រព្រឹត្តបទល្មើសព្រៃឈើនៅខេត្តមណ្ឌលគិរីនោះឯង ហើយពួកគេមានទំនាក់ទំនងល្អណាស់ជាមួយជំនាញរដ្ឋបាលព្រៃឈើ ទើបពួកគេគេចផុតពីការបង្ក្រាបដោយសុវត្ថភាព។ ហើយពេលកន្លងទៅមន្ត្រីជំនាញរបស់រដ្ឋបាលព្រៃឈើថ្នាក់កណ្ដាលធ្លាប់ចុះធ្វើការត្រួតពិនិត្យសិប្បកម្មកែច្នៃឈើជាច្រើនកន្លែងផងដែរទូទាំងខេត្តមណ្ឌលគិរី តែពុំបានរំខានដល់សិប្បកម្មល្មើសច្បាប់នោះទេ តែបានធ្វើសកម្មភាពលួចបើករោងសិប្បកម្មបានស្ងប់ស្ងាត់មួយរយៈខ្លីបន្តិចដែរ។
ជាក់ស្តែងនាពេលបច្ចុប្បន្ន មានការអះអាងយ៉ាងចំហពីម្ចាស់រោងសិប្បកម្មគ្មានច្បាប់ ឈ្មោះ ចែរឿន ភេទស្រី និងឈ្មោះលោក ក្តី រស់នៅ ឃុំ ដេអេ ស្រុកពេជ្រាដា ខេត្តមណ្ឌលគិរី ថា មិនចាំបាច់ខ្លាចក្រែង សមត្ថ កិច្ចអ្វីទៀតនោះទេ ព្រោះការដំណើរការមុខរបរ របស់ពួកគាត់នេះ បានបើកធ្វើជាយូរមកហើយ។ បើទោះជាគ្មានច្បាប់ទម្លាប់អ្វីនោះមិនចោទឡើយ ព្រោះពួកគាត់បានបង់ខែជូនមមន្ត្រីជំនាញរដ្ឋបាលព្រៃ ឈើរួចអស់ហើយ ហើយបើមានទូរទស្សន៍ ឬកាសែតណាចង់ចង់ផ្សាយអីក៏ផ្សាយទៅ សូមអញ្ជើញមួយសប្បាយ ខ្លាចតែខ្សោះខ្យល់ឈប់ខ្លួនឯងទេ។ ពាក់ព័ន្ធនឹងករណីនេះតាមប្រភពព័ត៌មានក្រៅផ្លូវការមួយបានខ្សឹបប្រាប់ថា សិប្បកម្មកែច្នៃឈើគ្មានច្បាប់របស់លោក ក្ដី បានបង់លុយ១ខែចំនួន៤៥ម៉ឺនរៀល ឲ្យទៅផ្នែករដ្ឋបាលព្រៃឈើ ១៥ម៉ឺនរៀលបង់ជូនទៅនាយសង្កាត់រដ្ឋបាលព្រៃឈើដើម្បីបញ្ចៀស និងការពារបង្ក្រាប ។
ជាក់ស្តែងបច្ចុប្បន្នមានរោងសិប្បកម្មកែច្នៃឈើប្រមាណ៣០កន្លែងទៀត កំពុងបើកធ្វើកំពុងដំណើរការដោយគ្មានច្បាប់ទម្លាប់អ្វីបន្តិចទាល់ តែសោះ ហើយសិប្បកម្មកែច្នៃឈើទាំងនោះអាចដំណើរការទៅបានក៏ដោយសារ តែមន្ត្រីរដ្ឋបាលព្រៃឈើជាអ្នកឃុបឃិតបើកដៃឲ្យឈ្មួញ ដោយដោយទទួលបានមកវិញប្រាកសំណូកប្រចាំខែ ពីម្ចាស់សិប្បកម្មល្មើសច្បាប់ប្រមូលលុយចែកគ្នាដាក់ហោប៉ៅល្បីពេញខេត្តមណ្ឌលគិរី តែគេមិនដឹងថាថ្នាក់លើបានដឹងរឿងនេះដែរ ឬយ៉ាងណានោះទេ ទើបគេមិនដែលបានឃើញថ្នាក់លើមានបទបញ្ជាឲ្យមន្ត្រីថ្នាក់ខេត្តនេះដកដៃចេញពីការប្រព្រឹត្តអំពើពុលរលួយនេះ។ លោក អ៊ុក រ៉ាប៊ុន រដ្ឋមន្ត្រីក្រសួងកសិកម្ម និងលោក ឆេង គឹមស៊ុន ប្រតិភូរាជរដ្ឋាភិបាលទទួលបន្ទុករដ្ឋបាលព្រៃឈើ ត្រូវបានបងប្អូជនជាតិនៅខេត្តរតនគិរីថា ចាញ់បោកមន្ត្រីថ្នាក់ក្រោមរាយការណ៍ភូតកុហក់។ តែចំពោះមុខមន្ត្រីរដ្ឋបាលព្រៃឈើខេត្តមណ្ឌលគិរី កំពុងនាំគ្នាដេកភ័យព្រួយខ្លាចតែថ្នាក់លើបញ្ជាឲ្យចុះទៅបង្ក្រាបសិប្បកម្មកែច្នៃឈើគ្មានច្បាប់ទាំងនោះខ្លាំងណាស់ ព្រោះវាប៉ះចំឆ្នាំងបាយ៕ ដោយ ឦសាន២
http://ift.tt/1zWIaTK
