បុរសម្នាក់ស្លាប់ និងម្នាក់ទៀតបាក់ភ្លៅបន្ទាប់ពីជិះម៉ូតូបញ្ច្រាសទិសបុកគ្នាពេញទំហឹង
ខេត្តកណ្តាល៖ បុរសម្នាក់បានស្លាប់ភ្លាមៗនៅកន្លែងកើតហេតុ ចំណែកម្នាក់ទៀត បាក់ភ្លៅ បន្ទាប់ពីជនរងគ្រោះទាំង២នាក់ ជិះម៉ួតូបញ្ច្រាសទិសបុកគ្នាពេញទំហឹងនៅលើកំណាត់ផ្លូវក្រាលកៅស៊ូមួយខ្សែ កាលពីវេលា ម៉ោង២០និង៤០នាទី ថ្ងៃទី២៨ ខែធ្នូ ឆ្នាំ២០១៤ ស្ថិតក្នុងភូមិកំពង់ចម្លង ឃុំកំពង់ចម្លង ស្រុក ខ្សាច់កណ្តាល ខេត្តកណ្តាល ។
មន្ត្រីនគរបាលចរាចរណ៍ស្រុកខ្សាច់កណ្តាលបានឲ្យដឹងថា៖ នៅមុនពេលកើតហេតុបើតាមសាក្សីបានឃើញម៉ូតូម៉ាកហុងដាឌ្រីមធុនសេ១២៥ ស៊េរីឆ្នាំ២០១២ បើកបរតាមបណ្តោយផ្លូវក្រាលកៅស៊ូក្នុងទិសដៅពីត្បូងទៅជើង ខណៈបើកដល់ចំណុចកើតហេតុបានបុកគ្នាជាមួយម៉ូតូម៉ាកហុងដាស៊េរីចាស់ បើកបរបញ្ច្រាសទិសគ្នាពេញមួយទំហឹងនៅលើទ្រូងផ្លូវ បណ្តាលឲ្យភាគីជិះម៉ូតូហុងដាឌ្រីមធុនសេ១២៥រងរបួស ធ្ងន់រហូត បាត់បង់ជីវិតភ្លាមៗនៅកន្លែងកើតហេតុ។ រីឯអ្នកបើកបរម៉ូតូហុងដាធុនសេ១០០រងរបួសបាក់ភ្លៅខាងឆ្វេង ។
ប្រភពដដែលបានបន្តថា ជនរងគ្រោះដែលបាត់បង់ជិវិតឈ្មោះ រឿន ប៊ុនធឿន ភេទប្រុស អាយុ៣២ឆ្នាំ មានទីលំនៅក្នុងភូមិត្បូងដំរី ឃុំកំពង់ចម្លង ស្រុកខ្សាច់កណ្តាល ជាអ្នកបើកបរម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខភ្នំពេញ1BG-4178 ។ ចំណែកឯភាគីរងរបួសបាក់ភ្លៅនោះមានឈ្មោះ សុខ វណ្ណី ភេទប្រុស អាយុ២១ឆ្នាំ មានទីលំនៅក្នុងភូមិកំពង់ចម្លង ឃុំកំពង់ចម្លង ស្រុកខ្សាច់កណ្តាល ជាអ្នកបើកបរម៉ូតូម៉ាកហុងដាស៊េរីចាស់ ធុនសេ១០០ ពណ៌ព្រីងទុំ ពាក់ស្លាកលេខ ច-5342.ភព១ ។
ក្រោយពីមានហេតុការណ៍កើតឡើងជនរងគ្រោះ ដែលរងរបួសធ្ងន់ត្រូវបានរថយន្តសាមុយដឹកបញ្ជូនទៅសង្គ្រោះនៅមន្ទីរពេទ្យក្នុងរាជធានីភ្នំពេញ ។ ចំណែកឯម៉ូតូទាំង២គ្រឿងត្រូវបានសមត្ថកិច្ចនគរបាលជំនាញចរាចរណ៍ ធ្វើកំណត់ហេតុដកហូត យកទៅកាន់អធិការដ្ឋាននគរបាលស្រុកខ្សាច់ កណ្តាលដើម្បីចាត់ការតាមច្បាប់ ។ ដោយឡែកសាកសពជនរងគ្រោះត្រូវបានសមត្ថកិច្ចនគរបាលប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕
