បុរសម្នាក់ស្លាប់ បែករយះធ្លាយពោះចេញថ្លើម និងពោះវៀន ដោយសាររថយន្តមួយបាំងកន្លះបុកពីក្រោយកំពុងជិះម៉ូតូម្នាក់ឯងទៅយកអាគុយ
ខេត្តព្រះសីហនុ ៖ បុរសម្នាក់ស្លាប់ក្នុងសភាពអាណោចអាធ័មដោយបាក់ជើងជាច្រើនកំណាត់ទាំងសងខាង និងបែកពោះធ្លាយចេញថ្លើមពោះវៀនមកក្រៅស្លាប់យ៉ាងវេទនាបំផុត ដោយសារខណៈពេលបុរសរងគ្រោះរូបនោះបានជិះម៉ូតូទៅយកអាគុយត្រូវរថយន្តមួយបាំងកន្លះមិនស្គាល់ម៉ាកបើកស្របទិសគ្នាបុកចំពីក្រោយពេញទំហឹង ហើយកិនពីលើម៉ូតូ និងជនរងគ្រោះ។ គ្រោះថ្នាក់ដ៏រន្ធត់នេះកើតឡើងកាលពីវេលាម៉ោង ៦ និង២០នាទីព្រលប់ ថ្ងៃទី១១ ខែធ្នូ ឆ្នាំ២០១៤ នៅលើកំណាត់ផ្លូវអូរត្រេះក្បែរមាត់សមុទ្រ និងមានចម្ងាយពីផ្ទះជនរងគ្រោះប្រហែល៥០០ម៉ែត្រ ស្ថិតក្នុងក្រុម១ ភូមិ៦ សង្កាត់៤(អូរត្រេះចាស់) ក្រុង-ខេត្តព្រះសីហនុ ។
ប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសរងគ្រោះបានជិះម៉ូតូ ប្រភេទ អាសង់ចិន ធ្វើដំណើរ តាមផ្លូវអូរត្រេះម្នាក់ឯង ក្នុងទិសដៅពីកើតទៅលិច ខណៈមកដល់ចំណុចគ្រោះថ្នាក់ ក៏មានរថយន្តមួយបាំងកន្លះពណ៌ស ពាក់ស្លាកលេខ ភ្នំពេញ 2T 1230 បើកស្របទិសគ្នា បុកហើយកិនពីលើម៉ូតូ និងអ្នកបើក បណ្តាលឲ្យបុរសរងគ្រោះបាក់ជើងទាំងសងខាង បែករយះពោះធ្លាយចេញថ្លើម និងពោះវៀន មកខាងក្រៅស្លាប់ភ្លាមៗ នៅនឹងកន្លែងកើតហេតុ ចំណែករថយន្តបង្កបានបន្ថែមល្បឿនបើកគេចខ្លួនបាត់ស្រមោល ។
ប្រភពពីសមត្ថកិច្ចបានអោយដឹងថា គ្រោះថ្នាក់ចរាចរណ៍បណ្តាលអោយបុរសម្នាក់ឈ្មោះ ម៉ឺង ចយ អាយុ៣៧ឆ្នាំមុខរបរដើរលក់ត្រីតាមផ្ទះ រស់នៅក្នុងក្រុមទី១ ភូមិ៦ សង្កាត់៤(អូរត្រេះចាស់) ក្រុង-ខេត្តព្រះសីហនុ ស្លាប់នៅនឹងកន្លែងកើតហេតុ។ខណៈគាត់បើកបរម៉ូតូ ម៉ាកហុងដាផលិតនៅប្រទេសចិនគ្មានស្លាកលេខលើកំណាត់ផ្លូវអូរត្រេះក្បែរមាត់សមុទ្រ ត្រូវបានរថយន្តមួយគ្រឿងប្រភេទ១បាំងកន្លះពណ៌ស ពាក់ស្លាកលេខភ្នំពេញ 2T 1230 បុកចំពីក្រោយហើយកិនលើជនរងគ្រោះពីលើ។ ភ្លាមនោះម្ចាស់រថយន្តបានរត់គេចខ្លួនបាត់។
ក្រោយកើតហេតុសាកសពជនរងគ្រោះ ត្រូវបានប៉ូលិសចរាចរណ៍ប្រគល់ជូនក្រុមគ្រួសារយកសពយកទៅធ្វើបុណ្យតាមប្រពៃណី ឯម៉ូតូត្រូវបានរក្សាទុកនៅការិយាល័យចរាចរណ៍រងចាំការស៊ើបអង្កេតរកម្ចាស់រថយន្តយកមកដោះស្រាយតាមផ្លូវច្បាប់៕ ដោយ កោះរ៉ុង
