កូនប្រុសអាយុ១៤ និង១៥ឆ្នាំពីរនាក់បងប្អូនបង្កើតលង់ទឹកស្លាប់ ដោយស្រណោះពេកម្តាយឪពុកស្រែកទ្រហោយំស្ទើគាំងបេះដូង
ខេត្តរតនគិរី៖ ក្មេងប្រុសពីរនាក់បងប្អូននឹងបង្កើតត្រូវជា រួមផ្ទៃម្តាយតែមួយបាននាំគ្នាងូតទឹកលេងក្បែរស្រះទឹកស្អាត(តាយសេង) ដែលមានទីតាំងស្ថិតនៅភូមិភ្នំស្វាយ សង្កាត់បឹងកន្សែង ក្រុងបានលុងខេត្តរតនគិរី។ ខណៈចុះទៅហែលលេងក្នុងស្រះនោះ ដោយខ្លួនពុំសូវប្រសប់ក្នុងការហែលទឹកផង នោះ ក៏បានលង់ទឹកស្លាប់ ទាំង២នាក់បងប្អូនបានធ្វើឲ្យអោយឪពុកម្តាយ ព្រមទាំងសាច់ញាតិបងប្អូនទ្រហោយំទួញសោកស្តាយ បោកប្រាណ ដោយក្តីស្រណោះ ខ្លោចចិត្ត ដោយសារបាត់បង់កូនជាទីស្រឡាញ់ទាំងទ្វេ ស្រស់ៗនឹងភ្នែក ដែលមិនគួរកើតឡើងចំពោះពួកគេ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង២ និង៥២នាទីនារសៀលថ្ងៃទី២៦ខែធ្នូ ឆ្នាំ២០១៤ ដែលក្មេងប្រុសលង់ទឹកស្លាប់តែមួយប៉ព្រិចភ្នែក។
តាមប្រភពសាក្សីនៅកន្លែងកើតហេតុបានឃើញហេតុការណ៍តាំងពីដំបូងអោយដឹងថា៖ មុនពេលកើតហេតុឃើញក្មេងប្រុសជាប្អូនត្រូវបានគេស្គាល់ឈ្មោះ វុត សីហា អាយុ១៤ឆ្នាំ ជនជាតិខ្មែរ (ជាសិស្ស) បានចុះទៅហែរទឹកស្រះលេងស្រាប់តែលង់ទឹកស្រវ៉េស្រវ៉ាលើកដៃលើកជើងពុំរួចមុជងើបៗ នៅកណ្តាលស្រះ។ លុះឃើញសភាពមិនស្រួលក្មេងប្រុស ទី២ដែលត្រូវជាបងបង្កើតត្រូវបានគេស្គាល់ឈ្មោះ វុត មករា អាយុ១៥ឆ្នាំ ជនជាតិខ្មែរ (ជាសិស្ស) ក៏ស្រូតលោតចុះទៅក្នុងស្រះដើម្បីជួយប្អូន ប៉ុន្តែអកុសលត្រូវមជ្ជុរាជឆក់យកជីវិតក្មេងប្រុសអភ័ព្វទាំង២នាក់ តែមួយប៉ព្រិចភ្នែកនៅក្នុងស្រះនោះតែម្តង។
ក្មេងប្រុសដ៏គួរឲ្យអាណិតទាំងពីរនាក់បងប្អូនមាន ឪពុកឈ្មោះវុត និងម្តាយឈ្មោះ សារឿន មានទីលំនៅភូមិអូរកន្ទិល សង្កាត់បឹងកន្សែង ក្រុងបានលុង ខេត្តរតនគិរី មានមុខរបរលក់គ្រឿងទេសដ៍ បន្តិបន្តួចនៅមុខផ្ទះ។ ក្រោយពីកើតហេតុ សមត្ថកិច្ចមូលដ្ឋានចុះទៅជួយអន្តរាគមន៍ស្រង់ក្មេងទាំងពីរនាក់ ពីក្នុងទឹកស្រះលើកដាក់លើរថយន្តសាម៉ុយនគរបាលចរាចរណ៍ខេត្តដឹកបញ្ជូនមកលំនៅដ្ឋានផ្ទះជនរងគ្រោះប្រគល់អោយក្រុមគ្រួសារដើម្បីរៀបចំបុណ្យទៅតាមប្រពៃណី៕ ដោយ លី វណ្ណៈ
