លោកតាម្នាក់ កំពុងជិះម៉ូតូឡើងផ្លូវជាតិ ត្រូវឡានបុកចំពេញទំហឹង ស្លាប់ពេលបញ្ជូនដល់មន្ទីរពេទ្យខេត្ត
ខេត្តកំពង់ឆ្នាំង៖ បុរសចំណាស់ម្នាក់ បានស្លាប់ ពេលក្រុមគ្រួសារបញ្ជូនមកដល់មន្ទីរពេទ្យខេត្ត ដោយសារតែ គ្រោះថ្នាក់ចរាចរណ៍ត្រូវរថយន្តបុកជាមួយម៉ូតូកំពុងតែជិះឡើងថ្នល់ជាតិប៉ើងធ្លាក់ពីលើថ្នល់ ហើយបានស្លាប់ពេលបញ្ជូនដល់មន្ទីរពេទ្យខេត្ត។ ហេតុការណ៍នេះបានកើតឡើងនៅវេលាម៉ោង៩ និង១០នាទីថ្ងៃទី២៤ ខែធ្នូ ឆ្នាំ២០១៤ នៅលើកផ្លូវជាតិលេខ៥ចន្លោះគីឡូម៉ែត្រលេខ១០៧ និង១០៨ស្ថិតក្នុងភូមិស្រងាំទេ ឃុំប្រស្នឹប ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលស្រុកចុះពិនិត្យកន្លែងកើតហេតុបាននិយាយអោយដឹងថា៖ បុរសរងគ្រោះក្នុងគ្រោះថ្នាក់នេះមានឈ្មោះ ជឹម ប៉ុន អាយុ៦១ឆ្នាំ រស់នៅក្នុងភូមិស្រះកែវ ឃុំមេលំ ស្រុកបរិបូណ៌ ខេត្តកំពង់ឆ្នាំង ជិះម៉ូតូម៉ាកស៊ីប្រ៊ុស ពណ៌ខ្មៅលាយក្រហមគ្មានស្លាកលេខ បើកបរចេញពីផ្លូវលំមួយកន្លែងមកផ្លូវជាតិ ចំណែករថយន្តបង្កម៉ាកលុចស៊ីស RX-300ពណ៌ស្លែ ពាក់ស្លាកលេខ PP2H-9739 បើកបរដោយបុរសជនជាតិថៃ ដែលមាននាក់ជិះ៦នាក់ ពុំត្រូវបានគេអោយ ស្គាល់ឈ្មោះនោះឡើយបើកបរតាមបណ្តោយផ្លូវជាតិលេខ៥ ទិសដៅពីកើតទៅលិច។
មុនពេលកើតហេតុគេបានឃើញជនរងគ្រោះជិះម៉ូតូចេញពីផ្លូវលំមួយកន្លែងក្នុងទិសដៅពីកើតមកលិចឡើងមកផ្លូវជាតិក៍ត្រូវរថយន្តបុកពេញទំហឹងក្នុងទិសដៅស្របគ្នា បណ្តាលអោយម៉ូតូប៉ើងបោកផ្ទប់និងផ្លូវជាតិហើយរថយន្តអូសម៉ូតូចំងាយប្រមាណជា១០ម៉ែត្រធ្វើអោយបុរសរងគ្រោះរបួសធ្ងន់ ចំណែករថយន្តបានរេចង្កូតមកខាងឆ្វេងដៃធ្លាក់ពីលើផ្លួវជាតិចូលព្រៃ តែមិនធ្វើអោយអ្នកជិះក្នុងរថយន្តមានគ្រោះថ្នាក់ឡើយ។
ក្រោយពេលកើតហេតុអ្នកបើកបរថយន្តទាំងប្តីប្រពន្ធដែលជាជនជាតិខ្មែរ ថៃ បានធ្វើលិខិតធានាទទួលខុសត្រូវ ទៅតាមផ្លូវច្បាប់ដោយមិនបានរត់គេចខ្លួននោះទេ។ ដោយឡែកជនរងគ្រោះ ត្រូវបានកូនចៅដឹកតាមរថយន្តបញ្ជូនទៅ សង្គ្រោះបន្ទាន់នៅមន្ទីរពេទ្យខេត្ត។ ប៉ុន្តែដោយរបួសធ្ងន់ធ្ងរពេកក៏ ស្លាប់ពេលបញ្ជូនដល់មន្ទីរពេទ្យខេត្ត ហើយត្រូវក្រុម គ្រួសារដឹកសពមកកាន់លំនៅដ្ឋានធ្វើបុណ្យដោយក្តីសោកសៅ។
រថយន្តបង្ក និង ម៉ូតូជនរងគ្រោះត្រូវបានសមត្ថកិច្ចស្ទូចដឹកយកមករក្សាទុកនៅក្នុងការិយាល័យនគរបាល ចរាចណ៍ ផ្លូវគោកខេត្ត ដើម្បីដោះស្រាយតាមផ្លូវច្បាប់ ចំណែកម្ចាស់រថយន្តនៅដោះស្រាយមិនបានរត់គេចខ្លួនទៅណាឡើយ ទោះយ៉ាងណានេះជាគំរូល្អដែលពលរដ្ឋគួរមានសេចក្តីក្លាហានក្នុងការទួលខុសត្រូវ ដោយគោរពជនរងគ្រោះ និងច្បាប់៕ ដោយ រិទ្ធិ ជ័យ
