ក្រឡាប់ឡានដឹកឈើ ឈ្មួញ ទូច ចាន់ថុន ហៅ វ៉ា សង្កត់កម្មករស្លាប់ម្នាក់ ខណៈខេត្តសៀមរាបកំពុងផ្ទុះការជួញដូរឈើយ៉ាងអនាធិបតេយ្យ
ខេត្ដសៀមរាប៖ កម្មករស៊ីឈ្នួលលីសែងឈើម្នាក់ឲ្យឈ្មួញឈើ ឈ្មោះ ទូច ចាន់ថុន ហៅវ៉ា ខណៈជិះតាមរថយន្តដឹកឈើបើកក្នុងល្បឿនលឿនដែលគេសង្ស័យថាគេតពីសមត្ថកិច្ចតាមកោសរូសលុយបានក្រឡាប់ធ្លាក់ចូលទឹកស្រះ ធ្វើឲ្យឡាន និងឈើសង្កត់ស្លាប់ភ្លាមៗនៅកន្លែងកើតហេតុយ៉ាងអាណោចអាធ័ម។ ហេតុការណ៍ នេះ កើតឡើងចំណុចអូរបែកតាប់ ស្រុកវ៉ារិន ខេត្ដសៀមរាប កាលពីថ្ងៃទី២៤ ខែធ្នូមកម្លេះ ប៉ុន្ដែទើបបែកធ្លាយព័ត៌មាន បន្ទាប់ពីឈ្មួញឈើរូបនោះ ផ្ដល់លុយកាក់បន្ដិចបន្ទូចលាក់បាំងព័ត៌មាន ហើយនៅព្រឹកថ្ងៃទី២៦ សមត្ថកិច្ចបានអូសយករថយន្ដមករក្សាទុកប៉ុស្ដិ៍រដ្ឋបាលស្រែណូយ។
ប្រភពព័ត៌មានបានឲ្យដឹងថា ជនរងគ្រោះមានឈ្មោះ ភោគ ផៃ អាយុជាង៤០ឆ្នាំ មុខរបរកម្មករលីសែងឈើ រស់នៅភូមិខ្នារសង្កាត់ជ្រាវ ក្រុងសៀមរាប មិនមានប្រពន្ធទេ។ ប្រភពព័ត៌មាន បានឲ្យដឹងបន្ដថា៖ សាកសពជនរងគ្រោះ ត្រូវបានឈ្មួញ ឈើឈ្មោះវ៉ានោះដឹកមកប្រគល់ឲ្យក្រុមគ្រួសារទាំងយប់ ហើយបង្ខំឲ្យសាច់ញាតិធ្វើបុណ្យឲ្យឆាប់ចប់ដោយខ្លាចបែកការ និងបានផ្ដល់លុយឲ្យបន្ដិចបន្ទួចផងដែរ។
ប្រភពបានបន្តដឹងទៀតថា ឈ្មួញឈើ ឈ្មោះ ទូច ចាន់ថុន បានយកក្វកបន្ដិចបន្ទួចញុកមាត់សមត្ថកិច្ច ឬប្រព័ន្ធផ្សព្វផ្សាយ ដើម្បីកុំឲ្យបែកការករណីឡានក្រឡាប់នេះ ប៉ុន្ដែទោះជាយ៉ាងណា ខ្មោចងាប់យកចង្អេរបាំង មិនជិតឡើយ។ ប៉ុន្តែយើងក៏មិនអាចទាក់ទងឈ្មួញឈើសម្លាប់មនុស្ស ឈ្មោះ ទូច ចាន់ថុន ហៅវ៉ា ដើម្បីសុំការបំភ្លឺពីករណីនេះបានទេ ដោយទូរស័ព្ទមិនចូល។
សូមបញ្ជាក់ថា៖ ឈ្មួញឈើពីររូប ឈ្មោះ ទូច ចាន់ថុន ហៅ វ៉ា ជាឈ្មួញឈើដឹកជញ្ជូនឈើ សកម្ម ណាស់នៅក្នុងខេត្ដសៀមរាប ហើយកន្លងមកសមត្ថកិច្ចធ្លាប់ចាប់បានទាំងព្រឹក ខណៈដែលកំពង់ដឹកចូលដេប៉ូលក់ឈើនៅកណ្ដាលក្រុងសៀមរាប។ ប៉ុន្ដែទោះមិនដឹងថាឈ្មួញឈ្មោះវ៉ា នេះមិនរៀងចាលឬមកពីមានការត្រូវរ៉ូវគ្មាជាមួយសមត្ថកិច្ចជាពិសេសជំនាញរដ្ឋបាលព្រៃឈើយ៉ាងណានោះទេ ព្រោះគេឃើញមេឈ្មួញរូបនោះធ្វើសកម្មភាពខ្លាំងជាងមុនទ្វេឡើង។
ប្រភពបានអះអាងថា៖ សព្វថ្ងៃនេះខេត្ដសៀមរាប ត្រូវក្រុមឈ្មួញបទល្មើសព្រៃឈើ កំពុងធ្វើសកម្មភាពយ៉ាងគគ្រឹកគ្រែងទាំងយប់ទាំងថ្ងៃ ដោយក្នុងមួយថ្ងៃៗមិនក្រោមពីរាប់រយរថយន្ដឡើយដែលនេះជាបទល្មើសយ៉ាងអនាធិបតេយ្យបំផុត ដោយសារតែសមត្ថកិច្ច និងមន្ដ្រីជំនាញរដ្ឋបាលព្រៃឈើខេត្តមួយនេះ បានយកឥទ្ធិពល និងអំណាចរបស់ខ្លួនអង្គុយចាំទទួលសំណូកពីពួកឈ្មួញប្រមូលលុយច្រកហោប៉ៅរៀងៗខ្លួនដោយលែងខ្លាចថ្នាក់លើ សូម្បីតែអង្គភាពប្រឆាំងអំពើពុករលួយមកដល់ម៉ោងនេះពួកមន្ត្រីឆ្លៀតឱកាសទាំងនោះទំនងជាគិតថា លែងឆោតល្ងង់ជាមួយនឹងការបន្លាចបំភ័យអ្វីទាំងនោះទៀតហើយ៕
