កុមារាអាយុ១៣ឆ្នាំម្នាក់ រត់ចោលជីដូនជិះកង់ផ្សងព្រេងពីកំពង់ឆ្នាំងទៅរកឪពុកមានប្រពន្ធចុង នៅខេត្តពោធិសាត់
ខេត្តកំពង់ឆ្នាំង៖ កុមារាអាយុ១៣ឆ្នាំម្នាក់ បានបាត់ពីផ្ទះ១យប់២ថ្ងៃធ្វើអោយជីដូនចាស់ភ័យព្រួយយំទន់ខ្លួនព្រោះតែមិនដឹងជាចៅប្រុសជាទីស្រឡាញ់ទៅទីណា ឬមិនដឹងមានគ្រោះថ្នាក់ឡើយ និងបានទៅប្តឹសមត្ថកិច្ចនគរបាលរដ្ឋបាលជ្រៃបាក់ទាំងយប់នៅថ្ងៃទី២៦ ខែធ្នូ ឆ្នាំ២០១៤ អោយជួយរក ។
លោកយាយ ជុំ សុភាព អាយុ៦០ឆ្នាំ ដែលត្រូវជាជីដូនកុមារាដែលបាត់ខ្លួនបានអោយដឹងនៅព្រឹកថ្ងៃទី២៧ ខែធ្នូ ឆ្នាំ២០១៤នេះថា៖ ចៅប្រុសរបស់គាត់មានឈ្មោះ ណយ ណេន អាយុ១៣ឆ្នាំ ជាសិស្សរៀនថ្នាក់ទី៨រៀននៅសាលាវិទ្យាល័យ ប៊ុន រ៉ានីហ៊ុនសែន រលារប្អៀរត្បូង ។ ម្តាយរបស់គេឈ្មោះ ណាក់ ស៊ីយ៉ន អាយុ៣៤ឆ្នាំ បច្ចុប្បន្ននៅធ្វើការឯប្រទេសម៉ាឡេស៊ី ចំណែកចៅប្រុស នេះរស់នៅជា មួយលោកយាយ នៅក្នុងភូមិជ្រៃបាក់ ឃុំជ្រៃបាក់ ស្រុករលារប្អៀរ តាំងពីម្តាយរបស់គេទៅធ្វើការនៅប្រទេសម៉ាឡេស៊ី ឃ្លាតឆ្ងាយអស់រយៈពេល៤ឆ្នាំហើយ ជាអកុសលឪពុករបស់គេបានមានប្រពន្ធចុងទៅឃ្លាតឆ្ងាយរូបគេថែមទៀតដែលធ្វើឲ្យគេចេះតែសង្វេក។
មុនថ្ងៃដែលគេចេញពីផ្ទះគឺពុំមាននណារករឿង ឬក៏ស្តីបន្ទោះអោយគេឡើយ ។ គឺគេ ជីះកង់ស្ពាយសៀវភៅទៅរៀននៅព្រឹកថ្ងៃទី២៦ ខែធ្នូ ឆ្នាំ២០១៤ ជាធម្មតាដូចរាល់ថ្ងៃ លុះយប់ឡើងមិនឃើញចៅរបស់គាត់ត្រឡប់មកផ្ទះវិញ ទើបមានការឆោឡោឡើង ខ្លះដើរកអ្នកខ្លះទៀតទៅប្តឹងសមត្ថកិច្ចអោយជួយរកទាំងយប់។
នៅរសៀលថ្ងៃទី២៧ ខែធ្នូ ឆ្នាំ២០១៤នេះ សមត្ថកិច្ចបានអោយដឹងថា៖ កុមារាដែល បាត់ពីផ្ទះត្រូវសមត្ថកិច្ចឃាត់ទុកនៅឯស្រុកក្រគរខេត្តពោធិសាត់ ព្រោះពេលនោះក្រុមប្រជាការពាឃុំឃើញកុមារារូបនេះជិះកង់តែម្នាក់ឯងកណ្តាលយប់អាធ្រាត ទើបប្រជាការពារឃាត់សួរនាំដឹងរឿងក៏នាំទៅដេកនៅប៉ុស្តិ៍នគរបាលឈើតុំ១យប់ លុះព្រឹកឡើងថ្ងៃទី២៧ ខែធ្នូនេះសមត្ថកិច្ចខេត្តពោធិសាត់បានធ្វើការ ទំនាក់ទំនងជាមួយសមត្ថកិច្ចខេត្តកំពង់ឆ្នាំង ទើបលោកយាយទៅទទួលយកត្រឡប់មកផ្ទះវិញ ដោយមាន លោកសំ សុខា នាយប៉ុស្តិ៍នគរបាល ឃុំជ្រៃបាក់ជូនទៅទទួលយកមកជូនលោកយាយវិញ។
នៅពេលជួបគ្នាជីដូនបានឱបចៅទាំងទឹកភ្នែក ហើយនៅចំពោះមុខក្រុមគ្រួសារកុមារា រូបនេះបានសារភាពថាខ្លួនពិតជាបានលួចរត់ចេញ ពីផ្ទះពិតមែន ព្រោះតែរូបគេនឹកណាស់ចង់ទៅរកឪពុករបស់គេដែលមានប្រពន្ធ១ទៀតនៅក្នុងខេត្តពោធិសាត់ តែគេមិនបានស្គាល់ថាឪពុករបស់គេរស់នៅក្នុងភូមិអីឃុំអីនោះទេគឺជិះកង់ផ្សងព្រេងរកទាំងទាំងគ្មានដំណឹង៕ ដោយ រិទ្ធិ ជ័យ
