បុរសម្នាក់កំពុងជិះម៉ូតូត្រូវម៉ូតូមួយគ្រឿងទៀតបុកពីក្រោយ របួសបែកប្រអប់ជើង
ខេត្តកំពង់ឆ្នាំង៖ បុរសជាកម្មករអង្គការចៃការម្នាក់បានរងរបួសបែកប្រអប់ជើងខាងស្តាំ ខណៈដែលជនរងគ្រោះ កំពុងជិះម៉ូតូទៅទទួលប្រពន្ធនៅរោងចក្រ M.V ចេញពីធ្វើការ ត្រូវម៉ូតូមួយគ្រឿងទៀតបុកពីក្រោយដួលច្រងាប់ច្រងិលទាំងសង្ខាង ហើយម៉ូតូបង្កនោះបានលើកម៉ូតូបើករត់គេចខ្លួនបាត់។ ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៥ និង១៥នាទី ល្ងាចថ្ងៃទី៣១ ខែធ្នូ ឆ្នាំ២០១៤ លើផ្លូវក្រាលកៅស៊ូក្នុងខេត្ត ស្ថិតក្នុងភូមិធម្មយុត្តិ សង្កាត់កំពង់ឆ្នាំង ក្រុងកំពង់ឆ្នាំង ។
សមត្ថកិច្ចនគរបាលចរាចរណ៍ក្រុងកំពង់ឆ្នាំង បាននិយាយថា៖ ជនរងគ្រោះមានឈ្មោះ ឯម សុភាព អាយុ៣៣ឆ្នាំ មានទីលំនៅ ភូមិស្មែត ឃុំស្វាយជ្រុំ ស្រុករលាប្អៀរ ជាកម្មករជួសជុលផ្លូវរបស់អង្គការចៃការ ជិះម៉ូតូ ម៉ាកឌ្រីម ១២៥ ពណ៌ខ្មៅពាក់ស្លាកលេខ កំពង់ឆ្នាំង 1C.9829 ។ ចំណែកភាគីម្ខាងទៀតដែលបង្កក្រោយពេលកើតហេតុបានគេចខ្លួនបាត់ ប៉ុន្តែគេបានស្គាល់លេខម៉ូតូគឺ កំពង់ឆ្នាំង1D. 0891 ។
សមត្ថកិច្ចបានអោយដឹងទៀតថា៖ មុនពេលកើតហេតុ ជនរងគ្រោះបានជិះម៉ូតូតាមផ្លូវក្រាលកៅស៊ូពីជើងទៅត្បូង លុះមកដល់ចំណុចកើតហេតុ ស្រាប់តែមានម៉ូតូបង្ករបានជិះម៉ូតូមកបំរុងវ៉ា តែវ៉ាមិនផុតក៏បុកពីក្រោយបណ្តាលអោយជនរងគ្រោះដួលម៉ូតូអូសជាង៥ម៉ែត្រ រងរបួសបែកលើប្រអប់ជើងស្តាំជាទម្ងន់ចំណែកភាគបង្ក បានលើកម៉ូតូហើយបើកគេចខ្លួនបាត់ ។
នៅកន្លែងកើតហេតុ មន្ត្រីនគរបាលបានយកម៉ូតូជនរងគ្រោះមករក្សាទុកនៅអធិការដ្ឋាននគរបាល ក្រុងកំពង់ឆ្នាំង និងបានយកជនរងគ្រោះទៅមន្ទីរពេទ្យខេត្ត ដើម្បីព្យាបាលរបួស។ មន្ត្រីនគរបាលរើសបាន ទូរស័ព្ទដៃជនបង្កមួយគ្រឿងអាចថានឹងស្រាវជ្រាវរកភាគីម្ខាងទៀតមកដោះស្រាយគ្នាតាមនិតិវិធីច្បាប់ជាមួយជនរងគ្រោះ៕ ដោយ រិទ្ធិ ជ័យ
