ផ្ទះមួយចំនួនសង់រំលោភផ្លូវសាធារណៈ ក្រៅតែពីតុលាការខេត្តកាត់ឲ្យឈ្នះក្តី អាជ្ញាធរ មូលដ្ឋ និងមន្ទីរជំនាញកំពុងទម្លាក់កាទទួលខុសត្រូវ
ខេត្តកំពង់ឆ្នាំង៖ នៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តអាណត្តិទី២ នៅក្នុងសាលាក្រុងកំពង់ឆ្នាំង ប្រជាពលរដ្ឋបានដាក់លិខិតសាកសួរ និងសំណូមពរដល់លោកអភិបាលខេត្តជួយដោះស្រាយ ករណីសាងសង់ផ្ទះរំលោភយកដីផ្លូវសាធារណៈក្នុងភូមិ ដែលករណីនេះមន្ត្រីជំនាញ និងអាជ្ញាធរមួយចំនួនមិនព្រមធ្វើការដោះស្រាយជូនប្រជាពលរដ្ឋ ហើយកំហុសនោះមើលទៅឃើញក្រឡែតនឹងភ្នែក។
នៅក្នុងលិខិតសំណូមពរ និងតាមសំណូមពរផ្ទាល់មាត់ជាមួយអ្នកសាព័ត៌មានយើង បាន អោយដឹងថា៖ ផ្ទះដែលសាងសង់រំលោភយកដីផ្លូវសាធារណៈនោះគឺ៖ ទី១.ផ្ទះថ្មមន្ត្រីសាលាខេត្តម្នាក់ ដែលកំពុងសាងសង់ជិតរួចទៅហើយ ស្ថិតនៅកែងផ្លូវកៅស៊ូ និងផ្លូវលំខាងលិចស្ពានថ្ម ក្នុងភូមិផ្សារលើ ដែលគេសង់រំលោភយកដីផ្លូវ នៅជ្រុងខាងក្រោយផ្ទះប្រមាណជាង២ម៉ែត្រ, ទី២.ផ្ទះជនជាតិវៀតណាមនៅទល់មុខផ្ទះខាងលើនេះជាប់ស្ពានថ្ម កំពុងសង់សំយ៉ាប និងបានធ្វើរបងដែករំលោភយកផ្លូវថ្នល់ជាប់បង្កាន់ដៃស្ពានថ្ម, ទី៣.ផ្ទះថ្ម ចំណុចផ្លូវ លំទី២ខាងស្តាំដៃ បានសាងសង់ផ្ទះថ្មដោយវេរ៉ង់ដារំលោភលើផ្លូវលំ ករណីផ្ទះ នេះប្រជាពលរដ្ឋជាច្រើនគ្រួសារបានប្តឹងទៅតុលាការ តែត្រូវបានលោកចៅក្រមជំនុំជំរះម្នាក់កាត់អោយភាគីម្ចាស់ផ្ទះឈ្នះក្តីទៅវិញ។ បញ្ហានេះប្រជាពលរដ្ឋបានដាក់បណ្តឹងបន្ត ទៅសាលាឧទ្ទរណ៍មិនទាន់ដឹងលទ្ធផលនៅឡើយ, និង ទី៤.តូបលក់ដូរចាស់មួយខ្នងដែលបានសង់លើផ្លូវលំទល់មុខច្រកចូលខាងជើងមន្ទីរកសិកម្មខេត្ត ក្នុងភូមិទី១ សង្កាត់ខ្សាមទុកចោលកណ្តាលផ្លូវជច្រើនឆ្នាំមកហើយ ដែលធ្វើអោយប៉ះពាល់ដល់ការធ្វើចរាចរណ៍របស់ប្រជាពលរដ្ឋ។
ទាក់ទង និងបញ្ហាខាងលើនេះ លោកអភិបាលបានប្រតិកម្មលើកឡើងនៅក្នុងវេទិកា ផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកាលពីថ្ងៃ១៧ ខែធ្នូ ឆ្នាំ២០១៤ថា៖ លោកក៍មិនយល់ដែរពីការកាត់ក្តី របស់លោកចៅក្រមម្នាក់នោះ គេសង់ផ្ទះថ្មបញ្ចេញវេរ៉ង់ដារំលោភលើផ្លូវសាធារណៈ បែជាឈ្នះក្តីទៅវិញ? ប៉ុន្តែបញ្ហានេះក៍ជាការខុសឆ្គងរបស់មន្ទីរជំនាញ និងអាជ្ញាធរផងដែរដែលបានអនុញាតអោយគេសាងសង់។ ដោយឡែកករណីផ្ទះ ថ្មមួយល្វែងទៀតក៍ជាកំហុសរបស់មន្ទីរជំនាញ និងអាជ្ញាធរផងដែរ ដែលនេះជាការលំបាកក្នុងការដោះស្រាយ ព្រោះសំណង់ទាំងនោះសាងសង់រួចរាល់ហើយ។
លោកអភិបាលខេត្តបានសំណូមពរផងដែរ ដល់អាជ្ញាធរ មន្ទីរជំនាញ ត្រូវតែពិនិត្យទីតាំងសាងសង់អោយបានច្បាស់លាស់មុននឹងអនុញាតអោយគេសាងសង់ កុំដល់មានបញ្ហារុញអោយអាជ្ញាធរខេត្តដោះស្រាយ ការពិតគឺមន្ទីរជំនាញ និងអាជ្ញាធរមូលដ្ឋានគឺជា អ្នកទទួលខុសត្រូវចំពោះមុខច្បាប់ និងប្រជាពលរដ្ឋ។ ទោះយ៉ាងណាមានប្រជាពលរដ្ឋខ្លះបានខ្សឹបប្រាប់ថា បញ្ហានេះកើតចេញពីការធូររលង់ផង និងការទទួលលាភសក្ការៈពីម្ចាស់សំណង់ផងទើបម្ចាស់សំណង់ធ្វើឡើងបានតាមទំនើងចិត្ត៕ ដោយ រិទ្ធិ ជ័យ
