លោក ឡឹង សុភាព មេគយទំនប់រលកបន្តសម្រួលឲ្យក្រុមឈ្មួញនាំចូលទំនិញនិងម៉ូតូស៊េរីទំនើបៗបង់ពន្ធមិនគ្រប់ប្រមូលលុយច្រកហោប៉ៅធ្វើមានធ្វើបានផ្ទាល់ខ្លួន
ខេត្តព្រះសីហនុ ៖ ទំនិញដែលពួកឈ្មួញនាំចូលពីប្រទេសជិតខាងឡើងតាមច្រក ទំនប់រលកមិនសូវដាច់មកជាបន្តបន្ទាប់មានគ្រឿងសំណង់ដូចជាឥដ្ឋការ៉ូ ដូចជាស៊ីម៉ង់ត៍ត្រាក្រពើ គ្រឿងអេឡិកត្រូនិកអីវ៉ាន់ចាប់ហួយ ហើយជាពិសេសថ្មីៗនេះមានការលួចបន្លំនាំចូល ម៉ូតូសេរីទំនើបៗ ម៉ាកស្កូបពី ស៊េរីឆ្នាំ២០១២,២០១៣ និង២០១៤ ឈ្មួញកំពុងសម្រុកនាំចូល ដែលភាគច្រើនម៉ូតូទាំងនោះ និងគ្រឿសំណង់ បង់ពន្ធជូនរដ្ឋ មិនគ្រប់ចំនួននោះទេ ដោយសារតែ មេឈ្មួញធំៗ ជាច្រើននាក់ ទទួលបានការជួយសម្រួលគ្រប់ពេលវេលាពី លោកមេគយ ឡឹង សុភាព ប៉ុន្តែជាថ្នូរនឹងការសម្របសម្រួលនោះ លោកមេគយក៏បានបង្គាប់ឲ្យបង់ប្រាក់ក្រោមតុដើម្បីប្រមូលច្រកហោប៉ៅមិនធម្មតាដែរ ស្របនឹងពេលរូបគាត់ជិតចូលនិវត្តន៍នោះទៀត។
ប្រភពបានបង្ហើបឲ្យដឹងថា៖ នៅកំពង់ផែទំនប់រលកក្រៅតែឈ្មួញនាំចូលគ្រឿងសំណង់ ដែលច្រើនជាងគេគឺស៊ីម៉ង់ត៍នោះ នារយៈចុងក្រោយនេះមានការនាំចូល ម៉ូតូម៉ាកទំនើបៗ មានម៉ាកស្កូបពី និងម៉ាកផ្សេងៗយ៉ាងគំហុក។ គេឃើញមានការនាំចូលតាមច្រកនោះដោយមិនដែលឃើញមានការអាក់ខានឡើយ គឺក្នុង១ខែៗមានចំនួនរាប់ពាន់គ្រឿងឯណោះ តែមិនបានបង់ពន្ធគ្រប់ចំនួននោះទេ។ ករណីនេះសូម្បីតែ លោក យ៉ឹក យូ ប្រធានសាខាគយ និងរដ្ឋាករខេត្តព្រះសីហនុ ក៏បានដឹងរឿងនេះយ៉ាងច្បាស់ដែរ តែបានធ្វើមិនដឹងមិនឮហាក់ដូចជាគ្មានរឿងអ្វីកើតឡើងនៅទីនោះ តែមិនច្បាស់ថាលោក យ៉ឹក យូ គ្មានការពាក់ព័ន្ធការនាំទំនិញចូលមិនប្រក្រតី ក្រោមការចាត់ចែង របស់ លោក ឡឹង សុភាពនោះ។
ម៉ូតូម៉ាកទំនើបៗដែល គេប្រើមួយទឹកទៅហើយនោះកំពុងពេញនិយមរបស់យុវវ័យកម្ពុជា ត្រូវបាននាំចូលពីប្រទេសថៃ តាមផែទំនប់រលក ក្នុងមួយខែៗ មិនក្រោមចំនួនរាប់ពាន់គ្រឿងទេ ដោយមេឈ្មួញដឹកតាមរថយន្តកុងតឺន័រ ឆ្ពោះមកកាន់រាជធានីភ្នំពេញ និងលក់បោះដុំទៅតាម បណ្តាខេត្តមួយចំនួន សូម្បីតែខេត្តព្រះសីហនុ ក៏មានម៉ូតូប្រភេទគ្មានពន្ធនេះលក់ដែរ។ បើតាមការឲ្យដឹងពីប្រជាពលរដ្ឋតម្លៃលក់រាយនៅលើទីផ្សារ ម៉ូតូស្កូបពី ស៊េរីឆ្នាំ២០១៣ មួយគ្រឿថ្លៃ ១១០០ដុល្លារ និងស៊េរីឆ្នាំ២០១៤ មួយគ្រឿថ្លៃ១២០០ដុល្លារ(គ្មានពន្ធ) ដែលជាតម្លៃទាបគួរសមធ្វើឲ្យងាយលក់ចេញ។ ហើយបានធ្វើឲ្យសម្ទុះការនាំចូលកាន់តែមមារញឹក ដែលលោកមេគយ ឡឹង សុភាព សប្បាយកើបលុយ។
ទោះយ៉ាងណា អ្វីដែលគួរឲ្យកត់សម្គាល់ និងសោកស្តាយបំផុតនោះ គឺថវិកាជាតិរាប់សិបលានរៀល ត្រូវបានបាត់បង់ ដោយសារតែកានាំចូលម៉ូតូសេរីទំនើប និងនាំគ្រឿងសំណង់ដោយមិនមានការបង់ពន្ធត្រឹមត្រូវនោះ ដោយឮថាបង់ពន្ធបានតែ៣០ភាករយតែប៉ុណ្ណោះ។ មានការឆ្ងល់ថា លោក គុណ ញឹម អគ្គនាយក នៃអគ្គនាយកគយ និងរដ្ឋាករកម្ពុជា ទំនងមិនទាន់ជ្រាបរឿងនេះទេមើលទៅ ទោះយ៉ាងណាគេចង់ឃើញលោក គុណ ញឹម គួរបោសសំអាតដោយលុបបំបាត់ភាពមិនប្រក្រតីដែលជាអំពើពុករលួយក្នុងការប្រមូលពន្ធនៅផែទំនប់រលក ៕ ដោយ កោះរ៉ុង
