មនុស្ស៤នាក់រងរបូស ដោយសារកំពុងជិះរ៉ឺម៉កម៉ូតូ ត្រូវរថយន្តពាក់ស្លាកលេខរដ្ឋ បុក ចំពីមុខពេញទំហឹង
ខេត្តកំពង់ឆ្នាំង៖ មនុស្សចំនួន៤នាក់បានរងរបួសធ្ងន់ និងស្រាល ក្នុងករណីគ្រោះថ្នាក់ចរាចរណ៍រថយន្តប្រភេទ២កឹប បុកម៉ូតូរ៉ឺម៉កពេញទំហឹង ក្នុងទិសដៅបញ្ច្រាសគ្នា ហើយរថយន្តបង្ករបានគេចបាត់។ហេតុការណ៍នេះបានកើតឡើងនៅវេលាម៉ោង ៦និង៥៥នាទីយប់ថ្ងៃទី០១ ខែធ្នូ ឆ្នាំ២០១៥ នៅតាមផ្លូវក្រាលកៅស៊ូក្នុងខេត្តមុខសាលានយោបាយ ស្ថិតក្នុង ភូមិឡទឹកត្រី សង្កាត់កំពង់ឆ្នាំង ក្រុងកំពង់ឆ្នាំង ។
សមត្ថកិច្ចនគរបាលក្រុងកំពង់ឆ្នាំងបានអោយថា៖ ជនរងគ្រោះទាំង៤នាក់មាន៖ ១.ឈ្មោះ ឯក ដារ៉ាម អាយុ១៨ឆ្នាំមានទីលំនៅ ភូមិម៉ុងបារាំង សង្កាត់ប្អេរ ក្រុងកំពង់ឆ្នាំង របួសបាក់ដៃឆ្វេង និងជើងស្តាំធ្ងន់ ឈ្មោះនេះជាអ្នកបើកម៉ូតូអូសរ៉ឺម៉ក ២.ឈ្មោះផន វីរៈ អាយុ១៨ឆ្នាំ នៅភូមិដំណាក់ពពូល សង្កាត់កំពង់ឆ្នាំង របួសធ្ងន់ ៣.ឈ្មោះ ហង្ស ចំរើន អាយុ ១៩ឆ្នាំ និង៤ឈ្មោះ ពុំ សារ៉ាត់ អាយុ១៨ឆ្នាំ ទាំង២នាក់នៅស្រុកកំពង់លែង រងរបួសស្រាល ។ ពួកគេទាំង៤នាក់ជិះម៉ូតូអូសរ៉ឺម៉ក ម៉ាកឌ្រីម ១២៥ ពាក់ស្លាកលេខ ភ្នំពេញ1AV-2663 ចំណែកភាគីរថយន្តបង្កដែលគេចខ្លួនបាត់ដោយបន្សល់ទុករថយន្តប្រភេទ២កឹប ពណ៌ស ពាក់ស្លាកលេខ រដ្ឋ.7088 នៅនឹងកន្លែងកើតហេតុ។
ប្រភពដដែលបានបន្តថា៖ មុនពេលកើតហេតុ ជនរងគ្រោះទាំង៤នាក់បានជិៈម៉ូតូសណ្តោងម៉ក ក្នុងដំណើរពីត្បូងទៅជើង ស្រាប់មកដល់ចំណុចកើតហេតុមានរថយន្ត ខាងលើបើកមកពីជើងទៅត្បូង ក្នុងទិសច្រាស់គ្នា បានបុកម៉ូតូជនរងគ្រោះយ៉ាងពេញទំហឹង បណ្តាលអោយខ្ទេចម៉ូតូមួយកំណាត់មុខនិងមនុស្សទាំង៤នាក់រួមទាំងអ្នកបើកបរម៉ូតូផងបានរងរបួសធ្ងន់ និងស្រាលរណូករណែលលើថ្នល់ ចំណែករថយន្តបង្កក្រោយកើតហេតុបានបើកគេចទៅទិសខាងត្បូងបាត់ទៅ ។
ជនរងគ្រោះទាំង៤នាក់ ត្រូវបានមន្ត្រីនគរបាលខេត្ត ហៅរថយន្តសង្គ្រោះ ដឹកទៅមន្ទីរពេទ្យខេត្ត ចំណែកម៉ូតូ និងរ៉ឺម៉កត្រូវបានដឹកយកទៅរក្សាទុកនៅអធិការដ្ឋាន នគរបាលក្រុងកំពង់ឆ្នាំងដើម្បីរង់ចាំ ការស្រាវជ្រាវរកម្ចាស់រថយន្តបង្កអោយមកទទួលខុសត្រូវចំពោះមុខច្បាប់ ប៉ុន្តែប្រហែលជាពិតបាករកបន្តិចហើយ បើគេមិនចង់ទទួលខុសត្រូវនោះ៕ ដោយ រិទ្ធិ ជ័យ
