ម៉ូតូបុកម៉ូតូ ពេញទំហឹងបណ្តាលមនុស្ស២នាក់រងរបួសធ្ងន់ទាំងសងខាង
ខេត្តបន្ទាយមានជ័យ៖ ហេតុការណ៍គ្រោះរវាងម៉ូតូនឹងម៉ូតូបើកបញ្ច្រាសទិសគ្នា ហើយបានបុកពេញទំហឹងបណ្តាលអ្នកបើក បរទាំងសងខាងរងរបួសធ្ងន់ ត្រូវបានសមត្ថកិច្ចនគរបាលក្រុងប៉ោយប៉ែតបញ្ជូនទៅសង្គ្រោះនៅឯមន្ទីរពេទ្យបង្អែកប៉ោយប៉ែត ទាន់ពេលវេលាផុតពីសេចក្តីស្លាប់ទាំងសងខាង។ ហេតុការនេះនៅតាមបណ្តាលផ្លូវជាតិលេខ៥ ចំណុចមុខបូរីសាន ស៊ានហូរនៅវេលាម៉ោង១០និង៣៥នាទីយប់ ថ្ងៃទី៩ ខែមករា ឆ្នាំ២០១៥ ស្ថិតនៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
បើតាមប្រភពសាក្សីពីសមត្ថកិច្ចបានឲ្យដឹងថា មុនកើតហេតុគេឃើញម៉ូតូបង្កមានម៉ាកហុងដាឃ្លីច សេ១២៥ ស៊េរីឆ្នាំ២០១១ ពណ៌ខ្មៅ ក្រហម អត់ស្លាកលេខ បានបើកបរពីកើតទៅលិចយ៉ាងលឿន ស្រាប់តែមកដល់ចំណុចកើតហេតុ ទៅបុកម៉ូតូម៉ាកហុងដាវ៉េវ សេ១១០ ស៊េរីឆ្នាំ ២០១០ ពណ៌ស ពាក់ស្លាកលេខ បន្ទាយមានជ័យ 2A-2478 បើកបរយឺតៗ ច្រាសទិសគ្នា ពេញទំហឹងបណ្តាលឲ្យអ្នកបើកបរទាំងសងខាងរងរបួសធ្ងន់តែម្តង ។
ក្រោយពីកើតហេតុគេឃើញមានសមត្ថកិច្ចនគរបាលក្រុងប៉ោយប៉ែតចុះអន្តរាគមន៍ រថយន្តសង្គ្រោះបន្ទាន់ របស់អង្គការកាំម៉ា និងវាស់វែងចំណុចកើតហេតុនិងបញ្ជូនម្ចាស់ម៉ូតូបង្ក និងម្ចាស់ម៉ូតូរងគ្រោះទៅកាន់មន្ទីរពេទ្យបង្អែកប៉ោយប៉ែត និងស្រាវជ្រាវរកក្រុមគ្រួសារសាច់ញាតិផងដែរ ។
លោកអ៊ុំ សុផលអធិការដ្ឋាននគរបាលក្រុងប៉ោយប៉ែតបានអោយដឹងនៅព្រឹកថ្ងៃទី ៩ ខែមករា ឆ្នាំ២០១៥នេះថា ម្ចាស់ម៉ូតូហុងដាវ៉េវរងគ្រោះមានឈ្មោះ ឈុំ ធី ភេទប្រុស អាយុ៥៣ឆ្នាំ មុខរបអាជីករ មានលំនៅដ្ឋានភូមិក្បាលស្ពាន២ សង្កាត់-ក្រុងប៉ោយប៉ែត រងរបួសធ្ងន់ ចំណែកឯម្ចាស់ម៉ូតូបង្កមានឈ្មោះ អ៊ុក សារិទ្ធ ភេទប្រុស អាយុ៣៦ឆ្នាំ មុខរបកម្មករ មានលំនៅដ្ឋានភូមិក្បាលស្ពាន១ សង្កាត់-ក្រុងប៉ោយប៉ែត រងរបួសធ្ងន់ ។
បច្ចុប្បន្នសមត្ថកិច្ចបានយកម៉ូតូបង្ក និងម៉ូតូរងគ្រោះ ទៅរក្សាទុកនៅអធិការដ្ឋាននគរបាលក្រុងប៉ោយប៉ែត ដើម្បីរងចាំការដើស្រាយគ្នាចំពោះមុខច្បាប់តាមនិតិវិធីច្បាប់៕ ដោយយីហាំង
