ក្រុមហ៊ុនមួយរត់ច្បាប់មិនទាន់បានរួចរាល់ផង ប្រកាសរើសពលករទៅធ្វើការក្រៅប្រទេស ទៅហើយ លោកអភិបាលខេត្តថា ខុសច្បាប់
ខេត្តកំពង់ឆ្នាំង៖ សមត្ថកិច្ចនគរបាលក្រុង និងខេត្តរួមទាំងអាជ្ញាធរមូលដ្ឋានផងដែរនៅព្រឹកថ្ងៃទី២០ ខែមករា ឆ្នាំ២០១៥ បានចុះទៅពិនិត្យមើលទីតាំងក្រុមហ៊ុន រើសពលករទៅក្រៅប្រទេសមួយកន្លែងដោយសារតែបានដឹងថា មិនទាន់មានច្បាប់អនុញ្ញាតត្រឹមត្រូវផង ស្រាប់តែបានលើកស្លាកប្រកាសរើសពលករទៅក្រៅប្រទេសទៅហើយ ដោយមិនបានដាក់ឈ្មោះក្រុមហ៊ុននោះអោយបានត្រឹមត្រូវទៀតផង ដែលក្រុមហ៊ុមនេះស្ថិតក្នុង ភូមិ ម៉ុងបារាំង សង្កាត់ប្អេរ ក្រុងកំពង់ឆ្នាំង។
ជួបជាមួយសមត្ថកិច្ចជាជំហ៊ានដំបូង អ្នកគ្រូឈ្មោះ អៀង សំណាង ដែលតំណាងអោយក្រុមហ៊ុន បាន ប្រាប់សមត្ថកិច្ចអោយដឹងថា៖ ក្រុមហ៊ុនគឺមានច្បាប់ត្រឹមត្រូវ តែច្បាប់នោះកំពុងស្ថិតនៅដៃលោកអភិ បាល រងខេត្តមួយរូបកំពុងដាក់ជូន លោកអភិបាលខេត្តសម្រេច។ ពេលនោះសមត្ថកិច្ចបានបញ្ជាក់ថា៖ បើមិនទាន់មានច្បាប់ត្រឹមត្រូវទេ សូមកុំទាន់ដាក់ស្លាករើសពលករទៅក្រៅប្រទេសបែបនេះអី ព្រោះវាខុសច្បាប់។ បន្ទាប់មកគេឃើញមានលោកអភិបាលរងក្រុងកំពង់ឆ្នាំងម្នាក់ដែលទើបឡើងកាន់តំណែងថ្មី បានកាន់ច្បាប់មកបង្ហាញ ហើយពេលសមត្ថកិច្ចពិនិត្យមើលគឺមានភាពមិនប្រក្រតីជាច្រើន ។
លោក កេត យ៉ុង នាយនគរបាលការិយាល័យការពារផ្លូវច្បាប់បាននិយាយថាៈ ក្នុងពាក្យស្នើសុំ របស់ ឈ្មោះ ឯល រ៉ូហ្សែត ដែលដាក់ថាជាអគ្គនាយកក្រុមហ៊ុន I I S (អាយ អាយ អេស ) តែដល់អ្នកមក ឈរ ឈ្មោះរើសពលករ គឺជាអ្នកគ្រូ អៀងសំណាងនៃមជ្ឈមណ្ឌល R T C ខេត្តកំពង់ឆ្នាំងទៅវិញ ។ ចំណែក ក្នុងច្បាប់ស្នើសុំឃើញមាន ចុះហត្ថលេខាដោយ លោកមេភូមិ លោកមេឃុំ អភិបាលក្រុង និង ដោយឡែកលោក ប្រធានមន្ទីរការងារខេត្ត ដែលចុះហត្ថលេខាដោយលោក ពៅ ស៊ីថា វិញគឺទើបនិង ចុះថ្ងៃទី២០ ខែមករា ឆ្នាំ២០១៥ នេះទេ ចំណែកកាលបរិច្ឆេតថ្ងៃទី២០ ក៏មានស្នាមកោសលុបសរសេរ សាថ្មីដែរ ឯកន្លែងដែលឯកឧត្តមអភិបាលខេត្ត ចុះហត្ថលេខាគឺមិនទាន់បានចុះហត្ថលេខានៅឡើយទេ។
នៅក្នុងករណីសមត្ថកិច្ចលើកឡើងថាៈ ត្រឹមថ្ងៃទី២០ ខែមករា អ្នករត់ការច្បាប់ទើបរត់ដល់ត្រឹម លោក ប្រធានមន្ទីរការងារនៅឡើយតែអាជ្ញាធរមូលដ្ឋានប្រាប់ថា៖ កែឃើញស្នាក់ការខាងលើនេះបានលើក ស្លាកតាំងពីថ្ងៃទី១៥ខែមករាឆ្នាំ២០១៥មកម្លេះ ដែលរឿងនេះជារឿងកូនកើតមុនឪហើយ ទើបគេ ថាគ្មាន ច្បាប់ត្រឹមត្រូវ។ #សមត្ថកិច្ចបានអោយដឹងទៀតថា៖ស្លាកជ្រើសរើសពលករពលការនីមិនបានដាក់បញ្ជាក់ថា ក្រុមហ៊ុនអីនោះទេ បើសិនដាក់ថា ក្រុមហ៊ុន អាយ អាយ អេស ឬ មជ្ឈមណ្ឌល អ័រ ធី ស៊ី អោយច្បាស់លាស់ក៏មិនថាដែរ គឺបានដាក់ថាក្រុមហ៊ុនត្រូវការជ្រើសរើសពលករជាបន្ទាន់ទៅធ្វើការនៅ ប្រទេសម៉ាឡេស៊ី ថៃ ជប៉ុន និងគុយវ៉ែត តែប៉ុណ្ណោះ។
សមត្ថកិច្ចបានបញ្ជាក់ប្រាប់ក្រុមហ៊ុនខាងលើនេះថា៖ បើមិនទាន់មានចុះហត្ថលេខាពី លោក អភិបាលខេត្តទេ សុំអោយក្រុមហ៊ុនទម្លាក់ស្លាកបណ្តោះអាសន្នសិន ចាំពេលមានច្បាប់ត្រឹមត្រូវចាំលើក ស្លាកជ្រើសរើសវិញចុះក៏មិនហួសពេលដែរ ។ នៅពេលប្រមាណជាងមួយម៉ោងក្រោយមកគេបានឃើញ លោកអភិបាលរងខេត្តមួយរូបបានអញ្ជើញមកសម្រួលជាមួយសមត្ថកិច្ចដោយមិនស្រឡាញ់កិតិ្តយសអីទេមើលទៅ ដោយនិយាយថា៖ ឯកឧត្តមអភិបាលខេត្តរវល់សុំអោយបន្តក្រុមហ៊ុន លើកស្លាកជ្រើសរើសពលករនោះបន្តទៀតសិនទៅ។នេះគឺជាវប្បធម៌អន្តរាគមខុខរឿងមិនចេះអៀនខ្មាស់មិនគួរយកគំរូទេ។
លោក ឈួរ ចន្ទ័ឌឿន អភិបាលខេត្តកំពង់ឆ្នាំង បានមានប្រសាសន៍ថា៖ លោកមិនបានជ្រាបរឿង នេះទេ លោកប្រាប់ថាបើខ្ញុំមិនទាន់យល់ព្រមផងធ្វើបែបនេះគឺខុសនឹងច្បាប់ហើយ លោកនឹងអោយ គេទៅពិនិត្យមើលសិន លោកអគុណចំពោះអ្នកកាសែតហើយដែលផ្តល់ដំណឹងនេះ៕ ដោយ រិទ្ធិ ជ័យ
