ជំនាញចម្រុះចុះពិនិត្យទីតាំងផលិតទូកបាឡាជ័រ ឬស្មាច់៣កន្លែងនៅស្រុកបរិបូណ៌
ខេត្តកំពង់ឆ្នាំង៖ យោងតាមបញ្ជាររបស់លោក ឈួរ ច័ន្ទឌឿន អភិបាលខេត្តកំពង់ឆ្នាំង ចុះថៃ្ងទី៩ ខែមករា ឆ្នាំ២០១៥អោយមន្ទីរព័ត៌មាន មន្ទីរទំនាក់ទំនងជាមួយរដ្ឋសភាព្រឹទ្ធសភានិងអធិការកិច្ច មន្ទីរបរិស្ថាន ស្នងការនគរបាលខេត្ត មន្ទីរឧស្សហកម្ម និងសិប្បកម្ម និងអាជ្ញាធរដែនដី ហើយរួមគ្នាចុះពិនិត្យ សិប្បកម្ម ទាំង៣កន្លែង នៅស្រុកបរិបូណ៌ និងពិនិត្យពិភាក្សាបើមានផលប៉ះពាល់ និងកំហុសបច្ចេកទេសសុំអោយ ជំនាញធ្វើការណែនាំ និងកែលំអរកុំអោយខុសឆ្គងប៉ះពាល់សុខមាលភាពប្រជាពលរដ្ឋ។
ក្រោយពីបានទទួលចំណាររបស់លោក អភិបាលខេត្តកំពង់ឆ្នាំងគណៈកម្មការ នេះដឹកនាំដោយលោក ម៉មឈឿម ប្រធានមន្ទីរព័ត៌មានខេត្ត បានចុះពិនិត្យ និងប្រជុំណែនាំដល់ម្ចាស់ទីតាំងផលិតទូកបាឡាជ័រ ឬស្មាច់ទាំង៣នៅស្រុកបរិបូណ៌ គឺ៖ ត្រូវគោរពតាមច្បាប់និងកិច្ចសន្យារបស់ជំនាញបានកំណត់។ ទីតាំងត្រូវហ៊ុំព័ទ្ធអោយបានត្រឹមត្រូវមានកង្ហារប៊ឺតខ្យល់ឡើងលើមិនមានការជះក្លិនមកទៅខាងក្រៅធ្វើអោយប៉ះពាល់ដល់បរិស្ថាន និងមានកង្ហារសំរាប់អោយកម្មករកម្មការីនីកំពុងបំរើការងារទៀតផង។
ចំពោះកាកសំណល់ត្រូវវិចខ្ចប់អោយបានត្រឹមត្រូវមិនត្រូវដុតកាកឬកប់សំណល់នៅកន្លែងផលិត និងត្រូវដឹកយកទៅចោលរណ្តៅសំរាមរបស់ស្រុក។ កម្មករកម្មការីនីពេលបំរើការងារត្រូវពាក់ម៉ាស់ការពារធ្វើយ៉ាងណាកុំអោយប៉ះពាល់ដល់សុខភាព។ ក្នុងនោះដែរគណៈកម្មការបានទុករយៈពេលចាប់ថៃ្ងប្រជុំទី១៤ខែមករាឆ្នាំ២០១៥ អោយម្ចាស់ទីតាំងផលិតទូកបាឡាជ័រ ឬស្មាច់អនុវត្តអោយបាននូវដំណាច់ខែមករានេះ។
នៅព្រឹកថៃ្ងទី២ ខែកុម្ភៈ ឆ្នាំ២០១៥ ដើម្បីត្រួតពិនិត្យការងារឡើងវិញលោក ម៉ម ឈឿម ប្រធានមន្ទីរ ព័ត៌មានខេត្តរួមដំណើរដោយលោក ម៉ម ម៉ៅ អនុប្រធានមន្ទីរអធិការកិច្ចខេត្តមន្ត្រីស្រុក ភ្នាក់ទូរទស្សន៍ អប្សរានិងភ្នាក់ងារសារព័ត៌មានដើមអំពិលបានចុះពិនិត្យដល់ទីតាំងឃើញថា៖ ម្ចាស់ទីតាំងផលិត ទូក បាឡាជ័រទាំងបីបានគោរពតាមការណែនាំរបស់គណៈកម្មការ ធ្វើស្ថានភាពនៅកន្លែងផលិត ទាំងបី មានលក្ខណៈល្អប្រសើរជាងមុខ។
ចំណាត់ការរបស់គណៈកម្មការតាមចំណាររបស់លោក ឈួរ ច័ន្ទឌឿន អភិបាលខេត្តដែលដឹកនាំអនុវត្ត ដោយលោក ម៉ម ឈឿម ប្រធានមន្ទីរព័ត៌មានខេត្ត ត្រូវបានប្រជាពលរដ្ឋក្នុងស្រុកបរិបូណ៌បានទទួល អបអរសារទរ និងកោតសរសើរ ដែលគណៈកម្មការនេះអនុវត្តទៅទទួលបានលទ្ធផលល្អ មានប្រសិទ្ធិភាពតម្លាភាពជូនលោក អភិបាលខេត្ត។
មានប្រសាសន៍ក្នុងឱកាសនោះលោកម៉មឈឿមបានណែនាំដល់ម្ចាស់ទីតាំងផលិតទូកបាឡាជ័រទាំង៣បន្ថែមទៀតថា៖សូមអោយអនុវត្តបានត្រឹមត្រូវតាមលក្ខណៈបច្ចេសកទេសដូចពេលនេះរហូតកុំអោយអនុវត្តបានតែមួយរយៈពេលគណៈកម្មការចុះពិនិត្យនោះ។ លោក ម៉ម ឈឿម ក៏បានណែនាំដល់កម្មករកម្ម ការីនីកំពុងផលិតថា៖ សុំអោយពាក់ម៉ាស់អោយបានទាំងអស់គ្នាពេលបំរើការងារ ដើម្បីជៀសវាងការឈឺថ្កាត់ ប៉ះពាល់ដល់សុខភាព ធ្វើអោយយើងខាតបង់ពេលវេលា និងខាតបង់ថវិកាដោយការមិនប្រុងប្រយ័ត្នរបស់យើងខ្លួនឯង៕ ដោយ រិទ្ធិ ជ័យ
