រថយន្តនីសាន់បុកកុមារជិះកង់ម្នាក់ ចំពីក្រោយប៉ើងហោះទៅបោកលើកញ្ចក់រថយន្តរងរបួស ឃើញសភាពមិនស្រួលបានបើករថយន្តរត់ ហើយបន្តចុះរត់គេខ្លួនបាត់
ខេត្តកំពង់ឆ្នាំង៖ កុមារាជាសិស្សសាលាម្នាក់បានរងរបួសមធ្យម ក្នុងករណីគ្រោះថ្នាក់ចរាចរណ៍មួយដោយសាររថយន្តបុកកង់គេពីក្រោយហោះប៉ើងទៅបោកនឹងកញ្ចក់រថយន្ត រួចធ្លាក់មកដី។ ហេតុការណ៍នេះបានកើតឡើងនៅវេលាម៉ោង១ និង១៥នាទី ថ្ងៃទី១១ ខែកុម្ភៈ ឆ្នាំ២០១៥ លើផ្លូវជាតិលេខ៥ ក្នុងភូមិឡទឹកត្រី សង្កាត់កំពង់ឆ្នាំង ក្រុងកំពង់ឆ្នាំង។
ប្រជាពលរដ្ឋដែលបានឃើញហេតុការណ៍នេះបានអោយដឹងថា៖ មុនពេលកើហេតុកុមារា រងគ្រោះឈ្នោះ សំណាង វតនា អាយុ១៤ឆ្នាំ រស់នៅភូមិត្រពាំងចឹកសារ សង្កាត់កំពង់ឆ្នាំង ក្រុង កំពង់ឆ្នាំង គេបានជិះកង់ចេញពីរៀនគួរពីជើងទៅត្បូង ពេលដល់ចំណុចកើតហេតុក៏ត្រូវរថយន្ត ម៉ាកនីសាន់ពណ៌ស្ករ ពាក់ស្លាកលេខ បាត់ដំបង 3A-6861 ដឹកអង្ករ១គ្រឿងបើកបរក្នុងទិស ស្របគ្នា បុកពីក្រោយពេញទំហឹង ប៉ើងកង់ និងមនុស្សផ្លោងហោះបុកនឹងកញ្ចក់រថយន្តបណ្តាលអោយកុមាររងគ្រោះរងរបួសមធ្យមក្រោកដើរមិនរួច ហើយត្រូវបានរថយន្តសាម៉ុយដឹកបញ្ជូនទៅសង្គ្រោះព្យាលបាលនៅក្នុងមន្ទីរពេទ្យខេត្តកំពង់ឆ្នាំង។
ក្រោយពេលកើតហេតុរថយន្តបង្កបានបន្ថែមល្បឿនទៅមុខបើកគេចពីការទទួលខុសត្រូវបាន ប្រមាណជាង២គីឡូម៉ែត្រ ត្រូវបានសមត្ថកិច្ចតាមទាន់ស្ទាក់ចាប់បាននៅមុខហាងការ៉ាអូខេហ្គោ ឌិនស៊ីធី ពេលនោះអ្នកបើកបររថយន្តបានចុះដាក់មេផាយទៅបាត់នៅសល់តែព្រូម្នាក់ ហើយសមត្ថកិច្ចនគរបាលចរាចរណ៍ក្រុងកំពង់ឆ្នាំង បញ្ចូនរថយន្តនិងព្រូ មកកាន់អធិការដ្ឋានក្រុង កំពង់ឆ្នាំងកសាងសំណុំរឿងតាមផ្លូវច្បាប់។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានអោយដឹងថា៖ នៅល្ងាចថ្ងៃទី១១ ខែកុម្ភៈ ឆ្នាំ២០១៥ ភាគីឪពុកកុមារារងគ្រោះជាមន្ត្រីនគរបាលខេត្ត បានសម្របសម្រួលយល់ ព្រម ទទួលយកប្រាក់ចំនួនមួយលានរៀលពីភាគីរថយន្តបញ្ចប់រឿង និងដើម្បីយកប្រាក់នេះទៅព្យា លបាលរបួសកូនព្រោះក្រុមគ្រួសារគាត់ខ្វះខាតពុំសូវមានប្រាក់ឡើយ។
ការសម្របសម្រួលទទួលយកប្រាក់ប៉ុណ្ណឹងត្រូវបានគេរិះគន់ថា៖ ជាការទទួលយកលឿនពេក ព្រោះថាព្រោះសភាពរបួសកូនមិនទាន់អាចសន្និដ្ឋានថាមិនអីទេភ្លាមៗបានឡើយ ចង់មិន ចង់ការព្យាលរបួសកូនប្រាកដជាអស់ប្រាក់ច្រើនជាងនេះ៕ ដោយ រិទ្ធិ ជ័យ