ក្រុមកម្មករប្រមាណ២០០នាក់ របស់ក្រុមហ៊ុនសុខហ្វីន(បារាំង) ផ្ទុះការតវ៉ាតម្លើងប្រាក់ខែ ខណៈភាគីក្រុមហ៊ុនទម្លាក់ប្រាក់ខែពួកគេ
ខេត្តមណ្ឌលគិរី៖ ក្រុមកម្មកររបស់ក្រុមហ៊ុនសុខហ្វីន(បារាំង) ប្រមាណ២០០នាក់ នៅស្រុកពេជ្រាដា បានផ្ទុះការតវ៉ាទាមទារតម្លើងប្រាក់ឈ្នួលប្រចាំថ្ងៃ និងប្រាក់ខែ ។ ការតវ៉ានេះបានធ្វើឡើងអស់រយៈពេល៣ថ្ងៃមកហើយ តែពុំមានការឆ្លើយពីក្រុមហ៊ុនខាងលើនេះឡើយ។ ហើយករណីផ្ទុះការតវ៉ានេះបានចាប់ផ្តើមតាំងពីថ្ងៃទី០៩ រហូតមកដល់ថ្ងៃទី១១ មីនា ២០១៥ ដោយធ្វើឡើងនៅមុខក្រុមហ៊ុនមានទីតាំងក្នុងឃុំ ប៊ូស្រា ស្រុកពេជ្រាដា ខេត្តមណ្ឌលគិរី ។
បងប្អូនក្រុមកម្មកររាប់រយនាក់ ខ្លះបានវិចខ្ចប់បាយចំណីមកហូបនៅមុខក្រុមហ៊ុន ដើម្បី ធ្វើការទាមទារសូមឲ្យក្រុមហ៊ុន យល់ព្រមធ្វើការតម្លើងប្រាក់ឈ្នួលប្រចាំថ្ងៃ សម្រាប់កម្មករម្នាក់ចាប់ពី ២៥.០០០រៀល ទៅ៣០.០០០រៀល ក្នុងមួយថ្ងៃ ។ ពួកគាត់បាននាំគ្នាសម្ដែងនូវការខឹងសម្បារដល់ក្រុមហ៊ុនសុខហ្វីន ដែលជាក្រុមហ៊ុនបារាំងវិនិយោគដំណាំកៅស៊ូ ថាកាលពីឆ្នាំដំបូងក្រុមហ៊ុន បានឲ្យប្រាក់ឈ្មួលក្នុងមួយថ្ងៃ២៥.០០០រៀល តែមកដល់ពេលនេះក្រុមហ៊ុនមិនបានតម្លើងប្រាក់ឈ្មួលឲ្យកម្មករទេ បែរជាទម្លាក់ប្រាក់ ឈ្នួលប្រចាំថ្ងៃមកត្រឹម២០.០០០រៀលទៅវិញក្នុងមួយថ្ងៃ ។ រីឯបុគ្គលិក កម្មករដែលបម្រើការងារក្នុងក្រុមហ៊ុននេះ គឺខាងក្រុមហ៊ុន ចង់ដក ឬបញ្ឈប់ ស្រេចតាមតែចិត្តរបស់ក្រុមហ៊ុន មិនបានគោរពច្បាប់ការងារឡើយ ។
នៅមានចំណុចជាច្រើនរបស់ក្រុមហ៊ុនដែលធ្វើមិនគប្បីមកលើបុគ្គលិក កម្មករ ពោលគឺខាងក្រុមហ៊ុនបានប្រើប្រាស់ ពាក្យសម្ដី និងអាកប្បកិរិយាមិនសមរម្យមកលើកម្មករ ដោយក្រុមហ៊ុនបានមើលងាយ ប្រមាថមកលើបុគ្គលិក-កម្មករ ខ្មែរ ប្រៀបបានទៅនឹងសត្វ ដូចជាខាងក្រុមហ៊ុនបុកកម្មករខ្មែរម្នាក់ឲ្យរងរបួសកាលពីដើមខែកុម្ភៈ ឆ្នាំ២០១៥ របួស ដៃម្ខាង រួចហើយបុគ្គលិកក្រុមហ៊ុនជាជនជាតិ បរទេសបានពោលពាក្យថា បើទោះស្លាប់កម្មករខ្មែរ ៣នាក់ក៏មិនស្មើ សត្វឆ្កែគាត់មួយក្បាលផង ។
ក្រុមបុគ្គលិក-កម្មកររបស់ក្រុមហ៊ុន បានលើកឡើងនូវបញ្ហាប្រឈមជាមួយក្រុមហ៊ុនជាច្រើនចំណុច ក្នុងនោះបញ្ហា ប្រឈម សំខាន់មាន៣ចំណុច ទី១គឺពួកគាត់ចង់បានប្រាក់ឈ្នួលប្រចាំថ្ងៃចាប់ពី២៥.០០០រៀល ទៅ៣០.០០០រៀល ទី២គឺសណូមពរទៅ ក្រុមហ៊ុនកុំបញ្ឈប់បុគ្គលិក-កម្មករ តាមតែអំពើចិត្ត ទី៣គឺសូមឲ្យក្រុមហ៊ុនកុំមើលងាយ និង ប្រមាថ ដល់កម្មករខ្មែរ ។ តែបើទោះបីជា ពួកគាត់ធ្វើការតវ៉ាទាមទា រយៈពេល៣ថ្ងៃមកហើយនោះ ប៉ុន្តែនូវពុំទាន់បាន ឃើញវត្តមានរបស់តំណាងក្រុមហ៊ុនចេញមកចរចានៅ ឡើយ ។ ពួកគាត់បានទាមទាអោយខាងក្រុមហ៊ុន សូមធ្វើការ គោរពច្បាប់របស់ព្រះរាជាណាចក្រកម្ពុជាផង តួយ៉ាងគ្រាដែលបងប្អូន កម្មករមានធុរៈចាំបាច់នៅពេលឈប់សម្រាក់ ម្ដងៗ ខាងក្រុមហ៊ុនតែងតែហែកលិខិតចោល ។
តំណាង NGO ខេត្តមណ្ឌលគិរី លោក សម សារិន បានថ្លែងប្រាប់អ្នកព័ត៌មាននៅរសៀលថ្ងៃទី១១ មីនា ២០១៥ នេះថា ការទាមទាតវ៉ារបស់ បងប្អូនបុគ្គលិក-កម្មករ គឺជារឿងត្រឹមត្រូវរបស់គាត់ ព្រោះផ្អែកទៅលើច្បាប់ការងាររបស់ ព្រះរាជាណាចក្រកម្ពុជា ។
ទាក់ទិននឹងការផ្ទុះការតវ៉ារវាងកម្មករជាមួយក្រុមហ៊ុននេះផងដែរ លោក ប៉ុក ប៉េងឈុន តំណាងក្រុមហ៊ុនសុខហ្វីន អ្នកឆ្លើយ ឆ្លងព័ត៌មានយើងបានព្យាយាមសុំការបំភ្លឺពីលោកដែរ នៅរសៀលថ្ងៃទី១១ មីនា ២០១៥ តាមទូរស័ព្ទ ប៉ុន្តែ លោកពុំបានធ្វើអត្ថាធិប្បា យវែងឆ្ងាយទេទាក់ទិននឹងបញ្ហានេះ ដោយលោកថារវល់រៀបចំឯកសារចូលប្រជុំ ដោះ ស្រាយ ជាមួយក្រុមការងារ ។
លោក និន កុសល់ មន្ត្រីដោះស្រាយវិវាទសហភាពការងារកម្ពុជាបានប្រាប់អ្នកឆ្លើយឆ្លងព័ត៌មានយើងថា បើទោះ បីជាខាង ក្រុមហ៊ុន នៅរសៀលថ្ងៃទី១១ មីនា ២០១៥នេះ បានចូលរួមប្រជុំដោះស្រាយជាមួយក្រុមហ៊ុន មន្ត្រីជំនាញ នឹងអជ្ញាធរស្រុក ប៉ុន្តែ លោកនៅតែយល់ឃើញថា ខាងក្រុមហ៊ុននៅតែគ្មានចេតនាក្នុងការដោះស្រាយ ។
ជុំវិញករណីនេះផងដែរ លោក នូយ ស្រូន ប្រធានមន្ទីរការងារខេត្តមណ្ឌលគិរី នៅរសៀលថ្ងៃទី១១ មីនា ២០១៥នេះ លោក សង្ឃឹមថា ការសម្របសម្រួលក្នុងបញ្ហានេះអាចឈានទៅរកការជោគជ័យច្រើនជាងបរាជ័យ ៕ ដោយឦសាន២
http://ift.tt/1MuIVnk
