ស្ទាវភេទប្រុស៥នាក់ ចែកចាយប្រើប្រាសគ្រឿងញៀន និងអូសទាញពង្វក់ក្មេងស្រីម្នាក់ឲ្យប្រើប្រាស់ដែរនោះ ត្រូវចាប់ខ្លួនបញ្ជូនទៅតុលាការ
ខេត្តបន្ទាយមានជ័យ៖ កម្លាំងកងរាជអាវុធហត្ថខេត្ត បានឃាត់ស្ទាវភេទប្រុស៥នាក់ ដែលមានជំនាញពេញៗខ្លួនប្រើប្រាស់គ្រឿងញៀន និងតាំងជាគ្រូបង្វឹក ពង្វក់ក្មេងស្រីម្នាក់ៗអោយប្រើប្រាស់ដែរដើម្បីពួកគេបានសប្បាយត្រេកត្រអាលនឹងថ្នាំញៀននោះ ។ ហេតុការណ៍ឃាត់ខ្លួននោះបានធ្វើឡើងកាលពីព្រឹកថ្ងៃទី០៦ ខែមេសា ឆ្នាំ២០១៥នេះ បន្ទាប់ពីមន្ត្រីកងរាជអាវុធហត្ថខេត្ត ទទួលពាក្យបណ្តឹងពីបងប្អូនក្មេងស្រីរងគ្រោះសុំជួយអន្តរាគមន៍ ។
លោកឧត្តមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យបានឲ្យដឹងនៅថ្ងៃទី០៦នេះថា ក្រោយពីទទួលបានពាក្យបណ្តឹងពីបងប្អូនក្មេងស្រីរងគ្រោះឈ្មោះ ឡ ស អ អាយុ ២០ឆ្នាំ មានទីលំនៅបណ្តោះអាសន្ន ក្នុងភូមិគោរដ្ឋាន សង្កាត់អូរអំបិលក្រុងសិរីសោភ័ណដោយចោទថា ក្មេងប្រុស៥នាក់បានអូសទាញអោយប្អូនស្រីរបស់ខ្លួនប្រើប្រាស់ថ្នាំញៀនរហូតដល់យក ម៉ូតូខ្សែក និងទ្រព្យសម្បត្តិជាច្រើនទៅលក់ដើម្បីយកលុយទៅទិញគ្រឿងញៀនប្រើប្រាស់ ។
លោកឧត្តមសេនីយ៍បានឲ្យដឹងថា យុវជនដែលបានឃាត់ខ្លួនទាំង៥នាក់នោះមាន ១-ឈ្មោះ ជា ណារី ២-ឈ្មោះ ពៅ ពិសី ៣-ឈ្មោះ ពៅពិសិដ្ឋ ៤-ឈ្មោះ សួន សុណៃ ៥-ឈ្មោះ លន់វាសនា ពួកគេត្រូវបញ្ជូនខ្លួនឡើងតុលាការ ចំណែកក្មេងស្រីរងគ្រោះឈ្មោះ ឡ ស អ បញ្ជូនទៅមណ្ឌលកែប្រែ។
លោកឧត្តមសេនីយ៍ត្រី ឱ បូរិន្ទ បានបញ្ជាក់បន្ថែមថា ក្នុងពេលឃាត់ខ្លួនយុវជន និងយុវតីខាងលើ សមត្ថកិច្ចបានរកឃើញ វត្ថុតាងល្មើសមានឧបករណ៍សម្រាប់សេពគ្រឿងញៀនមួយចំនួន និងរថយន្តម៉ាកតូយ៉ូតា ឡង់គ្រីស័រ ១គ្រឿង ពណ៌បៃតងចាស់ពាក់ស្លាកលេខ 2K-0995 ហើយជនទាំងនេះជាមុខសញ្ញាជួញដូរ ចែកចាយ និងប្រើប្រាស់គ្រឿងញៀន។ មកដល់ពេល នេះ សមត្ថកិច្ចកងរាជអាវុធហត្ថ បានសាងសំណំរឿងចំពោះជនទាំងអស់ខាងលើ បញ្ជូនខ្លួនរួចហើយទៅតុលាការខេត្ត ដើម្បីចាត់ ការតាម ច្បាប់៕ ដោយ យុវតីក្រុងប៉ោយប៉ែត
http://ift.tt/1Daevpn
