ប្រជាពលរដ្ឋខេត្តបន្ទាយ មានជ័យ អះអាងថា ភ្នំធំជិតរលាយហើយ
បន្ទាយមានជ័យ៖ ប្រជាពលរដ្ឋរស់នៅក្នុងខេត្តបន្ទាយមានជ័យ អះអាងថា ភ្នំធំដែលស្ថិត នៅក្នុងឃុំអូរប្រាសាទ ស្រុកមង្គលបុរី ខេត្តបន្ទាយមានជ័យ ត្រូវបានគេមើលឃើញថានៅពេល បច្ចុប្បន្ននេះ កំពុងតែ រងការជីកកកាយយកថ្មលក់យ៉ាង រង្គាលពីសំណាក់ក្រុមឈ្មួញ ។
ប្រជាពលរដ្ឋ លើកឡើងថា សកម្ម ភាពនៃការធ្វើអាជីវកម្មភ្នំធំប្រសិន បើអាជ្ញាធរខេត្ដនិងក្រសួងពាក់ព័ន្ធមិនបានទប់ស្កាត់ទាន់ពេលវេលានោះទេ ពួក គាត់ព្យាករថានៅពេលប៉ុន្មានឆ្នាំខាងមុខ ភ្នំនេះនឹងបាត់រូបរាងចេញពីផែនទីនៃ ប្រទេសកម្ពុជាហើយធ្វើឱ្យកូនចៅជំនាន់ក្រោយបានត្រឹមតែឮឈ្មោះប៉ុណ្ណោះ ចំណែករូបរាងកាយភ្នំត្រូវបានរលាយ សាបសូន្យ ។ ការធ្វើអាជីវកម្មជីក កកាយយកថ្មភ្នំធំនេះ ធ្វើឱ្យប្រជាពល រដ្ឋរស់នៅក្នុងខេត្ដបន្ទាយមានជ័យក៏ដូចជាភ្ញៀវទេសចរជាតិនិងអន្ដរជាតិ ដែល ធ្វើដំណើរឆ្លងកាត់ខេត្ដបន្ទាយមានជ័យ មើលឃើញសកម្មភាពនោះនាំគ្នាសោកស្ដាយចំពោះការបាត់បង់ភ្នំធម្មជាតិមួយនេះ ។
ប្រជាពលរដ្ឋ បានប្រាប់ឱ្យដឹងថានៅ លើភ្នំធំនោះមានល្អាងក្រមថ្មភ្ជាប់រឿង ប្រវត្ដិសាស្ដ្រដូចជាល្អាងកី ល្អាងគោយំ ល្អាងថ្មស្រក់និងមានល្អាងមួយចំនួនទៀត ដែលជាទីតាំងសម្រាប់ឱ្យប្រជាពលរដ្ឋ ចូលលេងកម្សាន្ដផងដែរ ។ ជាងនេះ ទៅទៀតជារៀងរាល់ថ្ងៃសីលគេឃើញ មានលោកយាយលោកតាជាអ្នកជឿ ជាក់លើព្រះពុទ្ធសាសនាតែងតែបាន នាំគ្នាឡើងទៅលើភ្នំដើម្បីធ្វើសមាធិ ។ បច្ចុប្បន្នលោកយាយលោកតាទាំងនោះ ក៏មានការត្អូញត្អែរ ព្រោះតែលំបាករក ផ្លូវឡើងទៅលើភ្នំធំដោយសារក្រុមហ៊ុន គេធ្វើអាជីវកម្មបិទផ្លូវនោះហើយ ។
សកម្មភាពនៃការធ្វើអាជីវកម្មថ្មភ្នំធំក៏ត្រូវបានរងការរិះគន់ពីប្រជាពលរដ្ឋ ដែលរងផលប៉ះពាល់ជារៀងរាលថ្ងៃបង្កឱ្យហុយកម្ទេចថ្មប៉ះលើប្រជាពលរដ្ឋការដឹកជញ្ជូនថ្មនិងការបំផ្ទុះយកថ្មភ្នំលាន់ឮ សំឡេងកក្រើកភូមិ ហើយប្រជាពលរដ្ឋ លើកឡើងទៀតថា កន្លងមកការបំផ្ទុះ យកថ្មរបស់ក្រុមហ៊ុននោះដែរបណ្ដាលឱ្យដុំថ្មផ្លោងខ្ទាតបង្កឱ្យត្រូវរបួស និង ស្លាប់ប្រជាពលរដ្ឋរស់នៅក្បែរនោះ ទៀតផង ។
មន្ដ្រីអាជ្ញា ធរដែនដីនិងសមត្ថកិច្ច ប្រាប់ឱ្យដឹងថា ក្រុមហ៊ុនដែលកំពុងតែធ្វើអាជីវកម្មថ្មភ្នំធំ មានចំនួន៥ក្រុមហ៊ុនគឺ៖ ១-ក្រុមហ៊ុន ណុប ទូច ,២-ក្រុមហ៊ុន អិដ្ឋ លឿ , ៣-ក្រុមហ៊ុន យ៉ែម សារឿន ,៤-ក្រុមហ៊ុនកូ ណៃ និង ៥-ក្រុមហ៊ុនជីផូស្វាត ជាក្រុម ហ៊ុនរបស់ជនជាតិថៃ ។ ក្រុមហ៊ុនទាំង៥ នេះ បើតាមការបង្ហើបឱ្យដឹងពីមន្ដ្រី សាលាខេត្ដគឺមានក្រុមហ៊ុនខ្លះចប់អាជ្ញាប័ណ្ណហើយក៏ប៉ុន្ដែនៅតែបន្ដសកម្មភាព ជាដដែល ។
ជុំវិញការធ្វើអាជីវកម្មថ្មភ្នំធំនេះ អ្នកយកព័ត៌មានយើងបានទំនាក់ទំនង លោកសុខ វឌ្ឍនា ប្រធានមន្ទីររ៉ែនិង ថាមពលខេត្ដឱ្យជួយបំភ្លឺពីបញ្ហានេះ ប៉ុន្ដែទូរស័ព្ទរបស់លោកហៅចូល៣លើកគ្មានការឆ្លើយតបទេ ៕
http://ift.tt/1Gvpg8v
