ឪពុក និងកូនប្រុស២នាក់ កំពុងជិះម៉ូតូត្រូវឡានដឹកដីបើកបុកទាំងកំរោល ហើយកិនពីលើស្លាប់ខ្ទេចសាកសព
ខេត្តព្រៃវែង ៖ ហេតុការណ៍គ្រោះថ្នាក់ចរាចរណ៍ដ៏រន្ធត់ ដោយបុរសជាឪពុក និងក្មេងប្រុស២នាក់ បានស្លាប់យ៉ាងអាណោចអាធ័មបំផុត ខណៈកំពុងជិះម៉ូតូត្រូវបាន ឡានបែនដឹកដីបើកបុកពេញទំហឹងទាំងកំរោល ហើយកិនពីលើដែលធ្វើឲ្យសាកសពបែករយះរយាយ ធ្វើឲ្យជនរងគ្រោះស្លាប់នៅនឹងកន្លែង កាលពីវេលាម៉ោង១១ព្រឹកថ្ងៃទី១០ មេសា ឆ្នាំ២០១៥នេះ នៅលើកំណាត់ផ្លូវជាតិលេខ១ ខាងកើតស្ពានស្ទឹងស្លូតត្រង់បឹងក្រចាប់ ស្ថិតក្នុងភូមិក្រាំងក្អុក ឃុំកំពង់សឹង ស្រុកព្រះស្ដេច ខេត្តព្រៃវែង ។
តាមប្រភពព័ត៌មានពីនៅកន្លែងកើតហេតុបានឲ្យដឹងថា ជនរងគ្រោះ ៣នាក់ ឪពុកកូន ជិះម៉ូតូសេ១២៥ ស៊េរីឆ្នាំ២០០៧ បើកមកពីលិចទៅកើត ខណៈពេលជិះមកដល់ចំណុចកើតហេតុស្រាប់តែ មានឡានបែនដឹកដី១គ្រឿង បានបើកយ៉ាងលឿនចេញពីកន្លែងចាក់ដី ឡើងមកថ្នល់ជាតិ ក៏បុកម៉ូតូដែលកំពុងតែជិះផ្លូវត្រង់យ៉ាងពេញទំហឹងកិនពីលើ ជនរងគ្រោះទាំង៣នាក់ នោះបណ្តាលឲ្យបែកលលាដ៍ក្បាល បែកប្លោក នោម បាក់ឆ្អឹង ស្លាប់មួយរំពេច ។ បន្ទាប់ពីបង្កឲ្យមនុស្សស្លាប់ អ្នកបើកឡានបែនដឹកដី បានចុះរត់គេចខ្លួនបាត់ ។
លោកវរសេនីយ៍ត្រីឯក ស៊ាង ហន អធិការរងស្រុកព្រះស្ដេចបានឲ្យដឹងថា ជនរងគ្រោះទាំង៣នាក់ ឪពុកឈ្មោះ ហេង អូន អាយុ៤៣ឆ្នាំ ជាអ្នកបើកម៉ូតូ រីឯកូនប្រុស២នាក់ ឈ្មោះហេង សាមាន អាយុ១៦ឆ្នាំ និងម្នាក់ ទៀត ឈ្មោះហេង ម៉ី អាយុ៦ឆ្នាំ រស់នៅភូមិថ្មទ្រាំង ឃុំរក្សជ័យ ស្រុកបាភ្នំ ខេត្តព្រៃវែង។ សមត្ថកិច្ចបានឲ្យ ដឹងថា ឡានបង្កពាក់ស្លាកលេខខេត្តតាកែវ 3A-0378 ហើយបានយកទៅរក្សាទុកនៅប៉ុស្ដិ៍កំពង់សឹង និងចាត់ វិធានការស្រាវជ្រាវស្វែងរកចាប់ខ្លួនតៃកុងរថយន្តយកមកចាត់ការតាមផ្លូវច្បាប់ ៕
http://khmerangkor-news.com/wp-content/uploads/2015/04/KA-12-04-2015-02.jpg
