ភ្លើងប្រចណ្ឌបានឈានដល់ការវាយតប់គ្នា ប្តីលោតពីគ្រែផឹកស៊ីស្ទុះទៅដាល់ប្រពន្ធចំភ្នែកទាំងសងខាងពីរដៃ ចំណែកប្រពន្ធបានស្រវាយដំបងវាយបកវិញចំសៀតផ្កាប្តីមួយទំហឹងរយះ១ តឹកដួលផ្កាបមុខនឹងដី ហើយបានស្លាប់ពេលដឹកទៅសង្គ្រោះនៅមន្ទីរពេទ្យពេញ
ខេត្តកំពង់ឆ្នាំង៖ អំពើហិង្សា ដែលផ្តើមចេញពីភ្លើងប្រចណ្ឌ ស្របពេលបុរសជាប្តីកំពុងជួបជុំផឹកស៊ីជាមួយអ្នកជិតខាង ហើយបានឃើញប្រពន្ធមកពីផ្ទះគេក៏សួរនាំរករឿងហើយបានឈានដល់ផ្ទុះការវាយគ្នាពេញទំហឹង របួសធ្ងន់ទាំងពីរនាក់ ហើយបុរសជាប្តីបានស្លាប់ ពេលដឹកទៅសង្គ្រោះនៅមន្ទីរពេទ្យ ក្រុងភ្នំពេញ ចំណែកប្រពន្ធបានរងរបួសធ្ងន់ដឹកទៅសង្គ្រោះនៅមន្ទីរពេទ្យអង្គការមួយនៅខេត្តបាត់ដំបង។ ហេតុការណ៍នេះបានកើតឡើងវេលាម៉ោង៧ និង៣០នាទីយប់ថ្ងៃទី១៤ ខែមេសា ឆ្នាំ២០១៥ នៅភូមិជាងហ្លួង ឃុំពន្លៃ ស្រុកបរិបូរណ៌ ខេត្តកំពង់ឆ្នាំង។
លោក ជាង សុវណ្ណារិទ្ឋ អធិការនគរបាល ស្រុកបរិបូរណ៌ បាននិយាយអោយដឹងថា៖ បុរសជាប្តីមាន ឈ្មោះ សំ គួន អាយុ៣៧ឆ្នាំ ចំណែកប្រពន្ធមានឈ្មោះ សែម ហុង អាយុ៤៨ឆ្នាំ។ មុនពេលកើតហេតុ បុរសជាប្តីបានទិញស្រាបៀរមួយកេះផឹកនៅផ្ទះជាមួយអ្នកជិតខាងជាប់គ្នា។ ក្រោយមកពេលប្រពន្ធ ត្រឡប់មកដល់ផ្ទះវិញ ប្តីបានស្តីបន្ទោសថា៖ មកពីណា ម្ងៃៗដើរតែផឹកនៅផ្ទះគេមិននៅផ្ទះសោះ ពេលនោះក៏កើតជម្លោះឡើង។ ប្តីបានស្ទុះវាយប្រពន្ធ២ដៃចំភ្នែកទាំងសងខាង ប្រពន្ធទ្រាំមិនបាន ក៏បានវាយ តប់គ្នាទៅវិញទៅមក ដោយទាញបានដំបងប៉ុនកដៃប្រវែងជាងមួយម៉ែត្រ យកមកវាយប្តីចំសៀតផ្កាប្តី បណ្តាលអោយរបួសធ្ងន់ធ្ងរ រយះដាច់សាច់ប្រវែង១តឹក ដួលសន្លប់ទៅនឹងដី ។
ក្រោយកើតហេតុ បងប្អូនក្នុងគ្រួសារនេះ បានដឹកជនរងគ្រោះមកមន្ទីរពេទ្យខេត្តកំពង់ឆ្នាំង ប៉ុន្តែដោយ សារ រងរបួសធ្ងន់ធ្ងរពេកបុរសជាប្តីបានស្លាប់ពេលដឹកបន្តទៅសង្គ្រោះនៅមន្ទីរពេទ្យក្រុងភ្នំពេញ នៅ ថ្ងៃទី១៥ ខែមេសា ឆ្នាំ២០១៥នេះ ចំណែកប្រពន្ធដោយសាររងរបួសភ្នែកធ្ងន់ធ្ងរ ត្រូវបានដឹកបន្តទៅព្យាបាលនៅមន្ទីរពេទ្យរបស់អង្គការមួយនៅខេត្តបាត់ដំបង ។
ប្រភពព័ត៌មានពីប្រជាពលរដ្ឋនៅក្នុងភូមិ ដែលរស់នៅក្បែរគ្រួសារខាងលើនេះបាននិយាយអោយដឹងថា៖ ស្ត្រីសែម ហុង មានប្តីពីរ ដោយប្តីមុនបានលែងលះគ្នាបានកូន២ ក៏បានឈឺស្លាប់បាត់ទៅ។ ចំណែកប្តីក្រោយនេះជាប្អូនបង្កើតរបស់ប្តីមុន។ ប្តីក្រោយនេះប្រច័ណ្ឌប្រពន្ធខ្លាំងណាស់ សូម្បីតែកូនប្តីមុនដែលត្រូវជាក្មួយបង្កើតខ្លួនឯងសោះក៏ប្រចណ្ឌជាមួយដែរ ។
សពបុរសជាប្តីត្រូវបានសាច់ញាតិយកមកធ្វើបុណ្យតាមប្រពៃណីនៅក្នុងភូមិ ខណៈដែលប្រពន្ឋបុរសនោះកំពុងសម្រាកព្យាបាលរបួសនៅមន្ទីរពេទ្យខេត្តបាត់ដំបងនៅឡើយ៕ ដោយ រិទ្ធិ ជ័យ
http://ift.tt/1OVrcIB
