បទល្មើសនេសាទដាក់របាំងលបវែងៗរាប់រយម៉ែត្រខុសច្បាប់ក្នុងរដូវបិតនេសាទមិនត្រូវបានសមត្ថកិច្ចជំនាញបង្រ្កាបឡើយ
ខេត្តកំពង់ឆ្នាំង៖ នៅចំណុចព្រែកកោះអាច់ស្ថិតនៅក្នុងភូមិកោះតាម៉ូវ ឃុំកំពង់ព្រះគគីរ ស្រុកបរិបូណ៌ នៅព្រឹកថ្ងៃទី១៨ ខែមិថុនា ឆ្នាំ២០១៧ ក្រុមអ្នកសារព័ត៌មាន បានរកឃើញរបាំងដាក់លបសាច់អួន២កន្លែងមានប្រវែងប្រមាណពី៤០០ទៅ៥០០ម៉ែត្រ ដែលជនល្មើសបានដាក់បិតជិតព្រែកតែម្តង នៅក្នុងរដូវបិតនេសាទនេះ ដោយពុំឃើញមានសមត្ថកិច្ចជលផលចុះបង្ក្រាបឡើយ។
ប្រជាពលរដ្ឋរស់នៅក្នុងភូមិកោះតាម៉ូវ ឃុំកំពង់ព្រះគគីរ បាននិយាយអោយដឹងថា៖របាំងដាក់លបនៅចំណុចខាងលើនេះ១កន្លែងមានប្រវែងប្រមាណពី៤០០ទៅ៥០០ម៉ែត្រ ជារបស់ឈ្មោះ គឹម អេង ជាប្រជាពលរដ្ឋរស់នៅក្នុងភូមិកោះតាម៉ូវ ឃុំកំពង់ព្រះគគីរ និង១កន្លែងទៀតមានប្រវែងប្រមាណ១០០ម៉ែត្រ ជារបស់ឈ្មោះ ហេង រស់នៅភូមិដំបូកក្រហម ឃុំផ្សារ ស្រុកបរិបូណ៌ ដែលរបាំងលបខុសច្បាប់ទាំង២កន្លែងខាងលើនេះត្រូវបានគេដាក់បិតជិតព្រែកតែម្តង។ ដោយឡែកនៅបឹងខាងកើតភូមិកោះតាម៉ូវ ក៏គេពិនិត្យឃើញមានរបាំងលបសាច់អួនវែងៗមួយចំនួន និងរបាំងលបដាក់បិតផ្ចឹតព្រែកមួយចំនួនផងដែរ។
ក្រោយពីបានរកឃើញរបាំងលបសាច់អួនខុសច្បាប់ទាំង២កន្លែងខាងលើនេះនៅព្រឹកថ្ងៃទី១៨ ខែមិថុនា ក្រុមអ្នកសារព័ត៌មាន ក៏បានរាយការណ៍តាមទូរស័ព្ទ និងបង្ហោះរូបភាពបទល្មើស ជូនលោក ងិន ហ៊ុន ប្រធានមន្ទីរកសិកម្មខេត្តអោយលោកដឹង ។ បន្ទាប់មកលោក ងិន ហ៊ុន ក៏បានបញ្ជាក់អោយដឹងថាៈ លោកនិងបញ្ជារអោយលោកប្រធានសង្កាត់រដ្ឋបាលជលផលឆ្នុកទ្រូ និងលោកប្រធានក្រុមការពារតំបន់អភិរក្សទី៣ឃុំកំពង់ព្រះគគីរ ដឹកនាំកម្លាំងចុះបង្ក្រាប។ ប៉ុន្តែលទ្ធផលបង្ក្រាបបទល្មើសនៅចំណុចខាងលើនេះរបស់សមត្ថកិច្ចបានកំរិតណានោះ ក្រុមអ្នកសារព័ត៌មានយើងមិនទាន់បានទទួលរបាយការណ៍នៅឡើយទេ នៅល្ងាចថ្ងៃទី១៨ ខែមិថុនានេះ តែប្រជាពលរដ្ឋប្រាប់ថា មិនឃើញអ្នកណាចុះបង្ក្រាបឡើយ។
នៅក្នុងច្បាប់ស្តីពីជលផលបានចែងថា៖ នៅក្នុងរដូវបិតនេសាទបានអនុញ្ញាតអោយដាក់របាំងលបសាច់អួនតែប្រវែង១០ម៉ែត្រប៉ុណ្ណោះ និងមិនអនុញ្ញាតអោយដាក់របាំងសាច់អួនបិតផ្ជិតព្រែកដែលជាផ្លូវត្រីចេញចូលនោះឡើយ។ ដោយឡែកនៅក្នុងរដូវបើកនេសាទវិញបានអនុញ្ញាតអោយដាក់របាំងលបសាច់អួនតែប្រវែង៥០ម៉ែត្រ និងអោយដាក់របាំងសាច់អួនតែ២ភាគ៣នៃទំហំមាត់ព្រែកតែប៉ុណ្ណោះ។
ប្រជានេសាទជាអ្នកដាក់របាំងលបសាច់អួនវែងៗបាននិយាយអោយដឹងថា៖ ការដាក់របាំងលបសាច់អួនវែងៗ ពិតជាខុសច្បាប់មិនមែនពួកគាត់មិនដឹងនោះទេ តែបើមិនលួចដាក់វែងៗគឺរកត្រីមិនបានហូបឡើយ ម្យ៉ាងទៀតគឺត្រូវរត់ការបង់លុយអោយសមត្ថកិច្ចជំនាញគ្រប់ជាន់ថ្នាក់ គឺក្នុង១របាំងៗអស់ប្រាក់ពី១០០០ទៅ១៥០០ដុល្លា តាមរបាំងវែងឬខ្លី បើមិនបង់លុយអោយជំនាញទេនោះ ក៏មិនអាចដាក់របាំងលបវែងៗបែបនេះ ឬដាក់បិតផ្ជិតព្រែកបានដែរ។
ទាក់ទងនិងបទល្មើសនេសាទនៅក្នុងចំណុចខាងលើ នៅក្នុងរបិតនេសាទនេះ ប្រជាពលរដ្ឋស្នើសុំឯកឧត្តម អេង ជាសាន ប្រតិភូរាជរដ្ឋាភិបាល ជាប្រធានរដ្ឋបាលជលផល មេត្តាចុះមកត្រួតពិនិត្យនិងដឹកនាំបង្ក្រាបផងចុះ ព្រោះប្រជាពលរដ្ឋគ្មានទំនុកចិត្តលើការបង្ក្រាបរបស់មន្ត្រីរដ្ឋបាលជលផលនៅក្នុងខេត្តកំពង់ឆ្នាំងនោះឡើយ៕ ( 
ឈៀង ថារិទ្ធ )
http://ift.tt/2rGg68U
