ពិធី​បញ្ចុះបឋមសិលា​សា​ង​សង់​មជ្ឈមណ្ឌល​ជាតិ ផ្ដល់​សេវា​ព្យាបាល​ដោយ​ស្ម័គ្រចិត្ត​និង​ផ្អែកលើ​សហគមន៍​ដល់​អ្នកញៀន​គ្រឿងញៀន​

ខេត្តព្រះសីហនុ៖ អាជ្ញាធរជាតិប្រយុទ្ធប្រឆាំងគ្រឿងញៀន បានប្រារព្វធ្វើពិធីបញ្ចុះបឋមសិលាសាងសង់មជ្ឈមណ្ឌលផ្តល់សេវាព្យាបាលព្យាបាលដោយស្ម័ក្រចិត្ត និងផ្អែកលើសហគមន៍ដល់អ្នកញៀនគ្រឿងញៀននៅភូមិឬទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ។

ថ្លែងក្នុងពិធីបញ្ចំបឋមសិលានាព្រឹកថ្ងៃទី១០ ខែសីហា ឆ្នាំ២០១៧ លោក កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ដោយមោទណៈភាពថា ក្រោយពីការសាងសង់មជ្ឈមណ្ឌលនេះរួច ខេត្តព្រះសីហនុនឹងទទួលបាននូវមជ្ឈមណ្ឌលផ្ដល់សេវាព្យាបាលដើម្បីបន្សាបសារធាតុញៀនមួយយ៉ាងល្អពីអាជ្ញាធរជាតិប្រយុទ្ធប្រឆាំងគ្រឿងញៀន ហើយម្យ៉ាងវិញទៀត មជ្ឈមណ្ឌលក៏នឹងក្លាយជាថ្នាលអប់រំកែប្រែដល់ស្រទាប់យុវជនដែលកន្លងមកបានដើរនូវផ្លូវខុសមួយពេល អោយមកជាមនុស្សល្អក្នុងសង្គម។ លោកបានបន្តថា មជ្ឈមណ្ឌលសម្រាប់ព្យាបាលនិងស្ដារនិតិសម្បទាអ្នកញៀនគ្រឿងញៀននៅខេត្តព្រះសីហនុនេះ គ្រោងនឹងសាងសង់ឡើងដោយទទួលថវិកាពីរាជរដ្ឋាភិបាលកម្ពុជា តាមរយៈមូលនិធិជាតិសម្រាប់ការប្រយុទ្ធប្រឆាំងគ្រឿងញៀនដោយមានការចូលរួមវិភាគទានពីសប្បុរសជន និងវិស័យឯកជនតាមរយៈមូលនិធិសម្រាប់សង្គ្រោះនិងស្ដានីតិសប្បទាគ្រឿងញៀន ដែលបានការឧបត្តម្ភគាំទ្រពីរដ្ឋាភិបាលនៃសាធារណៈរដ្ឋសង្គមនិយមវៀតណាម និងរដ្ឋាភិបាលបណ្ដាប្រទេសជាមិត្តផ្សេងទៀត មជ្ឈមណ្ឌលនេះបានសាងសង់នៅលើផ្ទៃដីទំហំ២០ហិកតា ដែលជាដីសម្បទានពីរាជរដ្ឋាភិបាលកម្ពុជា តាមរយៈក្រុមហ៊ុន ម៉ុង ឬទ្ធី ដែលគ្រោងសាងសង់ចំណាយថវិកាសរុបប្រហែលជាង៨លានដុល្លា អាមេរិក។

សូមបញ្ជាក់ផងដែរថា ការបើកការដ្ឋាននាពពេលនេះ គឺធ្វើការសាងសង់នូវហេដ្ឋារចនាសម្ព័ន្ធមួយចំនួនរួមមាន ក្លោងទ្វារ និងរបងព័ន្ធជុំវិញដែលមានកំពស់ ៣,៥ មែត្រ គុណនិង ១៩១៤ ម៉ែត្រ ចំណាយថវិកា ៣៧៧,៦៩៤ដុល្លារ ។ អគារដ្ឋបាលទំហំ ៣៣មែត្រគុណ៤៣មែត្រមួយជាន់ ចំណាយថវិកា៥៦៧,៦០០ដុល្លារ បន្ទប់អគ្គីសនីទំហំ ១០ ម៉ែត្រ គុណ១៧ ម៉ែត្រ ចំណាយថិកា៦៨,៨០០ដុល្លារ អគារស្នាក់នៅសម្រាប់សន្តិសុខទំហំ ៨ ម៉ែត្រ គុណ ១២ ម៉ែត្រ ចំណាយថវិកា ៣៨,៤០០ ដុល្លារ សរុបថវិកាសាងសង់ដំណាក់កាលទី១នេះសរុបចំនួន១,០៥២,៤៩៤ ដុល្លាអាមេរីក៕ ទន់ សុខ