ប្រជាការពារឃុំខុនរ៉ង ស្រុកបរិបូណ៌ រៃបច្ច័យគ្នាបានជាង៩០ម៉ឺនរៀល និងអង្ករជាង១០០គក្រ ប្រគេនព្រះសង្ឃមួយអង្គ កំពុងមានអាពាធព្យាបាលនៅក្នុងមន្ទីរពេទ្យខេត្តកំពង់ឆ្នាំង
ខេត្តកំពងឆ្នាំង ៖ ប្រជាការពារនៅក្នុងឃុំខុនរ៉ង ស្រុកបរិបូណ៌ នៅព្រឹកថ្ងៃទី០៨ ខែសីហា ឆ្នាំ២០១៧ បាននាំគ្នាយកបច្ច័យ ដែលបានរៃអង្គាសគ្នា យកទៅប្រគេនដល់ព្រះសង្ឃមួយអង្គ គង្គនៅវត្តនរារង្សី ហៅវត្តនន់ត្រសក់ ស្ថិតក្នុងភូមិខុនរ៉ង ឃុំខុនរ៉ង ស្រុកបរិបូរណ៌ ដែលបច្ចុប្បន្នព្រះអង្គមានអាពាធកំពុងព្យាបាលនៅមន្ទីរពេទ្យខេត្តកំពង់ឆ្នាំង ។ ការរៃអង្គាសបច្ច័យប្រគេនព្រះសង្ឃខាងលើនេះ បានបញ្ជាក់ថា វប្បធម៌ប្រពៃណីខ្មែរ ជាអ្នកកាន់ព្រះពុទ្ធសាសនាបានស្ថិតជាប់ក្នុងបេះដូងកូនខ្មែរគ្រប់ៗរូប ទោះស្ថិតក្នុងសម័យណាក៍ដោយ ។
លោក ចាន់ អាន មេឃុំខុនរ៉ង ស្រុកបរិបូណ៌ បានអោយដឹងថា៖ ដោយមើលឃើញពីទុក្ខលំបាករបស់ ព្រះសង្ឃ ព្រះនាម ឈឹម ទន ព្រះជន្ម៨៤វស្សា គង្គនៅក្នុងវត្តនរារង្សី ហៅវត្តនន់ត្រសក់ ដែលកំពុងមានអាពាធព្យាបាលនៅក្នុងមន្ទីរពេទ្យខេត្តកំពង់ឆ្នាំង រយៈពេលជាច្រើនថ្ងៃមកហើយនោះ ប្រជាការពារក្នុងឃុំខុនរ៉ង មានចំនួន១០ភូមិ សរុបមានចំនួន ១៥០នាក់ បានមូលមតិរ៉ៃអង្គាសបច្ច័យផ្ទាល់ខ្លួន សរុបបានចំនួន ៩៨ម៉ឺន៧ពាន់រៀល និងអង្ករចំនួន១១៦ គីឡូក្រាម ដើម្បីយកប្រគេនដល់ព្រះសង្ឃដែលមានអាពាធកំពុងព្យាលបាលនៅក្នុងមន្ទីរពេទ្យខេត្ត ។ លោកបានបញ្ជាក់ទៀតថាៈ ព្រះភិក្ខុ ឈឹម ទន គ្មានញាត្តិញោមកូនចៅទេ មានតែ២នាក់ប្តីប្រពន្ធជាអ្នកក្រីក្រ ក្រោយមកព្រះអង្គបានមកបួសគង្គក្នុងវត្តនន់ត្រសក់នេះជាច្រើនឆ្នាំមកហើយ ដែលមានពុទ្ឋបរិស័ទចំណុះជើងវត្តគោរពស្រឡាញ់គ្រប់ៗគ្នា ជាក់ស្តែងដូចថ្ងៃនេះ ប្រជាការពារនៅក្នុងឃុំបានប្រមូលគ្នាអង្គាសបច្ច័យមកជួយព្រះអង្គដែលកំពុងមានអាពាធជួបការខ្វះខាត។
នៅក្នុងការជួបជុំគ្នាប្រមូលបច្ច័យនេះនៅក្នុងវត្តនរារង្សី ហៅវត្តនន់ត្រសក់ នៅរសៀលថ្ងៃទី០៧ ខែសីហា នេះ លោក ផល ភាព តំណាងអោយអាជ្ញាធរស្រុកបរិបូណ៌ និងលោកយាយឧបាសិការ មាជ (ប្រពន្ធព្រះសង្ឃ) បានថ្លែងអំណរគុណយ៉ាងជ្រាលជ្រៅដល់អាជ្ញាធរភូមិឃុំ និងពិសេស ដល់ទឹកចិត្តដ៏ជ្រះថ្លា របស់ប្រជាការពារ ដែលបរិច្ចាគបច្ច័យ និងអង្ករ មកជួយដល់ព្រះសង្ឃ ដែលកំពុងជួបនូវការលំបាកខ្វះខាត និងកំពុងសម្រាកក្នុងមន្ទីរពេទ្យ នេះពិតជាស្មារតីសាមគ្គីភាពយ៉ាងល្អជួយគ្នាទៅវិញទៅមកក្នុងពេលមានការលំបាក និងសូមជូនពរដល់បងប្អូនប្រជាការពារទាំងអស់ជួបនៅសេចក្តីសុខប្រការកុំបីឃ្លាតនោះឡើយ។
ដោយឡែក លោកគ្រូពេទ្យក្នុងមន្ទីរពេទ្យខេត្តកំពង់ឆ្នាំងបានអោយដឹងថាៈ ព្រះសង្ឃ ឈឹម ទន មានជម្ងឺ រលាកសួត និងទឹកចូលក្នុងសួត ដែលព្រះអង្គត្រូវការសម្រាកព្យាបាលជម្ងឺនេះរយៈពេលយូរទៅអាចព្យាបាលជាសះស្បើយ ៕ រឹទ្ធិ ជ័យ
http://ift.tt/2vk7HXh
