ផ្លូវ​ថ្មី​នៅលើ​ខ្នង​ទំនប់​តា​កុយ ស្រុក​ជល​គី​រី ធ្វើ​រួចរាល់​បាន​ជាង​ពាក់កណ្តាល ប្រជាពលរដ្ឋ​សប្បាយរីករាយ​ណាស់​សំណូមពរ​រាជរដ្ឋាភិបាល​ជួយ​ធ្វើអោយ​ហើយ ដើម្បី​ងាយស្រួល​ធ្វើដំណើរ​ជាង​នេះ​

ខេត្តកំពង់ឆ្នាំង៖ ស្រុកជលគីរី គឺជាស្រុកមួយដែលមានផ្លូវគមនាគមន៍ជួបការលំបាក ព្រោះតែទឹកដីស្រុកនេះជាង៨០ភាគរយ ត្រូវលិចទឹកទន្លេនៅរដូវខែវស្សា ។ដោយមានការយកចិត្តពីប្រមុខរាជរដ្ឋាភិបាល នៅក្នុងឆ្នាំ២០១៧នេះ ក្រសួងសាធារណៈការខេត្តបានកសាងផ្លូវថ្នល់ចាក់ជាបេតុងមួយខ្សែ នៅលើទំនប់តាកុយនេះដែលពីមុនជាផ្លូវយ៉ាងលំបាក តភ្ជាប់ពីស្រុកជលគីរី ខេត្តកំពង់ឆ្នាំង ទៅផ្សារផ្អាវ ក្នុងខេត្តកំពង់ចាម ជាប់ជា មួយផ្លូវជាតិលេខ៦ ដើម្បីសម្រួលដល់ការធ្វើដំណើររបស់ប្រជាពលរដ្ឋដឹកកសិផលទៅកាន់ទីផ្សារៗនានា និងទៅកាន់រាជធានីភ្នំពេញផងដែរ ។ ប៉ុន្តែផ្លូវដែលមានប្រវែង៦.៥០០ម៉ែត្រនេះ បានធ្វើរួចរាល់តែជាងពាក់កណ្តាលប៉ុណ្ណោះ ដោយត្រូវអនុវត្តគម្រោងថ្មីធ្វើបន្ត នៅក្នុងឆ្នាំ២០១៨ ខាងមុខនេះ ។

ប្រជាពលរដ្ឋឃុំព្រៃគ្រី ស្រុកជលគីរី បានបញ្ជាក់អោយដឹងថា៖ កាលមុនផ្លូវធ្វើដំណើរនៅលើខ្នងទំនប់តាកុយនេះមានការលំបាកខ្លាំងណាស់ ពេលឆ្លងកាត់ត្រូវទៅផ្សារផ្អាវម្តងៗ ដោយត្រូវធ្វើដំណើរយ៉ាងយូរ ពិ សេស ពេលស្ត្រីមានផ្ទៃពោះទៅសំរាលកូន ឬអ្នកជម្ងឺទៅមន្ទីរពេទ្យម្តងៗ ពិតជួបការលំបាកខ្លាំងណាស់ ។ ប៉ុន្តែពេលនេះពួកគាត់មានទឹកចិត្តសប្បាយរីករាយណាស់ ព្រោះថាបានផ្លូវថ្មីក្រាលបេតុងជាងពាក់កណ្តាលហើយ ការធ្វើដំណើរបានស្រួលជាងមុន និងកាត់បន្ថយពេលវេលាបានឆាប់រហ័ស ។ ប្រជាពលរដ្ឋសូមថ្លែងអំណរគុណយ៉ាងជ្រាលជ្រៅដល់ប្រមុខរាជារដ្ឋាភិបាល និងក្រសួងពាក់ពន្ឋ័ ដែលបានជួយកសាងផ្លូវថ្មីបានយ៉ាងស្អាតនិងរឹងមាំនេះ ។ ទន្ទឹមនេះដែរប្រជាពលរដ្ឋសូមសំណូមពរដល់ប្រមុខរាជរដ្ឋាភិបាល សូមមេត្តាជួយធ្វើផ្លូវដែលនៅសល់មួយកំណាត់ទៀត អោយបានឆាប់រហ័ស ដើម្បីប្រជាពលរដ្ឋបានធ្វើដំណើរងាយស្រួលជាងនេះទៀត ។

ដោយឡែក លោក យិន សាវ៉េន អភិបាលស្រុកជលគីរី បានអោយដឹងដែរថា ៖ ផ្លូវនៅលើខ្នងទនប់តាកុយនេះ មានប្រវែង៦.៥០០ម៉ែត្រ ដែលពេលនេះក្រសួងសាធារណៈការ កសាងបានជាងពាក់កណ្តាល ហើយ នៅសល់ជាង២.០០០ម៉ែត្រទៀត ដែលត្រូវធ្លាក់គម្រោងកសាងបន្តនៅក្នុងឆ្នាំ២០១៨ ខាងមុខនេះ ។

គេពិនិត្យឃើញថា ក្រោយពេលកសាងផ្លូវបេតុងនៅលើទំនប់ទឹកតាកុយនេះ ប្រជាពលរដ្ឋជាអ្នកមានធនធាន បានការកសាងខ្ចុសលក់ដូរបែបជារម្មណីយដ្ឋាន ធ្វើអោយតំបន់ថ្មីខាងលើនេះមានមនុស្សទៅលេងកំសាន្តយ៉ាងច្រើនកុះករ ជាពិសេសនៅក្នុងរដូវខែបុណ្យទាន ដោយមានរៀបចំកម្មវិធី ប្រណាំងទូក កាណូត ជិៈពោងលេង និងមានការបរគុំតន្ត្រីប្រជាប្រិយផងដែរ ។ ដោយឡែកបច្ចុប្បន្ននៅលើខ្នងទំនប់នេះបានក្លាយជាកន្លែងជួបជុំគ្នាមុជទឹកលេងកំសាន្តនៅរៀងរាល់ល្ងាចផងដែរ ៕ រឹទ្ធិ ជ័យ