ស្រូវ​ប្រមាណ ៣០០០ ហិកតា របស់​ប្រជាពលរដ្ឋ​ចំនួន ៤​ឃុំ ក្នុងស្រុក​បារាយណ៍ កំពុងខ្វះខាតទឹក ខណៈវិស័យដាំស្រូវពឹងលើឃេនៅមេឃនៅឡើយ!

(កំពង់ធំ)៖ ស្រូវប្រជាពលរដ្ឋប្រមាណ ៣ ០០០ហិចតា នៅក្នុងឃុំចំនួន៤ គឺឃុំក្រវ៉ា ឃុំបាក់ស្នា ឃុំគគីរធំ និងឃុំចើងដើង ក្នុងស្រុកបារាយណ៍ ខេត្តកំពង់ធំ កំពុងរងនូវការបាត់បង់ទិន្និផលស្ទើរទាំងស្រុង ខណៈដែលកូនរដូវប្រាំងកំពុងកើតមានជាងមួយខែកន្លងមកនេះ។

លោក ហាក់ ម៉ុងហួត អភិបាលស្រុកបារាយណ៍ លើកឡើងថា ស្រូវរបស់ប្រពលរដ្ឋ ដែលនៅក្នុងឃុំចំនួន ០៤ គឺ គឺឃុំក្រវ៉ា ឃុំបាក់ស្នា ឃុំគរគីធំ និងឃុំចើងដើង កំពុងរងនូវការស្វិតស្រពោន អាចនឹងបាត់បង់ទិន្និផលទាំងស្រុង ប្រសិនបើមេឃនៅតែបន្តរាំងស្ងួត ព្រោះភូមិសាស្ត្រនៅក្នុងឃុំទាំងបួនខាងលើ ពុំមានប្រភពទឹកណាមួយ អាចស្រោចសពបានទាំងអស់នោះ ទេ។ រីឯប្រភពទឹក ដែលកំពុងធ្វើការជួយសង្គ្រោះនៅពេលនេះ គឺបូបទឹកពីប្រភពស្រះរបស់សហគមន៍ និងស្រះរបស់សប្បុរសជនប៉ុណ្ណោះ។

លោកអភិបាលស្រុក បន្តថា បើទោះបីជាគ្មានភ្លៀងក្តី ក៏លោកនៅតែបន្តស្វែងរកប្រភពទឹកផ្សេងទៀត ដើម្បីជួយបង្កើនការស្រោចស្រពបន្ថែមទៀត មិនទុកឱ្យស្រូវរបស់ប្រជាពលរដ្ឋខូចខាតទាំងស្រុងនោះទេ។
ជាមួយគ្នានេះដែរ លោកអភិបាលស្រុកបារាយណ៍ បានបញ្ជាក់ថា ក្នុងស្រុកបារាយណ៍ មានប្រព័ន្ធធារាស្ត្រធំៗចំនួន ០៣ ដែលអាចស្រោចស្រពដីបានជាច្រើនពាន់ហិចតា ប៉ុន្តែគឺអាចស្រោចស្រពបានតែស្រូវបណ្តេញទឹក ឬស្រូវប្រាំង ដែលផ្នែកខាងក្រោមតែប៉ុណ្ណោះ។ រីឯស្រូវ ដែលកំពុងរងគ្រោះនេះ គឺជាស្រូវ ដែលនៅផ្នែកខាងលើប្រព័ន្ធធារាស្ត្រ ដែលមានភូមិសាស្ត្រជាតំបន់ខ្ពង់រាប នឹងឆ្ងាយពីប្រភពទឹករាប់ពាន់ម៉ែត្រ ដែលមិនអាចមានលទ្ធភាពនាំយកទឹកមកស្រោចស្រពគ្រប់ស្រែបានទាំងអស់នោះទេ៕