ពលរដ្ឋស្រែកថ្ងូរ អាជ្ញាធរ និងមន្ត្រីជំនាញមិនខ្វល់ជាមួយក្រុមហ៊ុនធ្វើអាជីវកម្ម កិនថ្ម ដាក់រំសេវបំផ្ទុះ និងកាយដីភ្នំធំយ៉ាងអនាធិបតេយ្យគ្មានលស់ថ្ងៃ
ខេត្តបន្ទាយមានជ័យ ៖ ដីភ្នំនៅក្នុងស្រុកមង្គលបូរី ខេត្តបន្ទាយមានជ័យ ជាច្រើនកន្លែង កំពុងប្រឈមនឹងការឈូសឆាយ កាយយកអាចម៍ដីលក់ យ៉ាងអនាធិបតេយ្យ ដោយមានការ បំផ្លិចបំផ្លាញភ្នំធម្មជាតិ ពីសំណាក់ក្រុមឈ្មួញខិលខូចហើយគេពុំដឹងថា ការឈូសឆាយកាយភ្នំ ពីមួយកន្លែងទៅមួយកន្លែង បានយ៉ាងរលូនដូចនេះ មានច្បាប់អនុញ្ញាត ឬយ៉ាងណានោះទេ ព្រោះគ្មានអាជ្ញាធរ មានសមត្ថកិច្ច ចុះទៅត្រួតពិនត្យ ឬហាមឃាត់សោះឡើយ មិនដឹងថាពាក់ព័ន្ធផលប្រយោជន៍ឬយ៉ាងណានោះទេ។
ក្រុមប្រជាពលរដ្ឋ បានអោយដឹងថា នៅព្រឹកថ្ងៃទី៣០ ខែធ្នូ ឆ្នាំ២០១៤ នៅទីតាំងភ្នំមួយកន្លែង ស្ថិតនៅភូមិភ្នំធំ ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ តាមបណ្តោយជាតិលេខ៥ ត្រូវគេមើល ឃើញ ថា មានគ្រឿងចក្រ ជាច្រើនគ្រឿង និងរថយន្តដឹកអាចម៍ដី មិនតិចជាង ២០០គ្រឿងនោះទេ។ ពាក់ព័ន្ធការជីកកកាយភ្នំ យកអាចម៍ដីតំបន់ខាងលើនេះ បុរសម្នាក់ជាអ្នកមើលការខុសត្រូវ ការដ្ឋានកិនថ្មខាងលើ បានធ្វើការគំរាមអ្នកកាសែត ដែលចុះទៅផ្តិតរូបភាព យកមកសរសេររឿង ការដ្ឋានកិនថ្ម ទាំងនោះ ប្រយ័ត្នមានបញ្ហាជាមួយគេ ពីព្រោះគេបង់ពន្ធឲ្យរដ្ឋ ត្រង់ប៉ះពាល់សុខភាពពលរដ្ឋ គេមិនដឹងទេ។
ប្រជាពលរដ្ឋ នៅខាងកើត និងខាងជើងភ្នំធំ និងសិស្សានុសិស្ស ដែលស្ថិតនៅក្នុងភូមិភ្នំធំ ឃុំអូរប្រាសាទ ស្រុកមង្គលបូរី បានឲ្យដឹងថា៖ ពួកគេសព្វថ្ងៃមិនបាន រៀនសូត្រប៉ុន្មានទេ គឺរវល់តែរត់រកកន្លែងសុវត្ថិភាព ខ្លាចគ្រោះថ្នាក់ នៅពេលគេដាក់រំសេវ កម្ទេចភ្នំយកថ្ម ប្រឈម និងគ្រោះថ្នាក់ដូចជា ការបាញ់ថ្ម កំទេចថ្ម មកប៉ះដំបូលផ្ទះ និងសាលារៀន ហើយម៉ាស៊ីកិនថ្ម ហុយជាប្រចាំ ដែលប៉ះពាល់ដល់ សុខភាពបងប្អូនប្រជាពលរដ្ឋ ដែលរស់នៅជិតខាង មានដូចជាធូលីហុយ ចូលច្រមុះរលាក ផ្លូវដង្ហើមជាដើម តែពុំមានអ្នកណាយកចិត្តទុកដាក់ពួកគាត់ទេ។
ប្រជាពលរដ្ឋបានបញ្ជាក់ថា៖ ក្នុងចំណោម ៤ក្រុមហ៊ុន ម៉ាស៊ីកិនថ្មភ្នំ ធំគឺមាន ៤ក្រុមហ៊ុន មាន១.ក្រុមហ៊ុន ណុប ទូច ២.ក្រុមហ៊ុន លឹម ផាវី ៣.ក្រុមហ៊ុន លឹម ហេង ក្រុមហ៊ុន គ ណៃ ដែលធ្វើឲ្យប្រជាពលរដ្ឋ និងសិស្សនុសិស្ស ប្រឈមនឹង គ្រោះថ្នាក់បំផុត។ ប្រជាពលរដ្ឋ បានទទូចសុំអោយ អភិបាលខេត្ត ជួយដោះស្រាយ រឿងក្រុមហ៊ុន ណុបទូច និងក្រុមហ៊ុន លឹម ហេង ដែលបានបាញ់ថ្ម និងកិនថ្មហុយប៉ះពាល់ ដល់ប្រជាពលរដ្ឋ និងសាលារៀន បឋមសិក្សា អនុវិទ្យាល័យវិទ្យាល័យ ដែលនៅក្បែរការដ្ឋាន។
លោក សុត វឌ្ឍនា ប្រធានមន្ទីររ៉ែ និងថាមពល ខេត្តបន្ទាយមានជ័យបានប្រាប់ថា៖ នៅភ្នំធំគឺមានក្រុមហ៊ុន ម៉ាស៊ីនកិនថ្ម ចំនួន ៤ក្រុមហ៊ុន មាន១.ក្រុមហ៊ុន គ ណៃ (នៅខាងត្បូងភ្នំធំ) ២.ក្រុមហ៊ុន លឹម ហេង (ខាងកើតភ្នំ) ៣.ក្រុមហ៊ុន លឹម ផាវី (ខាងកើតភ្នំ) ៤.ក្រុមហ៊ុន ណុប តូច (ខាងកើត ខាងឈៀងខាងជើងភ្នំធំ) ។ លោកបានប្តថា ចំពោះបញ្ហាដែល ប្រជាពលរដ្ឋចោទប្រកាន់ ក្រុមហ៊ុនម៉ាស៊ីនកិនថ្ម ដែលធ្វើអោយប៉ះ ពាល់ ដល់ប្រជាពលរដ្ឋ និងសិស្សានុសិស្សនោះ គឺលោកដូចជា មិនបានដឹងច្បាស់ ព្រោះការបាញ់ថ្ម បើប៉ះពាល់ដល់អ្នកជិតខាង ក្រុមហ៊ុនចេញសង បើពាក់ព័ន្ធនឹងការហុយ ប៉ះពាល់សុខភាព គឺមន្ត្រីជំនាញបានណែនាំ ដល់ក្រុមហ៊ុនអោយស្រោចទឹក រួចហើយ។
ចំពោះក្រុមហ៊ុន ណុប ទូច ដែលបានហាមឃាត់ ប្រជាពលរដ្ឋ មិនអោយឡើងលើភ្នំធំ ទៅល្អាង ឫក៏ទៅធ្វើបុណ្យ គឺក្រុមហ៊ុនគ្មានសិទ្ធិ ហាមឃាត់ឡើយ ព្រោះជាសម្បត្តិរដ្ឋ និងកូនភ្នំខាងកើត ឈាងខាងជើង ដែលកាយរៀបហើយ ធ្វើរបងថ្មព័ទ្ធយកនោះ លោកដឹងថា ជាដីគណបក្សប្រជាជនកម្ពុជា គ្រោងទុកដីធ្វើផ្សាភ្នំធំ ដែលត្រូវដោះដូរ។ ពាក់ព័ន្ធបញ្ហាខាងលើនេះ មិនអាចទំនាក់ទំនង ជាមួយលោក គោ ស៊ុំសារឿត អភិបាល ខេត្តបន្ទាយមានជ័យ ដើម្បីសុំការបំភ្លឺបានទេ នៅថ្ងៃទី៣០ ធ្នូនេះ៕ ដោយ យីហាំង
