យុវជនម្នាក់ទៅដាក់មូងយកត្រី បានលង់ទឹកអូរស្លាប់ នៅស្រុកលំផាត់
ខេត្តរតនគិរី៖ យុវជនជនជាតិទំពួនម្នាក់ ខណៈបាត់ពីផ្ទះតាំងពីថ្ងៃទី១៧ ខែធ្នូ ឆ្នាំ២០១៤ វេលាម៉ោង១០ព្រឹកមកម្ល៉េះ ធ្វើអោយមានការភ្ញាក់ផ្អើលដល់ក្រុមគ្រួសារ និងសាច់ញាតិសន្តានបងប្អូនក្នុងភូមិ ចែកផ្លូវគ្នាដើររករហូតមកដល់ថ្ងៃទី១៨ ខែធ្នូ ឆ្នាំ២០១៤ វេលាម៉ោង៩ និង០០នាទីព្រឹកទើបប្រទះឃើញសាកសព យុវជនខាងលើ នៅត្រង់ចំណុចអូរផ្លង ស្ថិតក្នុងភូមិបាតាង ឃុំបាតាង ស្រុកលំផាត់ ខេត្តរតនគិរី។
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៩ និង០០នាទីព្រឹក ថ្ងៃទី១៨ ខែធ្នូ ឆ្នាំ២០១៤ សាកសពយុវជនម្នាក់ត្រូវបានសាច់ញាតិ និងក្រុមគ្រួសារប្រទះឃើញស្លាប់ផ្កាប់មុខនៅក្នុងអូរដោយមានជម្រៅទឹកជាងមួយម៉ែត្រប៉ុណ្ណោះ។ សាកសពជនរងគ្រោះត្រូវបានគេស្គាល់ឈ្មោះ ភេន ដី ភេទប្រុស អាយុ១៧ឆ្នាំ ជនជាតិទំពូន មានទីលំនៅភូមិបាតាង ឃុំបាតាង ស្រុកលំផាត់។
តាមការអោយដឹងពីលោក កិត ចេម មេឃុំបាតាង បានអោយដឹងថា៖ ជនរងគ្រោះខាងលើត្រូវជាសាច់ញាតិរបស់គាត់គេមានជម្ងឺឆ្កូតជ្រូក តាំងពីកំណើតមកម្ល៉េះ។ លោកបន្តទៀតថា ជម្ងឺរបស់គេក្នុង១ខែបានរើឡើងមានពីរទៅបីដង ប្រកាច់បែកពពុះមាត់។ រហូតមកដល់ថ្ងៃខែឆ្នាំខាងលើស្របពេលដែលជនរងគ្រោះទៅរកត្រីម្នាក់ឯងឆ្ងាយពីផ្ទះចៃដន្យបាត់មួយយប់ ក្រុមគ្រួសារមានការសង្ស័យក៏ឆោឡោរដើរស្វែងរកប្រទះឃើញស្លាប់នៅក្នុងអូរតែម្តង។
ក្រោយពេលកើតហេតុសមត្ថកិច្ចមូលដ្ឋានព្រមទាំងលោកមេឃុំបានចុះទៅធ្វើកោសល្យវិច្ច័យទៅលើសាកសព ឃើញថាសពជនរងគ្រោះពិតជាលង់ទឹកស្លាប់ប្រាកដមែន មិនមែនរឿងករណីឃាតកម្មនោះទេ។
សូមបញ្ជាក់ផងដែរថា សាកសពជនរងគ្រោះត្រូវសាច់ញាតិក្រុមគ្រួសារយកទៅតំកល់ទុកនៅខាងក្រោយភូមិ មិនអាចយកទៅក្នុងភូមិបាននោះទេ ដោយតំណមខ្មោចតៃហោង ដូចជាលង់ទឹក ឫចងក ជាដើម ជាប្រពៃណីរបស់ជនជាតិដើមភាគតិចទំពួន៕ ដោយលី វណ្ណៈ
