ស្ត្រីមានផ្ទៃពោះ៦ខែម្នាក់ ជិះម៉ូតូឌុបត្រូវរថយន្តតូរីសកៀរពេទ្យថាប៉ះពាល់ដល់កូនក្នុងផ្ទៃ
ខេត្តកំពង់ឆ្នាំង៖ ស្ត្រីមានផ្ទៃពោះ៦ខែម្នាក់ បានជួបគ្រោះថ្នាក់ចរាចរណ៍រងរបួសក្បាល និងជើងរហូតប៉ះពាល់ដល់កូនក្នុងផ្ទៃទៀតផង ដោយសារតែនាងធ្លាក់ពីលើម៉ូតូអុកគូថ លើថ្នល់ជាតិ ទើបរងរបូសធ្ងន់ ។ គ្រោះថ្នាក់ចរាចរណ៍នេះបណ្តាលមករថយន្តតូរីស បើកកៀរម៉ូតូនៅចំណុចវង្វង់មូលវិមានឯករាជ្យ ក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង កាលពីវេលាម៉ោង១០ និង១៥នាទី ព្រឹកថ្ងៃទី២៣ ខែធ្នូ ឆ្នាំ២០១៤ ។
ស្ត្រីរងគ្រោះបានប្រាប់អោយដឹងថា៖ នាងមានឈ្មោះ កេង ដារឿន អាយុ៣០ឆ្នាំ នាងមានកូនស្រីម្នាក់ និងកំពុងតែពពោះកូនម្នាក់ទៀត បាន៦ខែប៉ុណ្ណោះ នាងមានទីលំនៅក្នុងស្រុកសំពៅលូន ខេត្តពោធិសាត់ នាងតាមមករស់នៅជាមួយប្តី ដែលមកធ្វើការអោយក្រុមហ៊ុនខ្សែកាបក្នុងខេត្តកំពង់ឆ្នាំង បច្ចុប្បន្ននាងស្នាក់នៅក្នុងសាលាបំពេញវិជ្ជា ភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង។
មុនពេលកើហេតុនាងបានជិះម៉ូតូឌុបត្រឡប់មកពីផ្សារលើវិញ ពេលដល់វិមានឯករាជ្យក៏មានរថយន្តតូរីសពណ៌ស១គ្រឿងពាក់ស្លាកលេខភ្នំពេញ 2S- 8491 បើកគៀរម៉ូតូក្នុងទិសដៅច្រាស់គ្នា បណ្តាលអោយនាងធ្លាក់់ពីលើម៉ូតូអុកគគូថរងរបួស ហើយត្រូវបានអ្នកធ្វើដំណើរជួយគ្រានាងមកកាន់មន្ទីរពេទ្យខេត្ត ដើម្បីអោយគ្រួពេទ្យជួយសង្គ្រោះភ្លាមៗដែរ។
សាក្សីនៅកន្លែងកើតហេតុបានអោយដឹងថា៖ ថ្ងៃនេះនៅរង្វង់មូលឯករាជ្យក្នុងក្រុង កំពង់ឆ្នាំង ត្រូវបានគេបិទផ្លូវម្ខាងកសាងផ្លូវជាតិដោយទុកផ្លូវអោយធ្វើចរាចរណ៍តែម្ខាង ហេតុនេះហើយទើបមានការចង្អៀត និងមានគ្រោះថ្នាក់រីឯរថយន្តដែលគៀរម៉ូតូនោះម្ចាស់រថយន្តក៏នៅទទួលខុសត្រួវជាមួយជនរងគ្រោះ មិនបានរត់គេចឡើយ។
រថយន្តបង្កបានបែកកង់មុខខាងឆ្វេងទៅមុខមិនរួច ត្រូវបានសមត្ថកិច្ចយកទៅរក្សាទុកជាមួយម៉ូតូឌុប នៅក្នុងអធិការដ្ឋាននគរបាលក្រុងកំពង់ឆ្នាំង និងបានវាស់វែងកសាងសំណុំរឿងតាមនិតិវិធីច្បាប់៕ ដោយ រិទ្ធិ ជ័យ
