ពិធីឡើងគេហដ្ឋានថ្មី នៅក្នុងសង្កាត់ប៉ោយប៉ែត បានបិទយកផ្លូវបេតុងទាំងមូលសង់រោង មិនខ្វល់ពីអ្នកត្រូវធ្វើដំណើរ
ខេត្តបន្ទាយមានជ័យ៖ រោងពិធីគេហដ្ឋានថ្មីត្រូវបានរំលោភផ្លូវបេតុង ជាចំណុចសំខាន់សំរាប់ ការធ្វើចរាចរណ៍ សំរាប់ការដឹកជនងគ្រោះគ្រប់ៗរូប និងការចរាចរណ៍ចេញចូល តែត្រូវបាន ម្ចាស់រោងបិទទាំងស្រុងតែម្តង កាលពីថ្ងៃទី១៨ ខែធ្នូ ឆ្នាំ២០១៤ ចំណុចផ្លូវបេតុងបែកជាបួន ឆ្ពោះទៅកាន់មន្ទីរពេទ្យបង្អែកប៉ោយប៉ែត ស្ថិតនៅភូមិមិត្តភាព សង្កាត់-ក្រុងប៉ោយប៉ែត ខេត្តបន្ទាយមានជ័យ។
បើតាមប្រភពពីពលរដ្ឋរស់នៅជិតនោះបានប្រាប់ថា ហេតុអីបានជាម្ចាស់ផ្ទះថ្មីនេះហ៊ាន អោយគេសង់រោងបិទផ្លូវបេតុងបែបនេះ អាងតែខ្លួនមានលុយ មានអំណាច ដែលធ្វើឲ្យគាត់ហ៊ានបំពានផ្លូវសាធារណៈបែបនេះ ។ពួកគាត់បន្តថា ប្រសិនជាមានអ្នកជម្ងឺឈឺធ្ងន់ធ្ងរនៅក្នុងថ្ងៃ ឬត្រូវរថយន្តសង្គ្រោះបន្ទាន់ត្រូវដឹកបញ្ជូនយកមក តើអ្នកជម្ងឺទៅជាយ៉ាងណា បើផ្លូវវាងវាពិបាកខ្លាំងណាស់ ស្មានណាទៅដល់ វាក៏អាចនិងបាត់បង់ជីវិតផងដែរ។
លោកនុត លី ចៅសង្កាត់ប៉ោយប៉ែតបានប្រាប់ឲ្យដឹងថា រោងឡើងគេហដ្ឋានថ្មីមានឈ្មោះ ហៀង អាយុប្រមាណ៤០ឆ្នាំ លោកពុំមានសិទ្ធទៅឃាត់ ឬហាមមិនអោយបិទផ្លូវនោះទេ ខាងលោកមានសិទ្ធតែផ្តល់លិខិតអនុញ្ញាត ធ្វើកម្មវិធី ហើយពិធីមានតែមួយល្ងាចប៉ុណ្ណោះ ។ លោកបានបន្តថា ការហាមឃាត់ឬមិនអនុញ្ញាត មានតែស្ថាប័នសមត្ថកិច្ចតែប៉ុណ្ណោះ ដែលមានការចាំបាច់អនុវត្តកិច្ចការសាធារណៈ លោកមិនហាននោះទេ ហើយលោកបានដេញភ្នាក់ងា យើងទៅសួរនាំសមត្ថកិច្ចវិញចុះ។
លោក អ៊ុំ សុផល អធិការដ្ឋាននគរបាលក្រុងប៉យប៉ែត បានប្រាប់តាមទូរស័ព្ទថា រោងមិនទាន់បានសុំការអនុញ្ញាតនោះទេ លោកនឹងបញ្ជាកម្លាំងចុះទៅត្រួតពិនិត្យឥឡូវហើយ។ សូមបញ្ជាក់ថា ករណីខាងលើនេះនៅពេលដែរភ្នាក់ងាមជ្ឈមណ្ឌលព័ត៌មានដើមអម្ពិលចុះ ទៅផ្តិតរូបភាពនៅចំណុចរោងខាងលើនេះ ស្រាប់តែឃើញមានក្មេងប្រុសម្នាក់បានយកឈើ៤ដើមយកដាក់សញ្ញា បិទបន្ថែម មិនអនុញ្ញាតឲ្យប្រើផ្លូវបេតុងនោះទេ៕ ដោយ យីហាំង
