រថយន្តម៉ាកកាមរី គូថហើម បុកកង់ និងម៉ូតូពីក្រោយត្រួតផ្ទប់គ្នា បណ្តាលឲ្យមនុស្ស២នាក់របួសធ្ងន់ធ្ងរ
ខេត្តកំពង់ឆ្នាំង៖ មនុស្ស២នាក់ បានរងរបួសធ្ងន់ធ្ងរ ក្នុងករណីគ្រោះថ្នាក់ចរាចរណ៍មួយ ខណៈដែលជន រងគ្រោះម្នាក់ជិះម៉ូតូ និងម្នាក់ទៀតជិះ កង់ត្រូវរថយន្តមួយគ្រឿបុកពីក្រោយបន្តគ្នា។ ហេតុការណ៍នេះ បានកើតឡើងនៅវេលាម៉ោង២ និង១០នាទីរសៀលថ្ងៃទី១៨ ខែធ្នូ ឆ្នាំ២០១៤ នៅលើកំណាត់ផ្លូវជាតិ លេខ៥ ក្នុងចន្លោះគីឡូម៉ែត្រលេខ៨១ និងលេខ៨២ ចំណុចមុខផ្សារព្រៃខ្មែរ ក្នុងភូមិព្រៃខ្មែរ ឃុំរលាប្អៀរ ស្រុករលាប្អៀរ។
មន្ត្រីនគរបាលចរាចរណ៍ស្រុករលាប្អៀរបាននិយាយអោយដឹងថា៖ មុនពេលកើតហេតុជនរង គ្រោះទាំង២នាក់ម្នាក់ឈ្មោះ ថុច ស៊ីថា ភេទប្រុស អាយុ៤៥ឆ្នាំ មានទីលំនៅ ភូមិចំបក់កន្ទ្រាញ ឃុំតាំង ក្រសាំង ស្រុកទឹកផុស បានជិៈម៉ូតូម៉ាវីវ៉ាពណ៌ខ្មៅ ពាក់ស្លាកលេខ កំពង់ឆ្នាំង1A- 8628 ក្នុងដំណើរ ពីជើង ទៅត្បូង និងម្នាក់ទៀតឈ្មោះ បូ ស្រីចាន់ ភេទស្រី អាយុ១៥ឆ្នាំ ជាសិស្ស មានទីលំនៅភូមិឈើត្រាច ឃុំគោកបន្ទាយ ស្រុករលាប្អៀរ ទាំង២នាក់ក្នុងដំណើរស្របគ្នា លុះមកដល់ចំណុចកើតហេតុ ក៏ស្រាប់តែ មានរថយន្តម៉ាកកាមរីគូថហើមពណ៌ខ្មៅ ពាក់ស្លាកលេខភ្នំពេញ 2A. 6805 ជាតថយន្តតាក់ស៊ីពោធិសាត់ ភ្នំពេញ បើកបរដោយជនពុំស្គាល់ បានបើកមកពីក្រោយយ៉ាងលឿន ហើយបានទៅបុកជនរងគ្រោះទាំង ២នាក់បន្តត្រួតគ្នា បណ្តាលអោយរងរបួសធ្ងន់ធ្ងរទាំង២នាក់។
ក្រោយពេលកើតហេតុអ្នកបើកបររថយន្តបានបើករត់គេចចេញពីកន្លែងកើតហេតុប្រមាណ៤០ម ហើយបានឈប់ទុករថយន្តចោលរួចគេចខ្លួនបាត់តែម្តង។ ចំណែកជនរងគ្រោះទាំង២នាក់ត្រូវបានគេ សែងបញ្ជូនទៅកាន់មណ្ឌលសុខភាពព្រៃខ្មែរ ដោយរបួរធ្ងន់ធ្ងរ ក៏ត្រូវបានគេដឹកតាមរថយន្តបញ្ជូន មក កាន់មន្ទីរពេទ្យខេត្ត ប៉ុន្តែដោយសាររបួសធ្ងន់ធ្ងរពេក គ្រូពេទ្យខេត្តបានរៀបចំបញ្ជូនទៅសង្គ្រោះនៅមន្ទីរ ពេទ្យក្រុងភ្នំពេញជាបន្តទៀត ។
មន្ត្រីនគរបាលស្រុករលាប្អៀរបាននិយាយថា៖ អ្នកបើកបររថយន្តទំនងជាគេចឧបស័គ្គអ្វីមួយ ឬ អាចថា៖ បើកងោកមួយភាំងក៏ថាបានទើបបុកជនរងគ្រោះទាំង២នាក់បន្តគ្នារបួសធ្ងន់បែបនេះ។ រថយន្ត ម៉ូតូនិងកង់ជនរងគ្រោះត្រូវបានសមត្ថកិច្ចយកមករក្សាទុកនៅក្នុងអធិការដ្ឋាននគរបាលស្រុករលាប្អៀរ ដើម្បី រង់ចាំធ្វើការដោះស្រាយជាមួយភាគីទាំង៣តាមនិតិវិធីច្បាប់៕ ដោយ រិទ្ធិ ជ័យ
