ចេញពីហូបការ ជិះម៉ូតូល្បឿនលឿនបុកខឿនចែកទ្រូងផ្លូវ ខ្ទាតទៅបោកនឹងបង្គោលភ្លើង បណ្តាលអោយប៉ើងហោះទាំងមនុស្សប៉ើងទាំងម៉ូតូ បោកក្បាលលើថ្នល់ពេញទំហឹងស្លាប់២នាក់
ខេត្តព្រះសីហនុ៖ សម្លេងទ្រហោយំរបស់សាច់ញាតិគួរអោយសង្វេកនៅក្នុងមន្ទីរពេទ្យបង្អែកចំការចេក ខណៈពេលបុរស២នាក់បានបាត់បង់ជីវិត នៅពេលបញ្ជូនមកដល់មន្ទីរពេទ្យ បន្ទាប់ពីបុរសទាំងពីរនាក់ជិះម៉ូតូទៅបុកខឿនចែកផ្លូវ ពេញទំហឹងខ្ទាតប៉ើងផ្លោងទៅប៉ះនឹងបង្គោលភ្លើងបោកក្បាលជាមួយថ្នល់ សន្លប់ស្តូកស្តឹង ដោយមានឈាមហូរចេះពីក្បាលទាំងពីរនាក់ កាលពីវេលាម៉ោង២១ និង៤០នាទី យប់ថ្ងៃទី២២ ខែធ្នូ ឆ្នាំ២០១៤ នៅចំណុចស្តុបកាល់តិច ស្ថិតក្នុងភូមិ២ សង្កាត់លេខ២ ក្រុងព្រះសីហនុ។
សមត្ថកិច្ចចរាចរណ៍ផ្លូវគោកខេត្តព្រះសីហនុបានឲ្យដឹងថា៖ ករណីគ្រោះថ្នាក់ចរាចរណ៍ដ៏រន្ធត់នេះបង្កឡើងដោយខ្លួនឯង ខណៈពេលជនរងគ្រោះទាំងពីរជិះម៉ូតូចេញមកពីហូបការហើយធ្វើតំណើរកាន់លំនៅដ្ឋានវិញ ក្នុងទិសដៅពីលិចទៅកើត ហើយបានជ្រុលចង្កូតបុករបាំងចែកទ្រូងផ្លូវ និងខ្ទាតទៅបុកបង្គោលភ្លើងបោកក្បាលនឹងរបាំងស៊ីម៉ង់ត៍ចែកទ្រូងផ្លូវ រងរបួសធ្ងន់ តែត្រូបានស្លាបទាំងពីរនាក់ ក្នុងមន្ទីពេទ្យ។ ជនរងគ្រោះទាំង២នាក់មានឈ្មោះ កោះ ដៀវ ភេទ ប្រុសអាយុ២៩ឆ្នាំ មុខរបរជាងសំណង់ ជាអ្នកបើកម៉ូតូម៉ាកហុងដាពណ៌ខ្មៅពាក់ស្លាកលេខ ព្រះសីហនុ 1D 2994។ រីឯជនរងគ្រោះម្នាក់ទៀតមានឈ្មោះ ពៅ អាយុ៤៤ ឆ្នាំ មានទីលំនៅក្រោយសកលវិទ្យាល័យបៀលប្រាយ ស្ថិតក្នុងភូមិ៥ សង្កាត់លេខ៤ ក្រុងព្រះសីហនុ។
ដោយឡែកយោងតាមប្រភពពីសាក្សីនៅកន្លែងកើតហេតុបានឲ្យដឹងថា នៅមុនកើតហេតុបន្តិចគេបានឃើញម៉ូតូមួយគ្រឿងជិះគ្នា២នាក់ ក្នុងទិសដៅពីលិចទៅកើត ដោយមានល្បឿនលឿនដូចហោះ ខណៈពេលមកដល់ចំណុចកើតហេតុ ដែលជាផ្លូវកោង ម៉ូតូជនរងគ្រោះក៏បានជ្រុលទៅបុកខឿនចែកផ្លូវខ្ទាតទៅបោកជាមួយបង្គោលភ្លើង បណ្តាលអោយប៉ើងទាំងមនុស្សប៉ើងទាំងម៉ូតូ បោកក្បាលរបួសធ្ងន់ធ្ងរ។ គេឃើញថាជនរងគ្រោះពុំមានពាក់មួកសុវត្តិភាពទេ ដោយដេកដួលក្នុងថ្លុកឈាមគួរអោយញាក់សាច់។
សូមបញ្ជាក់ផងដែរជនរងគ្រោះដែលបានបាត់បង់ជីវិតទាំងពីរ គឺជាបងប្អូនជាដូនមួយនឹងគ្នា។ នៅមុនកើតហេតុជនរងគ្រោះទាំងពីរទើបតែចេញពីចូលរួមបង្គលការគេ ហើយនៅពេលត្រឡប់មកផ្ទះវិញក៏ជួបគ្រោះថ្នាក់តែម្តង។ ហើយករណីនេះសមត្ថកិច្ចមិនបានបញ្ជាក់ទេថា ជនរងគ្រោះបើកបរជួបគ្រោះថ្នាក់នេះបណ្តាលមកពីផឹងគ្រឿងស្រវឹងក្នុងពិធីហូបអាហារក្នុងមង្គលការ ឬយ៉ាងណានោះទេ។
ក្រោយកើតហេតុសាកសពទាំងពីរត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណីនៅឯគេហដ្ឋាន រៀងៗខ្លួន៕ ដោយ កោះរ៉ុង
