វិទ្យាស្ថានប៉ាស្ទ័រកម្ពុជា រកឃើញចំនួនអ្នក ផ្ទុកមេរោគអេដស៍នៅ បាត់ដំបងកើនដល់១៤០នាក់
Monday 22/12/2014 Time : 08 : 23 am
ភ្នំពេញ៖វិទ្យាស្ថានប៉ាស្ទ័រកម្ពុជាដែលមានជំនាញខាងពិនិត្យឈាមរកឃើញថាចំនួនអ្នកផ្ទុកមេរោគអេដស៍នៅស្រុកសង្កែ ខេត្តបាត់ដំបង កើនឡើង។ការរកឃើញនេះ បន្ទាប់ពីក្រសួងសុខាភិបាលបញ្ជូនសំណាកឈាមរបស់ប្រជាពលរដ្ឋមកពិនិត្យរកមេរោគអេដស៍នៅវិទ្យាស្ថានប៉ាស្ទ័រ។
នាយកវិទ្យាស្ថានប៉ាស្ទ័រកម្ពុជា លោកវេជ្ជបណ្ឌិត ដេលីយ៉េ ហ្វង់តេនីល (Didier Fontenille) ប្រាប់អ្នកកាសែតក្នុងស្រុកថាអ្នកផ្ទុកមេរោគអេដស៍ឃុំរកា ស្រុកសង្កែ នៅខេត្តបាត់ដំបងកើនឡើងរហូតដល់ ១៤០នាក់ហើយ នៅរសៀលថ្ងៃទី២០ ខែធ្នូ។ចំនួននេះអាចនឹងកើនឡើងបន្តទៀត នៅពេលពលរដ្ឋកាន់តែច្រើនសម្រុកធ្វើតេស្តឈាមរកមេរោគអេដស៍នោះ។
លោក មាន ឈីវុន អះអាងថា ចំនួនអ្នកផ្ទុកមេរោគអេដស៍នៅខេត្តបាត់ដំបងអាចតិចជាងចំនួនដែលនាយកវិទ្យាស្ថានប៉ាស្ទ័រកម្ពុជាបញ្ជាក់ប្រាប់អ្នកកាសែត។ លោកបញ្ជាក់ថា ក្រសួងសុខាភិបាលត្រូវរង់ចាំការសិក្សាស្រាវជ្រាវចប់សព្វគ្រប់ទើបអាចបង្ហាញព័ត៌មានទាំងអស់ជាសាធារណៈបាន។
ចំនួនអ្នកផ្ទុកមេរោគអេដស៍នៅខេត្តបាត់ដំបង ត្រូវបានរកឃើញថាមានចំនួន ១០៦នាក់ កាលពីថ្ងៃទី១៧ ខែធ្នូ។ នៅថ្ងៃទី១៨ ខែធ្នូសម្តេច នាយករដ្ឋមន្ត្រី ហ៊ុន សែន បានថ្លែងជាសាធារណៈថាសម្តេច មិនជឿថារឿងនេះជាការពិតនោះទេ។ លោកថែមទាំងសង្ស័យថាម៉ាស៊ីនពិនិត្យឈាមមានបញ្ហាទៀតផង។ បន្ទាប់ពីនោះមកអាជ្ញាធររាជរដ្ឋាភិបាលក៏បានព្យាយាមលាក់បាំងតួលេខនៃអ្នកឆ្លងថ្មីតែម្តង។ក្រុមអង្គការសង្គមស៊ីវិលស្នើឲ្យរាជរដ្ឋាភិបាលទទួលខុសត្រូវចំពោះរឿងនេះដោយបើកចំហព័ត៌មានទាំងអស់ ដើម្បីងាយស្រួលសិក្សាស្រាវជ្រាវនិងរកដំណោះស្រាយ៕
ដោយៈ សូសៀង
រៀបចំដោយៈ សុខុម
By: khmeronlinenews.com
http://ift.tt/eA8V8J
