ប៉េអឹមចាប់វាយខ្នោះ ដោយសារនាំកូនក្រមុំគេដើរលេង ចូលខារ៉ាអូខេ និងដេកផ្ទះសំណាក់
ខេត្តបន្ទាយមានជ័យ៖ កម្លាំងកងរាជអាវុធហត្ថក្រុងប៉ោយប៉ែតតាមប្រមាញ់ជនសង្ស័យ៣នាក់បានលួចនាំក្មេងស្រី អនីតិជនអាយុ១២ឆ្នាំម្នាក់ ចាកចេញពីផ្ទះដើរលេងតាមក្លឹប តាមខារ៉ាអូខេ និងដេកតាមផ្ទះសំណាក់ បន្ទាប់ពីឪពុកម្តាយបានទៅដាក់ពីពាក្យបណ្តឹងនៅទីបញ្ជាការដ្ឋានកងរាជអាវុធហត្ថក្រុង លោក ជា ដា កងរាជអាវុធហត្ថក្រុងប៉ោយប៉ែតដឹកនាំកម្លាំងផ្ទាល់បានក្រសោបចាប់បានជនសង្ស័យ បានសម្រេចកាលពីវេលាម៉ោង៦ល្ងាច កាលពីថ្ងៃទី១៨ ខែធ្នូ ឆ្នាំ២០១៤ ត្រង់ចំណុចភូមិប្រជាធម្ម សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចបានឲ្យដឹងថា ក្រោយពីបានទទួលពាក្យបណ្តឹង ពីឪពុកម្តាយក្មេងស្រី ដោយមិនដឹងថា កូនខ្លួនទៅណាមកណា និងការភ័យខ្លាច និងមានគ្រោះថ្នាក់ អ្វីកើតឡើង ចំពោះកូនស្រី ទើបសម្រេចចិត្ត មករកសមត្ថកិច្ច ឲ្យជួយអន្តរាគមន៍តែម្តង។ ពេលនោះ សមត្ថកិច្ច បានតាមដានស្រាវជ្រាវ ឈានទៅឃាត់ខ្លូន ជនសង្ស័យ៣នាក់ បញ្ជូនមកកាន់មូលដ្ឋានអាវុធហត្ថ ក្រុងប៉ោយប៉ែត ដើម្បីសួរនាំ និងបានសារភាពថា ពួកខ្លួនពិតជា បាននាំក្មេងស្រីខាងលើ ដើរលេងប្រាកដមែន។
ជនសង្ស័យទាំង៣នាក់ដែលជាប់ចោទពីបទនាំកូនគេចេញពីផ្ទះដើភ្លើតភ្លើនគឺ ទី១, ឈ្មោះ ជា ពន្លឺ ភេទប្រុស អាយុ១៧ឆ្នាំ ទី២,ឈ្មោះ គឹម លុយ ភេទស្រី អាយុ១៧ឆ្នាំ ទី៣,ឈ្មោះ វុយ ពិសី ភេទស្រី អាយុ១៧ឆ្នាំ ជនសង្ស័យខាងលើនេះមានលំនៅដ្ឋានភូមិកើតហេតុខាងលើ ចំណែកឯក្មេងស្រី រងគ្រោះ មានឈ្មោះ ព្រំ សីហា ភេទស្រី អាយុ១២ឆ្នាំ រស់ភូមិជាមួយគ្នា ។
បើតាមការអះអាងពីក្មេងស្រី រងគ្រោះ មានឈ្មោះ ព្រំ សីហា ភេទស្រី អាយុ១២ឆ្នាំបានប្រាប់ថា កាលពីថ្ងៃទី១៦ ខែធ្នូ ជនទាំង៣នាក់ខាងលើនេះបាននាំគេទៅដើរលេង នៅតាមក្លិប តាមរ៉ាអូខេ និងបាននាំគ្នាទៅ ដេកនៅតាម ផ្ទះសំណាក តែទោះបីជាយ៉ាងណា ខ្លួនពុំមានអ្វីខូចខាត់ ឬបាត់បង់អ្វីនោះដែរ ។
ក្រោយពីបានឃាត់ខ្លួនជនសង្ស័យកម្លាំងកងរាជអាវុធហត្ថក្រុងប៉ោយប៉ែត បាននាំខ្លួនយកមកសួរចម្លើយ ហើយ បានសារភាព ថាពួកខ្លួនពិតជាបាននាំក្មេងស្រីខាងលើដើរលេងពិតប្រាកដមែន។ បច្ចុប្បន្នសមត្ថកិច្ចជំនាញបានសាងសំណំរឿងបញ្ជូនជនសង្ស័យខាងលើនេះទៅកាន់សាលាដំបូងខេត្តចាត់ការតាមនិតិវិធីច្បាប់៕ ដោយយីហាំង
