ជិះម៉ូតូពេលយប់ ទៅបុកគូថរថយន្តឈប់ដូរកង់ ពីក្រោយស្លាប់ម្នាក់របួសធ្ងន់ម្នាក់
ខេត្តកំពង់ឆ្នាំង៖ យុវជនម្នាក់បានស្លាប់ បន្ទាប់ពីបានបញ្ជូនដល់មន្ទីរពេទ្យខេត្ត និងបុរសម្នាក់ទៀតបានរងរបួសធ្ងន់ ខណៈ ដែលពួកគេជិះម៉ូតូ នៅពេលយប់ ទៅបុកគូថរថយន្ត ដែលចត ដូរកង់នៅលើដងផ្លូវជាតិ។ ហេតុការណ៍នេះបានកើតឡើងនៅវេលាម៉ោង១១ និង១០នាទីយប់ ថ្ងៃទី១៤ ខែធ្នូ ឆ្នាំ២០១៤ នៅតាមបណ្តោយផ្លូវជាតិលេខ៥ ក្បែរស្ពានស្វាយទង ស្ថិតនៅក្នុង ភូមិព្រៃកោះ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
លោក សឿង រុណ អធិការរងទទួលផ្នែកចរាចរណ៏ផ្លូវគោកប្រចាំស្រុករលាប្អៀរ បាន អោយដឹងថា៖ ជនរងគ្រោះដែលបានស្លាប់ក្នុងហេតុការណ៏ខាងលើនេះ មានឈ្មោះ ហ៊ុល ហុកថៃ អាយុ២៤ឆ្នាំ មានទីលំនៅក្នុងភូមិអណ្តូងស្នាយ ឃុំអណ្តូងស្នាយ ស្រុករលាប្អៀរ ជា អ្នកបើកម៉ូតូ បុរសដែលរងរបួសធ្ងន់ឈ្មោះ កែវ សុផល អាយុ៤៣ឆ្នាំ មានទីលំនៅឯខេត្តតាកែវ ។
លោកបន្តថា៖ នៅមុនពេលកើតហេតុមានរថយន្ត១គ្រឿងម៉ាក ហ៊ីយ៉ាន់ដាយ ពណ៌ស ពាក់ស្លាកលេខ កណ្តាល3A.0476 ដឹកអុសពីខេត្តពោធិសាត់ទៅភ្នំពេញ លុះមកដល់ចំណុច ខាងលើរថយន្តបានបែកកង់ក្រោយផ្នែកខាងឆ្វេង ហើយក៏បានឈប់ចតដើម្បីដូរកង់ ។ខណៈ នោះជនរងគ្រោះទាំង២នាក់ បានជិះម៉ូតូ១គ្រឿង ម៉ាកC125ពណ៌ខ្មៅ ពាក់ស្លាក់លេខកំពង់ ឆ្នាំង 1A 9520ឌុបគ្នាធ្វើដំណើរពីត្បូងទៅជើង ពេលជិះមកដល់ចំណុចកើតហេតុ ក៏បុកគូថ រថយន្ត ពីក្រោយបណ្តាលអោយជនរងគ្រោះដែលស្លាប់បុកដើមទ្រូង ចំដែកទ្រុងរថយន្តបែក ទ្រូង និងបាក់ឆ្អឹងជំនីស្លាប់ពេលបញ្ជូនជិតដល់មន្ទីរពេទ្យខេត្ត ។ ដោយឡែកបុរសដែលរង របួសធ្ងន់ ត្រូវចំក្បាលពីក្រោយ និងដៃជើងត្រូវគេបញ្ជូនទៅមន្ទីរពេទ្យក្រុងភ្នំពេញ។ ចំណែកអ្នកបើកបររថយន្តពេលឃើញហេតុការណ៏ខាងលើនេះក៏បានរត់គេចខ្លួនបាត់ទុកចោលរថយន្ត។
រថយន្តនិងម៉ូតូក្នុងគ្រោះថ្នាក់នេះ ត្រូវបានសមត្ថកិច្ចអូសយកមករក្សាទុកនៅអធិការដ្ឋាន នគរបាលស្រុករលាប្អៀររង់ភាគីទាំងសងខាងចូលខ្លួនមកធ្វើការដោះស្រាយតាមផ្លូវច្បាប់៕ . ដោយ រិទ្ធិ ជ័យ
