ក្មេងស្ទាវជិះម៉ូតូ បុកជិះម៉ូតូចំបុរសចំណាស់ម្នាក់បណ្តាលឲ្យ របួសបាក់ក្តោងច្រមុះនិងដាច់ចឹញ្ចើម
ខេត្តព្រះសីហនុ៖ បុរសវ័យចំណាស់ម្នាក់ បានរងរបួសបាក់ក្តោងច្រមុះ និងដាច់ចឹញ្ចើមខណៈកំពុងជិះម៉ូតូ ស្រាប់តែម៉ូតូកម្មករបស់សិប្បកម្មតំបូល isi steel សាខាខេត្តព្រះសីហនុ បើកបរយ៉ាងលឿនមបុកចំពេញទំហឹងធ្វើខ្ទាតជាច្រើនម៉ែត្រ។ ភ្លាមនោះជនបង្កបានជិះម៉ូតូគេខ្លួនបាត់ស្រមោល បន្សល់ទុកតែអ្នករួមតំណើរម្នាក់។ ហេតុការណ៍គ្រោះថ្នាក់ចរាចរណ៍នេះ បានកើតឡើងវេលាម៉ោង២១ និង០០នាទី យប់ថ្ងៃទី១៨ ខែធ្នូ ឆ្នាំ២០១៤ នៅចំណុចស្តុបអូគីណាវ៉ា ស្ថិតក្នុងភូមិ១សង្កាត់លេខ២ ក្រុងព្រះសីហនុ។
ប្រភពសមត្ថកិច្ចបានឲ្យដឹងថា ជនរងគ្រោះក្នុងហេតុការណ៍គ្រោះថ្នាក់ចរាចរណណ៍នោះមានឈ្មោះ ជួន ឆាយ អាយុជាង៥៤ឆ្នាំ មានទីលំនៅភូមិ៣ សង្កាត់លេខ៤ ក្រុងព្រះសីហនុ រងរបួសបាក់ក្តោងច្រមុះ និង បែកចឹញ្ចើមហូរឈាមជោគប្រាណ។ ជនរងគ្រោះជិះម៉ូតូម៉ាក ស្មាសរីវូពណ៌ខ្មៅ ពាក់ស្លាកលេខ ព្រះសីហនុ 2C-9628 ។ ចំណែកជនបង្កឈ្មោះ ដន អាយុជាង២០ឆ្នាំ ជិះម៉ូតូម៉ាកហុងដា ពណ៌ខ្មៅ គ្មានស្លាក ឌុបយុវជនម្នាក់ឈ្មោះ កុន ដំ អាយុ១៧ឆ្នាំ ពួកគេទាំងពីនាក់ជាកម្មករសិប្បកម្មតំបូល។ បន្ទាប់ពីជិះម៉ូតូបុកជនរងគ្រោះ ជនបង្ក ឈ្មោះ ដន បើកម៉ូតូគេចខ្លួនបាត់ស្រមោល តែបានបន្សល់ទុក អ្នកជិះពីក្រោយម្នាក់ឡើងជិះពុំទាន់ ហើយត្រូវបានសាច់ញាតិជនរងគ្រោះឃាត់ខ្លួន ទុកអោយសមត្ថកិច្ចប៉ូលិសសួរនាំ។
ប្រភពពីសាក្សីបានបញ្ជាក់ថា៖ នៅមុនកើតហេតុ គេបានឃើញបុរសវ័យចំណាស់រង គ្រោះ បានចូលទៅទិញនំប៉័ង នៅក្បែរកន្លែងកើតហេតុ ហើយបានជិះម៉ូតូចេញត្រឡប់ទៅផ្ទះវិញ។ តែនៅពេលជិះម៉ូតូចេញបានបន្តិច ក៏ស្រាប់តែមានម៉ូតូហុងដាពណ៌ខ្មៅ គ្មានស្លាកលេខជិះគ្នា២នាក់ក្នុងល្បឿនលឿនដូចហោះក្នុងទិសដៅពីកើតទៅលិច បានបើកមកបុកម៉ូតូជនរងគ្រោះ ចំពេញទំហឹង បណ្តាលអោយ បុរសរងគ្រោះខ្ទាតចេញពីម៉ូតូត្រឡប់ត្រឡិនជាច្រើនម៉ែត្រ។
ក្រោយកើតហេតុជនរងគ្រោះត្រូវបានសាច់ញាតិបញ្ជូនទៅសង្គ្រោះនៅគ្លីនិកឯកជនសេតេ។ ចំណែកម៉ូតូត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោកខេត្តរងចាំការដោះស្រាយនៅពេលបន្ទាប់៕ ដោយ កោះរ៉ុង
