នគរបាលព័ទ្ធចាប់យុវជនខ្មែរ សម្ងំជក់ថ្នាំញៀនបានម្នាក់ ២នាក់ទៀតរត់រួចតាមប្រឡោះជើងទៅបាត់
ខេត្តកំពង់ឆ្នាំង៖ យុវជនខ្មែម្នាក់ត្រូវបានសមត្ថកិច្ចព័ទ្ធចាប់ក្របួចបាន តែ២នាក់ទៀតបានរត់រួច ដែលក្រោយពីពួកគេចែកចាយថ្នាំញៀនរួច កំពុងតែនាំគ្នាសម្ងំជក់ថ្នាំញៀន នៅលើចង្កេះភ្នំសន្ទូចយ៉ាងត្រជាក់ចិត្ត។ សកម្មភាពបង្ក្រាបនេះបានធ្វើឡើងកាលពីវេលា ម៉ោង៤ និង១៥នាទីថ្ងៃទី២០ ខែធ្នូ ឆ្នាំ២០១៤ នៅក្នុងភូមិសន្ទូច ឃុំស្រែថ្មី ស្រុករលាប្អៀរ ខេត្តកំពង់ឆ្នាំង។
លោក ស សារិទ្ធ នាយប៉ុស្តិនគរបាលរដ្ឋបាលស្រែថ្មីបានអោយដឹងថា៖ ជនល្មើសដែលសមត្ថកិច្ចចាប់ខ្លួនបាននេះមានឈ្មោះ អេង រស្មី អាយុ២៤ឆ្នាំ រស់នៅភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង ចំណែកគ្នីគ្នាគេ២នាក់ទៀតមិនត្រូវបានស្គាល់ឈ្មោះនោះ ឡើយ។ មុនពេលបង្ក្រាប សមត្ថកិច្ចមានការសង្ស័យ និងបានតាមដានឃើញពួកគេកំពុងសេពថ្នាំញៀននៅចំណុចខាងលើ ខណៈនោះសមត្ថកិច្ចបានប្រើប្រាស់កម្លាំងចំនួន៥ នាក់ឡោមព័ទ្ធចាប់បានតែម្នាក់ អាពីនាក់ទៀតភ័យផ្អើលរត់លឿនដូចសត្វឈ្លូស គេចខ្លួនរួចបាត់ តែមិនយូរទេនឹងចាប់ប្របួចជាប់ជាមិនខាន។ ជាមួយគ្នានោះសមត្ថកិច្ចបានដកហូតថ្នាំញៀនម៉ាទឹកកកទៅមួយចំនួនផងដែរ។
ក្នុងពេលបង្ក្រាប សមត្ថកិច្ចបានរឹមអូសបានម៉ូតូម៉ាកស្មាស់វី០១៤ មួយគ្រឿងពាក់ ស្លាកលេខ កំពង់ឆ្នាំង1D-2014 ដែលជាម៉ូតូរបស់ឈ្មោះ អេង រស្មី,សម្ភារៈសំរាប់ជក់ថ្នាំញៀនចំនួន២សម្រាប់ផងដែរ និង បានកសាងសំណុំរឿងបញ្ជូនទៅកាន់អធិការដ្ឋាននគរបាលស្រុករលាប្អៀរ ចាត់ការបន្តតាមនីតិវិធី។
សូមបញ្ជាក់ផងដែរថា៖ក្នុងពិធីចែកអំណោយដល់ប្រេជាពលរដ្ឋក្រីក្រ និងជនរង គ្រោះដោយគ្រោះធម្មជាតិចំនួន៥០០នាក់ នៅសាលាស្រុករលាប្អៀរ កាលពីថ្ងៃទី១៨ ខែធ្នូ ឆ្នាំ២០១៤ លោក ឈួរ ច័ន្ទឌឿន បានមានប្រសាសន៍សង្កត់ធ្ងន់ចំពោះការចរាចរណ៍ថ្នាំញៀននៅតាមគ្រប់មូលដ្ឋាន ដោយឯ.ឧបានអំពាវនាវដល់ប្រជាពលរដ្ឋ អាជ្ញាធរមូលដ្ឋាន សមត្ថកិច្ចពាក់ព័ន្ធ យកចិត្តទុកដាក់ចូលរួមសហការគ្នាក្នុងការអនុវត្តគោលនយោបាយភូមិ ឃុំមានសុវត្តិភាពទាំង៩ចំណុច ទប់ស្កាត់ និងបង្ក្រាបអោយខានតែបាននូវមុខសញ្ញាជួញដូរចែកចាយទាំងអស់ដែលមាននៅក្នុងមូលដ្ឋានរបស់ខ្លួនអោយអស់ ព្រោះថ្នាំញៀនជា ថ្នាំដ៍សាហាវកំពុងបំផ្លាញអនាគតយុវវ័យ ដែលធនធានមនុស្ស និងជាទំពាំងស្នងឫស្សី របស់ប្រទេសជាតិ យ៉ាងគួរឲ្យព្រួយបារម្ភ។
ចេញពីករណីនេះបលរដ្ឋសំណូមពរ ឲ្យស្រាវជ្រាវចាប់ខ្លួនអ្នកដែលលក់ថ្នាំញៀនឲ្យពួក គេ និងត្រូវតែស្រាវជ្រាវបន្តៗឲ្យដល់ថៅកែមេក្លោងគ្រឿងញៀនធំបំផុតតើ វាជា នរណា ហើយត្រូវតែចាប់ខ្លួនពួកវាកាត់ទោស ព្រោះពួកវាជាពួកបំផ្លាញជាតិ៕ ដោយ រិទ្ធិ ជ័យ
