បើកឡាន និយាយទូរស័ព្ទក្នុងភាពស្រវឹង ហើយល្បឿនលឿនផង បានជ្រុលទៅបុករថយន្តកំពុងចតនៅចិញ្ចើមផ្លូវធ្លាក់ស្រះទឹកទាំងពីរ
ខេត្តបន្ទាយមានជ័យ៖ អ្នកបកបររវល់និយាយទូរស័ព្ទ លាយលំនឹងភាពស្រវឹង ហើយបើកបរលឿនផង បានជ្រុលទៅបុករថយន្ត មួយគ្រឿងចតនៅចិញ្ចើមផ្លូវធ្លាក់មាត់ស្រះ ចំណែករថយន្តបង្កបានធ្លាក់ក្នុងស្រះគ្មានទឹក ហើយតាំកុងឡានបង្កបានបើកទ្វាររត់គេចខ្លួនបាត់។ គ្រោះថ្នាក់នោះបានកើតឡើងវេលាម៉ោង៣ និង៣០នាទីថ្ងៃទី១៥ ខែធ្នូ ឆ្នាំ២០១៤ តាមបណ្តាលផ្លូវជាតិលេខ៥ នៅខាងលិចសាលាបឋមសិក្សាសាលាដែងស្ថិតនៅភូមិសាលាដែង ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
ប្រភពពីសមត្ថកិច្ចបានប្រាប់ឲ្យដឹងថា នៅមុនពេលគ្រោះថ្នាក់ចរាចរកើតឡើងគឺរថយន្តកាមរីស៊េរីឆ្នាំ១៩៩៥ ពណ៌ស ពាក់ស្លាកលេខបន្ទាយមានជ័យ2A-4506 បើកបរដោយឈ្មោះ ញ៉ឹក វិបុល ភេទប្រុស អាយុ៤៦ឆ្នាំ រស់នៅភូមិព្រះស្រែ ឃុំតាឡំ ស្រុកមង្គលបូរី បានចតរថយន្តចោលនៅចិញ្ចើមផ្លូវ បានដើរចូលទៅលេងផ្ទះមិត្តភក្តិ ស្រាប់តែមានរថយន្តកាមរីសេរីឆ្នាំ១៩៩៣ ពណ៌ខ្មៅ គ្មានផ្លាក់លេខដែលបើកបរទឹសដៅពីលិចទៅកើត រវល់តែនិយាយទូរស័ព្ទក្នុងសភាពស្រវឹងស្រា បើកក្នុងល្បឿនលឿនបានបុករថយន្ត ដែលចតចោលចំពីក្រោយបណ្តាលឲ្យធ្លាក់ចូលមាត់ស្រះខាងត្បូងផ្លូវ ដែលគ្មានទឹកតែមិនគ្រោះថ្នាក់ដល់អ្នកណាមួយឡើយ។ ភ្លាមនោះម្ចាស់រថយន្តបង្កបានរត់គេចខ្លួនបាត់ស្រមោលតែម្តង ដែលពុំមានអ្នកស្គាល់ឡើយ បង្សលទុកតែរថយន្តនៅកន្លែងកើតហេតុ។
ក្រោយពីកើតហេតុសមត្ថកិច្ចបានចុះមកត្រួតពិនិត្យនៅចំណុចកើតហេតុ និងទំនាក់ទំនងម្ចាស់យន្តរងគ្រោះផងដែរ។ ក្រោយពេលពិនិត្យហើយសមត្ថកិច្ចបានសន្ទូចរថយន្តទាំងពីរ យកទៅរក្សាទុកបណ្តុះអាសន្ន នៅឯអធិការដ្ឋាននគរបាលស្រុកមង្គលបូរី ដើម្បីរង់ចាំការចូលខ្លួនដោះស្រាយគ្នាទៅតាមច្បាប់៕ ដោយ យីហាំង
