បុរសម្នាក់ បាក់ជើងឆ្វេង និងផុងលលាដ៍ក្បាល ដោយសារកំពុងជិះម៉ូតូ ត្រូវបានរថយន្តបញ្ច្រាសទិសបុកចំពេញទំហឹង ខ្ទាតផ្លោងចេញពីម៉ូតូជាច្រើនម៉ែត្រ
ខេត្តព្រះសីហនុ៖ បុរសម្នាក់បានរងរបួសធ្ងន់ បាក់ជើងឆ្វេង និងផុងលលាដ៍ក្បាល ខណៈកំពុងជិះម៉ូតូ ត្រូវបានរថយន្តកំពុកបើកបរបញ្ច្រាសទិសបុកចំពេញទំហឹងខ្ទាតផ្លោងចេញពីម៉ូតូជាច្រើនម៉ែត្រ ដែលហេតុការណ៍គ្រោះថ្នាក់នេះបានកើតឡើង កាលពីវេលាម៉ោង១៥ និង១៥នាទីរសៀលថ្ងៃទី១១ខែធ្នូឆ្នាំ២០១៤ នៅចំណុចក្បែរធនាគារ FTB ស្ថិតក្នុងភូមិ២ សង្កាត់លេខ២ក្រុងព្រះសីហនុ។
ប្រភពពីសាក្សីនៅកន្លែងកើតហេតុបានអះអាងថា នៅមុនកើតហេតុបន្តិច គេបានឃើញម៉ូតូមួយគ្រឿងជិះដោយជនរងគ្រោះ ក្នុងទិសដៅពីជើងទៅត្បូង (ផ្លូវត្រង់) ក្នុងល្បឿនយឺតៗ រហូតមកដល់ចំណុចកើតហេតុត្រង់ផ្លូវបំបែកជាបួន ក៏ស្រាប់តែមានរថយន្តមួយគ្រឿង ដែលគេស្គាល់យ៉ាងច្បាស់ថា ជារថយន្តរបស់អាចារ្យចិនផ្ទះនៅក្បែរ បើកក្នុងទិសដៅពីកើតទៅលិច បានជ្រុលទៅបុកម៉ូតូពេញទំហឹង បណ្តាលអោយ ម៉ូតូខ្ទាតចេញពីរថយន្ត ហើយម៉ូតូ ត្រូវបានរថយន្តកិនពីលើ ខូចខាតយ៉ាងដំណំ។ ក្រោយកើត ហេតុខាងរថយន្តពុំបានឈប់មើលម៉ូតូនោះទេ ដោយបានបន្ថែមល្បឿនទៅមុខ រហូតដល់ផ្ទះទើបឈប់រួចដើរចូលផ្ទះធ្វើជាមិនដឹងអ្វីទាំងអស់។ ប្រការនេះហើយបានធ្វើអោយអ្នកបាន ឃើញហេតុការណ៏ហាក់មានការហួសចិត្ត មិននឹកស្មានថាលោកតាអាចារ្យចិន មានវ័យចំណាស់ទៅហើយនេះ បែរជាគ្មានសីលធម៌ អាណិតអាសូរជនរងគ្រោះ បន្តិចសោះ ដែលធ្វើឲ្យអ្នកគ្រប់ៗគ្នាបានឃើញហេតុការណ៍នោះ រិះគន់គ្រប់ៗគ្នា អំពីទង្វើរបស់គាត់ហើយគេចាំមើលថាគាត់អាចគេចផុតពីសំណាញច្បាប់បានដែរឬទេ?។
ប៉ូលីសចរាចរណ៍បានឲ្យដឹងថា ជនរងគ្រោះ ឈ្មោះអៀក្រយ៉ង សិដ្ឋ ភេទ ប្រុស អាយុ២៨ឆ្នាំ ជាបុគ្គលិកកាស៊ីណូ ដាយមិនស៊ី មានទីលំនៅភូមិ៣ សង្កាត់លេខ៣ ក្រុងព្រះសីហនុ បានរងរបួសធ្ងន់បាក់ជើងឆ្វេងផុងលលាដ៏ក្បាល ខណៈកំពុងបើកបរម៉ូតូ ម៉ាក់គុបជ្រុងពណ៌ប្រផេះ ពាក់ស្លាក លេខកំពង់ធំ 1F5828 ក្នុងទិសដៅពីជើងទៅត្បូង ត្រូវបានរថយន្តម៉ាក វីស្តូ ពណ៌ផ្ទៃមេឃ គ្មានស្លាកលេខ បើកបរដោយបុរសវ័យចំណាស់ម្នាក់ឈ្មោះ ស៊ូ យ៉ីវ ភេទប្រុស អាយុ៦៦ឆ្នាំ មានទីលំនៅភូមិ២សង្កាត់លេខ២ ក្រុងព្រះសីហនុ មានមុខរបរជាអាចារ្យការប្រពៃណីចិន បើកបរក្នុងទិសដៅពីកើតទៅលិច បានជ្រុលទៅបុកជាមួយម៉ូតូជនរងគ្រោះ បណ្តាលឲ្យខ្ទាតជាច្រើនម៉ែត្រ។
ក្រោយកើតហេតុជនរងគ្រោះត្រូវបានរថយន្តសង្គ្រោះដឹកមកសង្គ្រោះបន្ទាន់នៅគ្លីនិចឯកជន សេតេ ឯម៉ូតូ និងរថយន្តត្រូវបាន ប៉ូលិសចរាចរណ៍យកទៅរក្សាទុកនៅការិយាល័យចរាចរណ៍ផ្លូវគោកខេត្ត រងចាំការដោះស្រាយនៅពេលក្រោយ៕ដោយ កោះរ៉ុង
