រថយន្តឡង៉គ្រឺស័រ បុករថយន្តដឹកទំនិញ បណ្តាលឲ្យមនុស្ស៤នាក់របួសធ្ងន់ស្រាល
ខេត្តបន្ទាយមានជ័យ៖ គ្រោះថ្នាក់ចរាចរណ៍ដ៏ញាក់សាច់មួយ កើតឡើងរវាងរថយន្តទំនើប ឡង៉គ្រឺស័រ បើកលឿនជ្រុលចង្កូតទៅបុករថយន្តដឹកទំនិញ បណ្តាលឲ្យអ្នកនៅក្នុងរថយន្ត៤នាក់រងរបួសធ្ងន់ស្រាល តែសំណាងល្អពេកហើយពុំមានអ្នកស្លាប់ ។ ហេតុការណ៍នេះកើតឡើងនៅចំណុចខាងត្បូងសាលាសង្កាត់ផ្សារកណ្តាលប្រមាណជា១០០ នៅវេលាម៉ោង៤ និង៤០នាទីល្ងាច កាលពីថ្ងៃទី៩ ខែមករា ឆ្នាំ២០១៥ ស្ថិតនៅភូមិ-សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
បើតាមប្រភពពីកន្លែងកើតហេតុបានឲ្យដឹងថា មុខកើតហេតុគេឃើញរថយន្តឡង់គ្រឺស័រ ពណ៌ខ្មៅ ពាកស្លាកលេខ ភ្នំពេញ2I-8825 បើកពីជើងទៅត្បូង លុះមកដល់ចំណុចកើតហេតុបានបុករថយន្តដឹកទំនិញម៉ាកនីសាន្ស ពណ៌ស ពាក់ស្លាកលេខភ្នំពេញ 2D-4714 បើកបញ្ច្រាសទិសគ្នាចំមុខ បណ្តាលអោយមនុស្សរងរបួសធ្ងន់ស្រាល៤នាក់ ត្រូវបានសមត្ថកិច្ចបានហៅរថយន្តសង្គ្រោះបន្ទាន់បញ្ជូនទៅកាន់មន្ទីរពេទ្យបង្អែកប៉ោយប៉ែត ។ ក្រោយពីកើតហេតុ សមត្ថកិច្ចនគរបាលចរាចណ៍ចុះមកវាស់វែងនិងស្ទួចយករថយន្តទៅរក្សាទុកនៅអធិការដ្ឋាននគរបាលក្រុងប៉ោយប៉ែត រងចាំការដោះស្រាយគ្នាតាមនិតិវិធីច្បាប់។
លោកអ៊ុំ សុផលអធិការក្រុងប៉ោយប៉ែតបានប្រាប់តាមរយទូរស័ព្ទនៅរសៀលថ្ងៃទី១០ ខែមករា ឆ្នាំ២០១៥ អោយដឹងថា រថយន្តរងគ្រោះនីសាន់ បើកបរដោយឈ្មោះ សារិន នីម ភេទប្រុស អាយុ២៧ឆ្នាំ មុខរបកម្មករ បណ្តាលអោយរងរបួសស្រាល និងអ្នករួមដំណើរ២នាក់ទៀតឈ្មោះ ឡេង ឡុង ភេទប្រុស អាយុ២៤ឆ្នាំ មុខរបកម្មករ បណ្តាលអោយរងរបួសស្រាល និងឈ្មោះ ហ៊ុយ សាវ៉ាន់ភេទប្រុស អាយុ៣០ មុខរបកម្មករ បណ្តាលអោយរងរបួសធ្ងន់ត្រង់ជើង អ្នកទាំងអស់នេះរស់នៅភូមិអូរជ្រៅ សង្កាត់ផ្សារកណ្តាល ក្រុងប៉ោយប៉ែត ។
ចំណែករថយន្តបង្កឡង់គ្រឺស័រ បើកបរដោយឈ្មោះ សើង សាវី ភេទប្រុស អាយុ៤៧ ឆ្នាំ អត់រងរបួសទេ និងអ្នករួមដំណើរជា ម្តាយឈ្មោះឌិត គឹមណាត អាយុ៦៥ឆ្នាំ បណ្តាលអោយរងរបួសធ្ងន់ អ្នកទាំង២ រស់នៅភូមិថ្មី ឃុំម៉ាឡៃ ស្រុកម៉ាឡៃ ខេត្តបន្ទាយ មានជ័យ៕ ដោយយីហាំង
