ដាវសាំម៉ូរ៉ៃ កាំបិត ពូថៅ ចំពាមកៅស៊ូ សមត្ថកិច្ចបានដកហូត ក្នុងពេលប្រតិបត្តិការឆែកឆេរ អាវុជជាតិ ផ្ទុះពេលយប់ ក្នុងរយៈពេល១ខែ នៅទូទាំងខេត្តកំពង់ឆ្នាំង
ខេត្តកំពង់ឆ្នាំង៖ នៅក្នុងការពង្រឹងការអនុវត្តន៍ គោលនយោបាយភូមិឃុំមានសុវត្ថិភាព រយៈពេល១ ខែ គិតពីថ្ងៃទី១០ ខែវិច្ឆិកា ដល់ថ្ងៃទី០៧ ខែធ្នូ ឆ្នាំ២០១៤ ការិយាល័យគ្រប់គ្រងអាវុធជាតិផ្ទុះ នៃស្នងការដ្ឋាននគរបាលខេត្តកំពង់ឆ្នាំង បានធ្វើការត្រួតពិនិត្យដកហូតបាននូវប្រភេទអាវុធដាក់តាមខ្លួនមួយចំនួនដូចជា កាំបិត ដាវ ពូថៅ កន្ត្រៃ ច្រវ៉ាក់ចំពាម។ល។ រាប់សិបដើមពីអ្នកដើរលេងពេលយប់។
លោកវរសេនីយ៍ត្រី កែវ ឈុន នាយការិយាល័យគ្រប់គ្រងអាវុធជាតិផ្ទុះបាននិ យាយអោយដឹងនៅព្រឹកថ្ងៃទី៣១ ខែធ្នូ ឆ្នាំ២០១៤ អោយដឹងថា៖ ក្នុងរបាយការណ៍បូកសរុបរបស់ការិយាល័យគ្រប់គ្រងអាវុធជាតិផ្ទុះនៃស្នងការដ្ឋាននគរបាលខេត្ត ចាប់ពីថ្ងៃទី១០ ខែវិច្ឆិកា រហូតដល់ថ្ងៃទី០៧ ខែធ្នូ ឆ្នាំ២០១៤នេះ កំលាំងចំរុះបានចុះចល័តត្រួតពិនិត្យអាវុធជាតិផ្ទុះពេលយប់បានចំនួន៨៤លើក។ជាលទ្ធផលគឺដកហូតបាន ដាវសាំម៉ូរ៉ៃចំនួន១៦ដើម,កាំបិតប៉ាំងតោ៣,កាំបិតស្នៀត២,កាំបិតចិត្តបន្លែ៨,កាំបិតត្នោត៣,កាំបិតបន្ទួស១,កាំបិតចំពុះទង់៣,កណ្តៀវ២,ចំពាមកៅស៊ូ៨,កន្ត្រៃ១០,ច្រវ៉ាក់៩, ស្នាប់ដៃ៥,ដែកបំពង់ទីប២,ដែកស្រួច១,បំពង់ពីរកំណាត់១,ព្រមទាំងឃាត់ខ្លួនជនសង្ស័យ ប្រើប្រាស់ថ្នាំញៀនបានចំនួន២នាក់ និងដកហូតថ្នាំញៀនប្រភេទម៉ាទឹកកកបានចំនួន២កញ្ចប់តូច,ម៉ូតូ១គ្រឿង,ទូរស័ព្ទដៃ៣គ្រឿង,ប្រគល់ជូនការិយាល័យប្រឆាំងគ្រឿងញៀនចាត់ការបន្ត។
ក្នុងពេលប្រតិបត្តការ ត្រួតពិនិត្យអាវុធជាតិផ្ទុះ កំលាំងចំរុះបានដកនូវអាវុធទាំងនេះពីក្រោមគោយន្ត ក្រោមកែបម៉ូតូ ដែលពួកគេបានដាក់តាមសំរាប់តតាំងជាមួយគូជំលោះរបស់ខ្លួននៅពេលមានទំនាស់ក្នុងពិធីរាំធុងបាស ពិធីបុណ្យទាន និងការប្រគំតន្ត្រីជាដើម។
ក្រោយពីមានការត្រួតពិនិត្យអាវុធជាតិផ្ទុះពេលយប់ជាប្រចាំរួចមក គេសង្កេតឃើញថាករណីបទល្មើសដែលស្តែងចេញពីអំពើហិង្សាមានការថយចុះគួអោយកត់សម្គាល់។សន្តិសុខសុវត្ថិភាពនៅគ្រប់មូលដ្ឋាន គឺជាកត្តាចាំបាច់បំផុតសំរាប់ជីវភាពរស់នៅរបស់ប្រជាពលរដ្ឋ ដែលចាំបាច់ស្នងការដ្ឋាននគរបាលខេត្តកំពង់ឆ្នាំងបានសហការជាមួយបញ្ជាការដ្ឋានកងរាជអាវុធហត្ថខេត្ត នឹងនៅតែបន្តចុះត្រួតពិនិត្យនៅតាមគោលដៅជាច្រើនទៀត ដើម្បីរឹតបណ្តឹងក្នុងការរក្សាសន្តិសុខ សុវត្តិភាពក្នុងមូលដ្ឋានក្រុងកំពង់ឆ្នាំង ដោយបង្កើន ការចុះត្រួតពិនិត្យអាវុធជាតិផ្ទុះទៅលើគ្រប់មធ្យោបាយគ្រប់ប្រភេទ ដែលធ្វើដំណើរនៅពេលយប់ និងដកហូតអាវុធដែលមានគ្រោះថ្នាក់ដល់មនុស្ស៕ ដោយ រិទ្ធិ ជ័យ
