ឧកញ៉ា សឹង សំអុល នៅតែបន្តដឹកឈើគ្មានច្បាប់យកទៅលក់ឲ្យវៀតណាម ចេញតាមច្រករបៀងនានាខេត្តត្បូងឃ្មុំ ដោយមានការជួយសម្រួលសព្វបែបយ៉ាងពីសមត្ថកិច្ចជំនាញ និងអាជ្ញាធរខេត្តយ៉ាងរលូន
ខេត្តត្បូងឃ្មុំ ៖ មានសេចក្តីរាយការណ៍ពីស្រុកមេមត់ឲ្យដឹងថា រថយន្តប្រភេទយីឌុប ១គ្រឿង ក្បាលពណ៌ក្រហមលាយស ពាក់ស្លាកលេខកំពង់ចាម 3A-3461 ផ្ទុកឈើលេខ១ប្រភេទសុក្រំ ដែលមានមុខកាត់ធំៗពេញប្រៀប ចំណុះផ្ទុកមិនក្រោម៤០ម៉ែត្រគុបឡើយ។ រថយន្តនេះបានស្ថិតក្រោមការតាមប្រមាញ់ពីក្រុមអ្នកសារព័ត៌មានចេញពីស្រុកស្នួល ខេត្តក្រចេះ ហើយបានបើកគេចចូលជ្រកក្នុងបរិវេណវត្តជាំខ្យង ភូមិជាំខ្យង ឃុំមេម៉ង ស្រុកមេមត់ ខេត្តត្បូងឃ្មុំ កាលពីរសៀល ថ្ងៃទី១៦ ខែមករា ឆ្នាំ២០១៥ ខណៈកំពុងតែបែកការនេះ គេមិនហ៊ានបើកចេញទៅកាន់ច្រកគោលដៅឆ្លងទៅវៀតណាមទាំងថ្ងៃនោះទេ ដែលធ្វើឲ្យគេដាក់សង្ស័យថាការដឹកឈើនោះគ្មានច្បាប់ត្រឹមត្រូវឡើយ។
ប្រភពបានបន្តថា ក្រោយពីប្រមាញ់បានរូបភាព គេសង្ស័យថា រថយន្តនោះដឹកឈើមិនប្រក្រតីដែលអាចគ្មានច្បាប់ឡើយ។ នៅវេលាម៉ោងជាង៤រសៀលថ្ងៃដដែលនេះ ក្រុមអ្នកសារព័ត៌មានបានរាយការណ៍ជូនសមត្ថកិច្ចជំនាញរដ្ឋបាលព្រៃឈើ គឺលោក អែម សុគុណ នាយផ្នែករដ្ឋបាលព្រៃឈើស្រុកមេមត់ ដើម្បីចុះមកត្រួតពិនិត្យ។ ជាង១ម៉ោងក្រោយមក រថយន្តសង្ស័យនោះបានបើកចេញពីកន្លែងលាក់ខ្លួនក្នុងបរិវេណវត្តជាំខ្យង តាមផ្លូវជាតិលេខ៧ ចេញឆ្ងាយទៅហើយ ទើបគេឃើញឡានមន្ត្រីរដ្ឋបាលព្រៃឈើចំនួន១គ្រឿងមកដល់។
បន្ទាប់មកឡានមន្ត្រីរដ្ឋបាលព្រៃឈើនោះ បានបើកបន្តកន្ទុយគ្នាពីក្រោយឡានយីឌុបដឹកនោះដោយពុំបានស្ទាក់ឃាត់សួរនាំអ្វីទេ តែគេមើលឃើញថាបានបើករថយន្តពាំង ដែលជាការរារាំងរថយន្តអ្នកតាមប្រមាញ់ទៅវិញ។ ក្បួនហែរហមនោះរហូតមកដល់វេលាម៉ោង 5 និង30 ល្ងាចថ្ងៃដដែល ឡានមេព្រៃផ្នែកមេមត់ និងឡានអ្នកកាសែតម្នាក់បើកបិទគូថ ពីក្រោយ។ លុះទៅដល់ចំណុចឆ្កែអើត ឡានមេព្រៃដកខ្លួនចេញ ខណៈនោះដៃជើងរបស់ ឧកញ៉ា សឹង សំអុល ឈ្មោះឌឿន ហៅឌឿន ខ្សែកាប បើករថយន្តវីហ្គូមកបញ្ច្រាសទិសឡានដឹកឈើ មកបំបុកឡានអ្នកកាសែតប្រចាំស្រុកមេមត់ ម៉ាកកាមរី គូទហើមសេរី៩៥ ពណ៌សំបកឪឡឹក ខ្ទេចមួយចំហៀងផ្នែកខាងឆ្វេង ដើម្បីបន្លាច និងព្រមានដល់ក្រុមអ្នកកាសែតដទៃ ដែលកំពុងតាមប្រមាញ់ថតរូបនោះ។
ប្រភពបានបញ្ចាក់ថា បន្ទាប់ពីកើតហេតុមេព្រៃកម្លាំរបស់ លោក អែម សុគុណ បានថែមកម្លាំង ចំនួន ៣រថយន្តទៀតដើម្បីជូនដំណើររថយន្តដឹកឈើរបស់ឧកញ៉ា សឹង សំអុល តាមច្រកចាន់មូលទៅដល់បារ៉ាស់ ព្រំដែន ឆ្លងចូលដីវៀតណាមបានយ៉ាងរលូន ដែលទង្វើនេះគេអាចចាត់ទុកថា ជាការឃុបឃិតគ្នាជាប្រព័ន្ធរបស់សមត្ថកិច្ចខេត្តត្បូងឃ្មុំ។ ដោយឡែកលោក អែម សុគុណ នាយផ្នែករដ្ឋបាលព្រៃឈើស្រុកមេមត់ បានប្រាប់កាសែតខ្មែរអង្គរយើងតាមទួរស័ព្ទកាលពីរសៀលថ្ងៃទី១៧ ខែមករានេះថា ករណីនេះ តាមបញ្ជារបស់ថ្នាក់លើ លោកបានចាត់កម្លាំង៤រថយន្តប្រដេញឡានដឹកឈើរបស់ឧកញ៉ា សឹង សំអុល នោះ តែតាមមិនទាន់ផ្លូវតូចចង្អៀត ឡានដឹកឈើនោះបានបើកបុកបារ៉ាស់ប៉ុស្តិ៍ច្រកចាន់មូល ចេញទៅដីវៀតណាមបាត់ទៅ ហើយលោកថានឹងបន្តធ្វើការស្រាវជ្រាវរឿងនោះ។
ប្រភពពីខេត្តត្បូងឃ្មុំបានរាយការណ៍ឲ្យដឹងថា ឧកញ៉ា សឹង សំអុល ជាឈ្មួញរកស៊ីកាប់ឈើ លក់ក្នុងស្រុកភាគច្រើនដឹកទៅវៀតណាម ហើយបច្ចុប្បន្នជាដៃគូការកាប់ប្រមូល ផលអនុផលព្រៃឈើ របស់ក្រុមហ៊ុនដីសម្បទានសេដ្ឋកិច្ច ឈ្មោះ ប៊ិញ ហ្វឿក១ របស់កងទ័ពវៀតណាម មានទីតាំងនៅឃុំព្រះឈូកស្រុកកែវសីមា ប៉ុន្តែក្នុងដីក្រុមហ៊ុននោះអស់ឈើលេខ១ ឬឈើប្រណីតកាប់ទៅហើយ។ ប៉ុន្តែ ឧកញ៉ា សឹង អុល កាប់ប្រមូលផលអនុផលព្រៃឈើក្រៅដីរបស់ខ្លួនទូទាំងស្រុកកែវសីមា ប្រមូលចូលក្នុងក្រុមហ៊ុន អារ ច្រៀកដឹកបន្តតាមរថយន្តធំៗ ចេញជាច្រើនឆ្នាំមកហើយ មិនថារដូវប្រាំង ឬវស្សានោះទេ ដោយគេយកច្បាប់វិរិយោគដីសម្បទានសេដ្ឋកិច្ចធ្វើជាលេស ដើរប្រមូលទិញឈើប្រណីតមកពីក្នុងឃុំស្រែឈូក ស្រែព្រះ ចុងផ្លាស់ មេម៉ង នឹងគ្រប់ទិស ទីក្នុងស្រុកកែវសីមា ដែលសុទ្ធសឹងតែទីតាំងខាងលើស្ថិតក្នុងតំបន់អភិរក្សជីវៈចំរុះសីមា នឹងដែនជំរកសត្វព្រៃភ្នំព្រិច។
បញ្ហានេះឧកញ៉ា សឹង អុល ធ្វើឡើងរាប់សិបឆ្នាំមកហើយ ដោយមន្ត្រីមូលដ្ឋាន និងមន្ត្រីជំនាញពាក់ព័ន្ធគ្រប់ទិសទី រហូតដល់មន្ត្រីធំៗនៅភ្នំពេញក៏បានផ្សំគំនិតឃុបឃិតគ្នាយ៉ាងស្អិតរមួត។ ទីបញ្ចប់ឈើទាំងនោះបានដឹកចេញទៅវៀតណាម តាមប្រើច្រករបៀងនានាក្នុងភូមិសាស្ត្រខេត្តត្បូងឃ្មុំមានច្រករបៀង ទន្លេចាម,ចាន់មូល, បឹងជ្រោង។ល។ ហើយគេមិនដែលឃើញ មន្ត្រីជំនាញ និងអាជ្ញាធរខេត្តត្បូងឃ្មុំ នេះទប់ស្កាត់ឡើយ ដែលគេឃើញតែភាពបង្កអំណោយផលឲ្យការរកស៊ីដឹកឈើរបស់ឧកញ៉ា សឹង អុល ធ្វើទៅដោយរលូន ដោយម្នាក់ៗចាំទទួលយករបបក្បាលឡាន និងរបបប្រចាំខែទាំងស្រក់ទឹកមាត់ ដោយលែងខ្លាចចំណាត់ការណាមួយពីអង្គភាពប្រឆាំងអំពើពុលរលួយទៅហើយ លើសពីនេះទៅទៀតសូម្បីតែប្រសាសន៍របស់សម្តេចតេជោក៏ពូកគេលែងខ្វល់ដែរ ៕ ដោយ កញ្ញាសុភាព
រថយន្តទី៣របស់អ្នកកាសែតប្រចាំស្រុកមេមត់ ដែលរងគ្រោះដោយឈ្មោះឌឿន បើកឡានវីហ្គោបំបុក
