៣ថ្ងៃបុណ្យឆ្លងឆ្នាំសកល ភ្ញៀវទេសចរណ៍ប្រមាណ១១ម៉ឺននាក់ កម្សាន្តនៅខេត្តព្រះសីហនុ
ខេត្តព្រះសីហនុ៖ ភ្ញៀវទេសចរណ៍ប្រាំណ១១នាក់ បានសំរុកចូលមកកំសាន្តនៅរម្មណីយដ្ឋានអូឈើទាលក្នុងរយៈពេល៣ បុណ្យឆ្លងឆ្នាំសកល២០១៤ -២០១៥ ខណៈពេលការរំពឹងទុករបស់មន្ត្រីជំនាញត្រឹមតែក្រោម១០ម៉ឺននាក់ប៉ុណ្ណោះ។
លោក នូ ចាន់សុផល ប្រធានមន្ទីទេសចរណ៏ខេត្តព្រះសីហនុបានឲ្យដឹងថា នៅក្នុងឆ្នាំបុណ្យឆ្លងឆ្នាំសកល២០១៤ -២០១៥ នាឆ្នាំនេះ សំរាប់ខេត្តព្រះសីហនុ បានទទួលលទ្ធផលយ៉ាងល្អប្រសើរ និង ទទួលបានភាពជោគជ័យបំផុត ព្រោះគិតត្រឹមរយៈពេល៣ថ្ងៃ២៩ដល់៣១ខែធ្នូ ខេត្តព្រះសីហនុ អាចទទួលភ្ញៀវទេសចរណ៍ទាំងភ្ញៀវជាតិ និង អន្តរជាតិរហូតដល់ ចំនួន១១០៥២៦នាក់ ក្នុងនោះភ្ញៀវជាតិមានចំនួន៩៦៧១១នាក់ ភ្ញៀវអន្តរជាតិ១៣៨១៥នាក់ដែលនៅឆ្នាំ២០១៣ មានត្រឹមតែជាង១០ម៉ឺននាក់ប៉ុណ្ណោះ។
លោកបន្តថាចំពោះមូលហេតុដែលខេត្តព្រះសីហនុ មានភ្ញៀវទេសចរណ៍ចូលមកកម្សាន្តច្រើនបែបនេះ ក៏ព្រោះតែខេត្តព្រះសីហនុ ជាខេត្តដែលមានឆ្នេរខ្សាច់ល្អបំផុត មានបរិស្ថានល្អ អាកាសធាតុបរិសុទ្ធ នឹង តំបន់ទេសចរណ៍ធម្មជាតិជាច្រើនកន្លែងទៀត ជាងនេះទៅទៀត បញ្ហាសន្តិសុខ សុវត្តិភាព ចរាចរណ៍មានលក្ខណៈប្រសើរ ដែលកត្តាទាំងនេះបានបង្កអោយភ្ញៀវទេសចរណ៍មានភាពកក់ក្តៅក្នុងចូលមកទស្សនាស កាន់តែច្រើនឡើងៗពីមួយឆ្នាំទៅមួយឆ្នាំ។
ភ្ញៀវទេសចរណ៍ជាច្រើនបានសំដែងអារម្មណ៍ថា ចំពោះតម្លៃម្ហូបអាហារវិញ ក្នុងរយៈពេល៣ថ្ងៃនេះ ផ្ទះសំណាក់ សណ្ឋាគារហាក់មានតម្លៃខ្ពស់កប់ពពក (ពី១០ដុល្លារឡើងដល់៤០ដុល្លារ និងពី២៧ដុល្លារឡើងដល់៥០ទៅ៦០ដុល្លារ) ដែលបង្កអោយភ្ញៀវទេសចរណ៍មួយចំនួនឡើងរថយន្តក្រុងត្រឡប់ទៅភ្នំពេញទាំងយប់ ឯភ្ញៀវទេសចរសំរាកនៅមាត់សមុទ្រ ឯអ្នកខ្លះទៀតអង្គុយរហូតភ្លឺខណៈពេលតម្លៃម្ហូបអាហារឡើងថ្លៃតិចតួចសមរម្យ ដែលភ្ញៀវទេសចរណ៍អាចទទួលយកបាន។
ដោយឡែកពាក់ព័ន្ធទៅនឹងសន្តិសុខ ចរាចរណ៍នៅលើផ្លូវវិញ គិតត្រឹមរយៈពេល៣ថ្ងៃ បុណ្យឆ្លងឆ្នាំសកល២០១៤ -២០១៥ ២៩ដល់ថ្ងៃទី៣១ ករណីគ្រោះថ្នាក់ចរាចរណ៍បានកើតឡើងចំនួន៣ករណី គ្រោះថ្នាក់ចរាចរណ៍បង្ករឡើងដោយខ្លួនឯង០១ករណី បង្កឡើងរវាងម៉ូតូនឹងរថយន្ត០១ករណី និង ម៉ូតូរវាងម៉ូតូ០១ករណី បណ្តាលអោយមនុស្ស៩នាក់រងរបួស ធ្ងន់-មធ្យម និង ស្រាល ។
សូមបញ្ជាក់ផងដែរថា នៅខេត្តព្រះសីហនុ មានសណ្ឋាគារសរុបចំនួន៥៦ សណ្ឋាគារស្មើនឹង២៧៩២បន្ទប់ ផ្ទះសំណាក់សរុបចំនួន២២១ផ្ទះសំណាក់ ស្មើនឹង២៨៨៣បន្ទប់ ដែល នៅឱកាសឆ្លងឆ្នាំសកល២០១៤ -២០១៥ ភ្ញៀវចូលសំរាកពេញៗ៕ ដោយ កោះរ៉ុង
