កុមារីអាយុ៤ឆ្នាំ ជិះកាណូតមកពីរកអុសជាមួយឪពុកម្តាយ ធ្លាក់ចូលទន្លេឈ្លក់ទឹកស្លាប់
ខេត្តកំពង់ឆ្នាំង៖ កុមារីអាយុ៤ឆ្នាំម្នាក់ រស់នៅក្នុងគ្រួសារក្រីក្របានធ្លាក់ចូលទឹកទន្លេលង់ស្លាប់ នៅពេលជិះកាណូតមកពីរកអុសជាមួយឪពុកម្តាយ។ ហេតុការណ៍នេះបានកើតឡើងនៅវេលាម៉ោង៣និង៣០នាទីថ្ងៃទី០៥ ខែមករា ឆ្នាំ២០១៥ នៅចំណុចទន្លេក្រចាប់ ក្នុងភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង។
ក្រុមគ្រួសារកុមារីរងគ្រោះបាននិយាយអោយដឹងថា៖ កុមារីរងគ្រោះឈ្មោះ សៀង កញ្ញា អាយុ៤ឆ្នាំ ជាកូនទី៣ក្នុងចំណោមបងប្អូន៤នាក់ ឪពុកគេឈ្មោះ វី វិន អាយុ៣៦ឆ្នាំ ម្តាយឈ្មោះ សៀង សារួន អាយុ៣២ឆ្នាំ ជាកសិកររស់នៅក្នុងភូមិឃុំខាងលើ។
នៅថ្ងៃកើតហេតុឪពុកម្តាយនាងបាននាំនាងជិះកាណូតទៅរកអុសដុត ពេលត្រឡប់មកវិ ញឪពុកម្តាយដាក់អោយនាងជិះនៅកណ្តាលកាណូតក្រោយខ្នងឪពុក ចំណែកម្តាយជិះនៅ កន្សៃកាណូត រីឯអុសគរដាក់កណ្តាលកាណូតបាំងភ្នែកម្តាយមើលមិនឃើញកូន។ ពេលបើកកាណូតមកដល់ចំណុចខាងលើ កុមារីរងគ្រោះនៅក្រោយខ្នងឪពុកក៏បានធ្លាក់ចូលទឹកទន្លេ ពេលនោះឪពុកក៏បានដឹងហើយត្រឡប់កាណូតបកក្រោយមុជរកកូនស្រីវិញ ប៉ុន្តែទំរាំរកឃើញកូនស្រីនោះបានឈ្លក់ទឹកស្លាប់បាត់ទៅហើយ។ ក្រោយពេលកើតហេតុឪពុកម្តាយក៏បានដឹកសពកូនមលំនៅដ្ឋានវិញទាំងទឹកភ្នែកស្តាយស្រណោះយ៉ាងខ្លាំង។
នៅព្រឹកថ្ងៃទី០៦ ខែមករា ឆ្នាំ២០១៥ អ្នកស្រុកក្នុងភូមិត្រពាំងចាន់បានរ៉ៃអង្គាសប្រាប់គ្នា បានតិតតួចនាំគ្នាធ្វើបុណ្យទានជូនកុមារីរងគ្រោះតាមប្រពៃណី ហើយបាននាំគ្នាសែងសពកុមារី រងគ្រោះដោយថ្មើរជើងចម្ងាយដីជាង៥គីឡូម៉ែត្រ និងដឹកតាមកាណូតបន្តទៀត ទើបទៅដល់កន្លែងបញ្ចុះសព ដែលនោះគឺជាភាពលំបាក និងភាពក្រីក្ររបស់គ្រួសារសព និងអ្នកភូមិ៕ ដោយ រិទ្ធិ ជ័យ
