បុរសពោះម៉ាយពេលថ្ងៃចូលចិត្តនិយាយទូរស័ព្ទ ដល់ពេលយប់លួចឡើងដើមស្វាយចងកសម្លាប់ខ្លួន
ខេត្ដកណ្ដាល ៖ បុរសម្នាក់ជាកម្មករសំណង់បានចងក សម្លាប់ខ្លួនក្នុងពេលរាត្រីនៅលើដើមស្វាយក្នុងដីឡូតិ៍មួយកន្លែង ក្បែរផ្ទះរបស់ខ្លួន លុះព្រឹកឡើងបានបង្កឲ្យមានការភ្ញាក់ផ្អើលដល់ អ្នកភូមិ និងសមត្ថកិច្ចចុះត្រួតពិនិត្យមើល ករណីនោះ កាលពីវេលាម៉ោង៦ព្រឹកថ្ងៃទី៣០ ខែមករា ឆ្នាំ២០១៥ នៅចំណុចដីឡូត៍មួយកន្លែងស្ថិតក្នុងភូមិលើ ឃុំ ព្រែកអញ្ចាញ ស្រុកមុខកំពូល ខេត្ដ កណ្ដាល ។
សមត្ថកិច្ចឲ្យដឹងថា ជនរងគ្រោះឈ្មោះ គួង គាង អាយុ៣៧ឆ្នាំ ស្នាក់នៅភូមិស្វាយអាត់ លើ ឃុំព្រែកតាមាក់ ស្រុកខ្សាច់កណ្ដាល ខេត្ដកណ្ដាល មានមុខរបរជាជាងសំណង់ នៅភូមិ-ឃុំកើតហេតុខាងលើ។ ហើយករណីធ្វើអត្ដឃាតនេះសមត្ថកិច្ច មិនទាន់អះអាងពីមូលហេតុនៅឡើយទេ ។
បើតាមការអះអាងពីលោកកែវ សុធា មេការសំណង់នៅ កន្លែងកើតហេតុបានរៀបរាប់ប្រាប់សមត្ថ កិច្ចថា ជនរងគ្រោះតាំងពីចូលមកធ្វើ ការនៅក្នុងការដ្ឋានសំណង់ជាមួយលោកគឺបានរយៈពេល១៥ថ្ងៃកន្លងមកហើយ ហើយរូបគេពុំមានបញ្ហាអ្វីកើតឡើង ឡើយ ។ ក្រោយពីសម្រាកពីការងារ កាលពី៥ល្ងាចថ្ងៃទី២៩ ខែមករា ឆ្នាំ២០១៥ ជនរងគ្រោះបានទិញត្រីប្រហុកចំនួន១០គីឡូតិ៍ ហើយនៅវេលាម៉ោង៨យប់ជនរងគ្រោះបានអង្គុយ ធ្វើត្រីប្រហុកជាមួយមនុស្សស្រីម្នាក់ ឈ្មោះ អ៊ូ វ៉ាត លុះដល់ម៉ោង៩យប់ទើប គេចូលដេកស្រាប់តែព្រឹកឡើងក៏បានភ្ញាក់ផ្អើលនឹងរឿង នេះតែម្ដង។
ចំណែក ស្ដ្រីជាម្ដាយបង្កើតជនរងគ្រោះឈ្មោះ តុង ខាហឺ អាយុ៥៧ឆ្នាំ បាននិយាយប្រាប់ សមត្ថ កិច្ចថា គង់ គាង ជាបុរសពោះ ម៉ាយធ្លាប់មានប្រពន្ធម្ដងរួចមកហើយ តែគេពុំដែលមានអ្វីខូចចិត្ដនោះទេ គឺគេខំប្រឹងធ្វើការសន្សំលុយដើម្បីរកប្រពន្ធ មួយទៀត។ ប៉ុន្ដែមិនដឹងគេគិតខ្លីឬខូច ចិត្ដអ្វីបានជាមកធ្វើអត្ដឃាតចងក សម្លាប់ខ្លួនបែបនេះ ។
ជុំវិញការធ្វើអត្ដឃាតចងកនេះ សមត្ថកិច្ច ជំនាញធ្វើកោសល្យវិច័យដោយពិនិត្យឃើញថា សពជនរងគ្រោះ មានស្នាមជាំខ្មៅនៅរង្វង់ក រាងជាអក្សរអ៊ុយក្រៅពីស្លាកស្នាមខាងលើ ពុំបានពិនិត្យឃើញស្លាកស្នាមអ្វីផ្សេងទៀតឡើយ។ក្រោយពីពិនិត្យរួច សមត្ថកិច្ចបានប្រគល់សាកសពជូនអាណាព្យាបាលរបស់សពដើម្បីធ្វើបុណ្យតាមប្រពៃណីខ្មែរ៕
