ប្រជាពលរដ្ឋមានផលប៉ះពាល់ពីសំណង់ធារាសាស្ត្រអាចាំងប្រវែង១៩.៥០០ម៉ែត្រ មានការតវ៉ាកើនឡើង
ខេត្តកំពង់ឆ្នាំង៖ លោក ឈួរ ច័ន្ទឌឿន បានមានប្រសាសន៍ ជំរាបជូនដល់ក្រុមការងារថ្នាក់ជាតិ ចុះជួយខេត្តកំពង់ឆ្នាំង នៅក្នុងកិច្ចប្រជុំបូកសរុបត្រួតពិនិត្យលទ្ធផល នៃការអនុវត្តន៍កម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ ដែលអនុវត្តដោយក្រុមការងារថ្នាក់ជាតិ។ កិច្ចប្រជុំនេះបានធ្វើឡើងនៅក្នុងសាលាខេត្តកំពង់ឆ្នាំង នាថ្ងៃទី៣០ ខែធ្នូ ឆ្នាំ២០១៤ ក្រោមអធិបតីភាពឯ.ឧ អ៊ុក រ៉ាប៊ុន ប្រធានក្រុមការងារចុះជួយខេត្តកំពង់ឆ្នាំង និងឯកឧត្តម លោកជំទាវ លោក លោកស្រី ក្រុមការងារថ្នាក់ជាតិ និងថ្នាក់ខេត្តចំនួន១៨៤នាក់ចូលរួមផងដែរ។
លោក ឈួរ ច័ន្ទឌឿន បានមានប្រសាសន៍លើកឡើងថា៖គម្រោងសាងសង់ប្រព័ន្ធធារាសាស្ត្រអាចាំងប្រវែង១៩.៥០០ម៉ែត្រ ដែលមានអត្ថប្រយោជន៍ស្រោចស្រពលើផ្ទៃដី១០.៣០០ហិកតា ពេលនេះប្រជាពលរដ្ឋដែលរងផលប៉ះពាល់មានការតវ៉ាកើនឡើង ធ្វើអោយមានការលំបាកដល់ការសាងសង់ ទោះបីជាថ្នាក់ដឹកនាំខេត្ត និងមន្ត្រីជំនាញបានព្យាយាមពន្យល់ពីការទទួលបាននូវអត្ថប្រយោជន៍របស់ប្រជាពលរដ្ឋនៃគំរោងនេះក៍ដោយ។ម្យ៉ាងវិញទៀត ការរកើនឡើងនៃអ្នកតវ៉ាគឺកើតឡើងពីការកេងចំណេញខាងនយោបាយរបស់គណៈបក្សប្រឆាំង ដែលកត្តានេះធ្វើអោយរាំងស្ទះដល់ការអភិវឌ្ឍន៍ជាតិ និងផលប្រយោជន៍រួមរបស់ប្រជាពលរដ្ឋ។
ទាក់ទងនឹងរឿងនេះលោក អ៊ុក រ៉ាប៊ុន ប្រធានក្រុមការងារថ្នាក់ជាតិ ចុះជួយខេត្តកំពង់ឆ្នាំងបានមានប្រសាសន៍ផ្តាំផ្ញើថា៖ ចំពោះបញ្ហានេះ មន្ត្រីតាមមន្ទីរពាក់ព័ន្ធ, ក្រុមការងារថ្នាក់ស្រុក ខេត្ត និងក្រុមការងារថ្នាក់ជាតិ ត្រូវបន្តព្យាយាមពន្យល់ដល់ប្រជាពលរដ្ឋ អោយយល់ដឹងពីការទទួលបាននូវអត្ថប្រយោជន៍ ទៅអនាគតពីគំរោងរបស់រាជរដ្ឋាភិបាល ក្នុងការអភិវឌ្ឍន៍លើវិស័យកសិកម្ម និងទេសចរណ៍ ក្នុងតំបន់នោះ សំដៅកាត់បន្ថយភាពក្រីក្រប្រជាពលរដ្ឋនៅតាមមូលដ្ឋាន។ត្រូវអំពាវនាវដល់ប្រជាពលរដ្ឋ កុំជឿនូវឃោសនារបស់ជនមួយក្តាប់តូច ដែលមិនបានគិត ពីផលប្រយោជន៍ប្រជាពលរដ្ឋជាធំ និងបានធ្វើការរារាំងដល់ដំណើរការនៃគំរោងនេះ ដើម្បីតែផលប្រយោជន៍ផ្ទាល់ខ្លួននិងបក្ខពួកគេតែប៉ុណ្ណោះ។
គួរបញ្ជាក់ថា៖ គំរោងបង្កើតប្រព័ន្ធធារាសាស្ត្រស្រោចស្រពអាចាំងនេះ គឺជាគំរោងរបស់រាជរដ្ឋាភិបាលកម្ពុជាជូនដល់ប្រជាពលរដ្ឋនៅក្នុងស្រុកបរិបូរណ៌ និងមានជំនួយមូលនិធិពីសាធារណៈរដ្ឋប្រជាមានិតចិន ហើយត្រូវបានក្រុមហ៊ុនឈ្មោះ ស៊ីណូហាឌ្រូ របស់ប្រទេសចិនជាអ្នកទទួលម៉ៅការសាងសង់។នៅក្នុងគំរោងសាងសង់ទំនប់ធារាសាស្ត្រនេះមានប្រឡាយមេ មួយខ្សែប្រវែង១៩,៥០០ម៉ែត្រ, ប្រឡាយរងចំនួន១០ខ្សែប្រវែង៤៩,៦៨០ម៉ែត្រ,និងមានសំណង់សរុបចំនួន២២៤កន្លែង ក្នុងនោះមានសំណង់បង្វែរចរន្តទឹក,សំណង់សំរួលចរន្តទឹក, សំណង់ចែកចាយទឹក, និងសំណង់លូកាត់ផ្លូវ។
អត្ថប្រយោជន៍នៃទំនប់ធារាសាស្ត្រមួយនេះគឺអាចនាំ ទឹកស្រោចស្រពទៅលើផ្ទៃដីបានចំនួន១០,៣០០ហិកតា ក្នុងនោះប្រជាពលរដ្ឋចំនួន៩ឃុំ ក្នុងស្រុកបរិបូរណ៌និង១ឃុំក្នុងស្រុកទឹកផុស ហើយអាចទទួលបានការប្រើប្រាស់ទឹក គឺឃុំ អញ្ចាញរូង,ឃុំផ្សារ,ឃុំពេជ្រចង្វារ,ឃុំពពិល,ឃុំពន្លៃ,ឃុំចក,ឃុំខុនរ៉ង,ឃុំឆ្នុកទ្រូ,ឃុំត្រពាំងចាន់,និងឃុំក្រាំងស្គារ ក្នុងនោះមានផ្ទៃដីប្រជាពលរដ្ឋចំនួន២៧៦ហិកតា រងការប៉ះពាល់ពីគំរោងនេះ។
ការបង្កើតប្រព័ន្ធធារាសាស្ត្រប្រវែង១៩,៥០០ម៉ែត្រ និងប្រឡាយរងប្រវែង៤៩,៦៨០ម៉ែត្រនេះ គឺធ្វើការសាងសង់ពីបេតុង ដែលមានគុណប្រយោជន៍យ៉ាងសំខាន់ដល់ការបង្កបង្កើនផល របស់ប្រជាពលរដ្ឋទាំង១០ឃុំ។កាល ណាមានផ្លូវ និងមានទឹកគ្រប់គ្រន់គឺយើងអាចធ្វើស្រែចំការ បានទ្វេរដងក្នុង១ឆ្នាំៗ និងទទួលបានទិន្នផលខ្ពស់សំរាប់ផ្គត់ផ្គង់ជីវភាពកាត់បន្ថយភាពក្រីក្រនៅក្នុងគ្រួសារ និងមូលដ្ឋាន។ ចំពោះប្រជាពលរដ្ឋដែលរងផលប៉ះពាល់ពីគំរោងនេះចំនួន២២៤ហិកតា ដែលអាជ្ញាធរខេត្ត.ស្រុក.ឃុំ.ភូមិ និងមន្ទីរពាក់ព័ន្ធ កំពុងធ្វើការដោះស្រាយគោលនយោបាយជូនបងប្អូនប្រជាពលរដ្ឋនូវតំលៃដីធ្លីតាមតំលៃទីផ្សារសព្វថ្ងៃនេះ៕ ដោយ រិទ្ធិ ជ័យ
