ភ្នាក់ងារទូរស្សន៍ជាតិកម្ពុជា TVK បានស្លាប់ក្នុងហេតុការណ៍គ្រោះថ្នាក់ចរាចរណ៍
ខេត្តបន្ទាយមានជ័យ៖ រថយន្តកាមរីឆ្លាមបើកបរបញ្ច្រាសទិសគ្នា និងរថយន្តធុនធំហើយបានបុកគ្នា បណ្តាលឲ្យតៃកុង រថយន្តកាមរី រងរបួសធ្ងន់ ហើយបានស្លាប់នៅពេលបញ្ជូនទៅកាន់មន្ទីរពេទ្យ។ ហេតុការណ៍គ្រោះថ្នាក់ចរាចរណ៍នេះ នៅលើជាតិលេខ៥ នៅវេលាម៉ោង៤ និង២០នាទីល្ងាច ថ្ងៃទី២៧ ខែមករា ឆ្នាំ២០១៥ ស្ថិតនៅភូមិទឹកថ្លា សង្កាត់ទឹកថ្លា ក្រុងសេរីសោភ័ណ ខេត្តបន្ទាយមានជ័យ។
លោកសន គឹមសួគ៌ នាយការិយាល័យសណ្តាប់ធ្នាប់ជើងគោកខេត្តបន្ទាយមានជ័យបានប្រាប់ឲ្យដឹងថា ក្រោយពីទទួលព័ត៌មានលោកក៏បានបញ្ជាកម្លាំងនគរបាលចុះទៅអន្តរាគមន៍ វាស់វែង និងបានសង្គ្រោះជនរងគ្រោះបញ្ជូនទៅកាន់មន្ទីរពេទ្យតាមរយៈ រថយន្តសង្គ្រោះបន្ទាន់នៃស្នងការខេត្ត តែអកុសល្យដោយស្ថានភាពជនរងគ្រោះធ្ងន់ធ្ងរពេកបញ្ជូនមកដល់មន្ទីរស្លាប់បាត់បង់ជីវិតតែម្តង ចំណែកតៃកុងរថយន្តធំបានរត់គេចខ្លួនបាត់ស្រមោល បង្សល់ទុកតែរថយន្តនៅកន្លែងកើតហេតុ។
លោកបានបន្តថា រថយន្តទាំង២គ្រឿងនេះគឺបើកបរផ្ទុយទិសគ្នា ក្នុងស្ថានភាពលឿន លុះដល់ចំណុចកើតហេតុស្រាប់តែរថយន្តធុនធំបានបុកជាមួយរថយន្តកាមរីឆ្លាមពេញទំហឹងតែម្តង។ ជនរង គ្រោះមានឈ្មោះ ង៉េង ស៊ីថា ភេទប្រុស អាយុ៥៣ឆ្នាំ រស់នៅភូមិក្បាលស្ពាន១ សង្កាត់-ក្រុងប៉ោយប៉ែត ខេត្តបន្ទាយមានជ័យ និងមានជាបុគ្គលិក បំរើការងារសារព័ត៌មានទូរស្សន៍ជាតិកម្ពុជា TVK បើកបរ រថយន្ត កាមរីឆ្លាម ពណ៌ទឹកមាស ពាក់ស្លាកលេខ ភ្នំពេញ 2H-9375 បណ្តាលស្លាប់បាត់បង់ជីវិត។ រីឯរថយន្តធុនធំ ម៉ាកISUZU ពាក់ស្លាកលេខ កំពង់ធំ 3A-1370 មិនទាន់ដឹងអត្តសញ្ញាតៃកុងនៅឡើយ បានរត់គេចខ្លួនបាត់ស្រមោល បង្សល់ទុកតែរថយន្តបង្កហេតុតែប៉ុណ្ណោះ។
ក្រោយពីកើតហេតុសមត្ថកិច្ចបានស្ទួចយករថយន្តរងគ្រោះនិងរថយន្តបង្កយកមករក្សាទុកបណ្តុះអាសន្ននៅស្នងការខេត្ត ដើម្បីរង់ចាំការដោះស្រាយគ្នាចំពោះមុខច្បាប់នាពេលក្រោយ៕ ដោយយីហាំង
