ហូបការរួច ត្រឡប់មកផ្ទះវិញ ស្រវឹងធ្លាក់ភ្នែក ជិះម៉ូតូបុកបង្កាន់ដៃស្ពាន រងរបួស បាក់ធ្គាមធ្ងន់ស្រែករោទ៍ដូចគោ
ខេត្តកំពង់ឆ្នាំង៖ យុវជនម្នាក់បានរងរបួសធ្ងន់បាក់ថ្គាម ដោយស្រវឹងស្ទើរតែធ្លាក់ភ្នែក មកពីស៊ីការជិះម៉ូតូទៅបុកបង្កាន់ដៃស្ពានពេញទំហឹង ដូលបោកផ្ទប់ច្រងាប់ច្រងិលតែម្នាក់ឯង សំណាងល្អគ្រោះថ្នាក់មិនដល់ជីវិត។ ករណីនេះបានកើតឡើងនៅវេលាម៉ោង១ និង៣០នាទីរសៀលថ្ងៃទី០២ ខែកុម្ភៈ ឆ្នាំ២០១៥ លើផ្លូវលំគ្រួសក្រហមស្ថិតនៅក្នុងភូមិប្រស្នឹប ឃុំប្រស្នឹប ស្រុករលាប្អៀរ។
សមត្ថកិច្ចនគរបាលមូលដ្ឋានបាននិយាយអោយដឹងថា៖ ជនរងគ្រោះរូបនោះមានឈ្មោះ ប៉ូយ សឿន អាយុ២២ឆ្នាំ មានទីលំនៅក្នុងភូមិកើតហេតុខាងលើ។ មុនពេលកើតហេតុ ជនរងគ្រោះរូបនេះបានជិះម៉ូតូ ម៉ាកស្មាស់ ពណ៌ខ្មៅអត់ស្លាកលេខ ទៅហូបការគេជាមួយបងប្រុសនៅចុងភូមិ។ ក្នុងពេលហូបការនោះបងប្រុសបានស្រវឹងដោយអោយយុវជនរងគ្រោះឌុបមកផ្ទះមុន លុះពេលឌុបបងប្រុសដាក់ផ្ទះរួច ហើយជនរងគ្រោះបានជិះម៉ូតូទៅរោងការបន្តផឹកស៊ីទៀត។គឺរហូតម៉ោងជាង១រសៀល ពេលគេសាររោងទើបជនរងគ្រោះបានជិះម៉ូតូមកផ្ទះវិញម្នាក់ឯង ហើយដោយសារតែស្រវឹងស្រាខ្លាំងពេកគេក៏បានជិះម៉ូតូទៅបុកបង្កាន់ដៃស្ពាន បណ្តាលអោយរងរបួសបាក់ឆ្អឹងថ្គាមយ៉ាងធ្ងន់ធ្ងរ ចំណែកម៉ូតូបានខ្ទេចមុខមួយកំណាត់។
សមត្ថកិច្ចបានបន្តអោយដឹងទៀតថា៖ ជនរងគ្រោះត្រូវបានដឹកទៅសង្គ្រោះព្យាបាលនៅផ្ទះពេទ្យឯកជនមួយក្នុងភូមិ ប៉ុន្តែដោយសារសភាពរបួសធ្ងន់ធ្ងរពេកក៏បានបញ្ជូនជូនមកមន្ទីរពេទ្យខេត្ត និងដោយក្រុមគ្រូពេទ្យខេត្តពេលឃើញសភាពរបួសនេះធ្ងន់ធ្ងរ គេក៏បានបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យក្រុងភ្នំពេញជាបន្តទៀត៕ ដោយ រិទ្ធិ ជ័យ
