សមត្ថកិច្ចចាប់បានក្របី៥ក្បាល ដែលចោរលួចពីខេត្តពោធិសាត់ មកលក់នៅខេត្តកំពង់ឆ្នាំង ប្រគល់ឲ្យម្ចាស់វិញ ជនល្មើសកំពុងស្វែងរកចាប់ខ្លួន
ខេត្តកំពង់ឆ្នាំង៖ សត្វក្របីចំនួន៥ក្បាល ដែលចោរលួច កាលពីសប្តាហ៍ពីខេត្តពោធិសាត់មកលក់ នៅក្នុងខេត្តកំពង់ឆ្នាំង ត្រូវសមត្ថកិច្ចនគរបាលស្រុកកំពង់ត្រឡាចចាប់បាន ហើយបានប្រគល់អោយម្ចាស់វិញកាលពីព្រឹកថ្ងៃទី១០ ខែកុម្ភៈ ឆ្នាំ២០១៥ ចំណែកពួកចោរបានគេចខ្លួនបាត់។
លោក ហ៊ុល វាសនា អធិការនគរបាលស្រុកកំពង់ត្រឡាចបានអោយដឹងថា៖ ក្របីទាំង៥ក្បាលនេះត្រូវបានសមត្ថកិច្ចរបស់លោកចាប់ នៅពេលដែលមានមនុស្សចំនួន២នាក់ មកពពាយនាយដើរលក់ ដោយ គ្មានលិខិតស្នាម ។ ដោយកាលពីវេលាម៉ោង១០ និង៣០នាទីព្រឹក ថ្ងៃទី៧ ខែកុម្ភៈ ឆ្នាំ២០១៥ មានមនុស្ស ២នាក់ បានដឹកក្របីតាមរថយន្តមួយគ្រឿង មកទម្លាក់នៅស្រុកកំពង់ត្រឡាច ហើយក៏បានពពាយលក់ ក្របីទាំង៥ក្បាល ក្នុងនោះ ក្របីមេ២ក្បាល ក្របីជំទង់២ក្បាល និងកូន១ក្បាល ។
ដោយមានការសង្ស័យសមត្ថកិច្ចលោក បានធ្វើការសាកសួររកលិខិតស្នាម ពេលនោះម្ចាស់ក្របីប្រាប់ថា គេមានឈ្មោះ ម៉ាត់ ហ្វាស៊ី អាយុ៣៥ឆ្នាំ ចំណែកលិខិតមាននៅនឹងឡានធំ ហើយពេលនោះ សមត្ថកិច្ច បានអោយទៅយកលិខិតបញ្ជាក់ពីការដឹកជញ្ជូនក្របីខាងលើនេះ ដោយបានសុំឃាត់ក្របីទុកសិន ព្រម ទាំងបានថតរូបម្ចាស់ក្របីទាំងនេះមុននឹងអោយចេញទៅយកលិខិតបញ្ជាក់ ប៉ុន្តែពេលចេញទៅគេ ក៏គេចខ្លួនបាត់រហូត។
ស្រាប់តែនោះថ្ងៃទី០៩ ខែកុម្ភៈ ឆ្នាំ២០១៥ មានម្ចាស់ក្របីពិតប្រាក ឈ្មោះម៉េត ម៉ៅ អាយុ៤៧ឆ្នាំ រស់ នៅភូមិប៉ែន ឃុំលាជ ស្រុកភ្នំក្រវ៉ាញខេត្តពោធិសាត់ បានមកអះអាងថា ក្របីនេះជារបស់គាត់បានបាត់កាលពីថ្ងៃទី០៥ ខែកុម្ភះ ឆ្នាំ២០១៥ និងមានទាំងលិខិតបញ្ជាក់ពីអាជ្ញាធរមូលដ្ឋាននិងអធិការនគរ បាលស្រុកភ្នំក្រវ៉ាញផង លោកក៏បានឆ្លងយោបល់លោកស្នងការនគរបាលខេត្ត និងលោក ព្រះរាជអាជ្ញា សាលាដំបូងខេត្ត ហើយបានបញ្ជារ អោយលោកប្រគល់អោយក្របីទៅម្ចាស់ដើមវិញ។
លោកបានបន្តថា៖ ជនសង្ស័យគឺបានស្គាល់អត្តសញ្ញាណហើយតាមរយៈ រូបថតដែលសមត្ថកិច្ចបានថតទុក និងបានរាយការណ៍ទៅសមត្ថកិច្ចខេត្តពោធិសាត់រួចហើយ ដែលពេលនេះសមត្ថកិច្ចនគរបាល ខេត្តពោធិសាត់កំពុងធ្វើការស្រាវជ្រាវស្វែងរកចាប់ខ្លួនជនល្មើស៕ ដោយ រិទ្ធិ ជ័យ
